Kalunga okwa hala u kale kaume kaye. Mbela owe shi diladila ngoo nale kutya oto dulu okuninga kaume kOmunhu munenenene meshito alishe? Abraham oo a li ko nale, okwa ifanwa kaume kaKalunga. (Jakob 2:23) Vakwao ovo va popiwa mOmbibeli navo yo ova hafela oukaume naKalunga nokwa li va nangekwa noupuna. Kunena, ovanhu va dja moitukulwa aishe yokombada yedu ova ninga ookaume kaKalunga. Naave yo oto dulu okuninga kaume kaKalunga.

Okukala kaume kaKalunga oshi li nawa shi dulife okukala kaume komunhu keshe. Kalunga iha nyemateke nande ookaume kaye ovadiinini. (Epsalme 18:26, OB-1954) Okukala kaume kaKalunga oshi dulife okukala u na omaliko. Oshipuna ngeenge sha fi, oimaliwa yasho ohai kufwa po kovanhu vakwao. Ndele ovo ve na oukaume naKalunga ove na emona olo pe he na nande umwe ta dulu oku li va kufa. — Mateus 6:19.

Ovanhu vamwe otashi dulika va kendabale ve ku kelele okulihonga kombinga yaKalunga. Nokuli navamwe vomookaume koye nosho yo ovakwanedimo otashi dulika ve shi ninge. (Mateus 10:36, 37) Ngeenge vamwe tave ku yolo ile tave ku tilifa, lipula ove mwene: ‘Olyelye nda hala okuhafifa — ovanhu ile oKalunga?’ Diladila kwaashi: Ngeenge umwe okwe ku lombwele u ha lye vali, mbela oto ka dulika kuye? Hasho nandenande! Owa pumbwa oikulya opo u kale nomwenyo. Ndele Kalunga ota dulu oku ku ningifa u kale nomwenyo fiyo alushe! Hano ino pitika nandenande omunhu e ku efife okulihonga nghee to dulu okuninga kaume kaKalunga. — Johannes 17:3.