Oukaume owe likolelela kohole. Apa ngoo pe fike ouhapu wokulihonga kwoye kombinga yaJehova, opo ngoo pe fike ounene wohole yoye yoku mu hola. Eshi ohole yoye yokuhola Kalunga tai kulu, nehalo loku mu longela otali kulu yo. Eshi otashi ke ku linyengifa u ninge omuhongwa waJesus Kristus. (Mateus 28:19) Mokulimbwanga mumwe nEendombwedi daJehova di li oukwaneumbo u na elao, oto dulu okuhafela oukaume waKalunga fiyo alushe. Oshike u na okuninga?

Ou na okuulika ohole yoye yokuhola Kalunga mokudulika koipango yaye. “Osheshi ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” — 1 Johannes 5:3.

Tula moilonga osho to lihongo. Jesus okwa popya ehokololo olo tali shi faneke. Omulumenhu omunandunge okwa tungila eumbo laye kemanya. Omulumenhu elai okwa tungila eumbo laye mehenge. Eshi oshikungulu shinene she uya, eumbo olo la tungilwa kemanya inali ongotela ndele eumbo olo kwa li la tungilwa mehenge ola wa po, newo lalo la li linene. Jesus okwa ti kutya ovo tava udu omahongo aye ndele tave a wanifa po ove li ngaashi omulumenhu oo a tungila eumbo laye kemanya. Ndele ovo tava pwilikine komahongo aye ndele itave a wanifa po ove li ngaashi omulumenhu elai oo a tungila mehenge. Owa hala okukala wa fa omulumenhu elipi? — Mateus 7:24-27.

 Eliyandjo. Eshi otashi ti kutya oto i kuJehova meilikano ndele to mu lombwele kutya owa hala okulonga ehalo laye fiyo alushe. Okulonga ehalo laKalunga otashi ulike kutya ove omuhongwa waJesus Kristus. — Mateus 11:29.

Eninginifo. “[Ninginifwa, NW], ove u koshwe omatimba oye, nokwiifana edina lOmwene.” — Oilonga 22:16.

Kala u na ombinga pauyadi mokulongela Kalunga. “Keshe eshi tamu shi ningi, shi ningeni komitima deni nokulongela Omwene, hamunhu.” — Ovakolossi 3:23.