Opo u ninge kaume kaKalunga, owa pumbwa okulihonga kombinga yaye. Mbela ookaume koye ove shii edina loye nohave li longifa? Heeno, osho hava ningi. Kalunga okwa hala yo u shiive nou longife edina laye. Edina laKalunga oJehova. (Epsalme 83:18, KB-1955; Exodus 15:3, OB-1954; Mateus 6:9) Ou na yo okulihonga osho e hole naasho e yele. Owa pumbwa yo okushiiva kutya ookaume kaye oolyelye nosho yo ovatondi vaye kutya oolyelye. Okushiiva umwe ohashi pula efimbo. Ombibeli otai ti oshi li oshinima shopandunge okutula po efimbo lokulihonga kombinga yaJehova. — Ovaefeso 5:15, 16.

Ookaume kaKalunga ohava longo osho tashi mu hafifa. Diladila kookaume koye. Ngeenge oho va ningi nai noho ningi oinima oyo ve yele, mbela otava ka twikila tuu nokukala ookaume koye? Hasho nandenande! Monghedi ya faafana, ngeenge owa hala okukala kaume kaKalunga, ou na okulonga osho tashi mu hafifa. — Johannes 4:24.

Hamalongelokalunga aeshe taa twala mokukala noukaume naKalunga. Jesus oo e li kaume kaKalunga kopofingo, okwa popya eendjila di li mbali. Imwe oya mbwalangadja noi na ovanhu vahapu. Ondjila oyo otai twala mehanauno. Ondjila ikwao oya finana noi na ovanhu vanini ovo tava ende muyo. Ondjila oyo otai twala komwenyo waalushe. Eshi otashi ti kutya, ngeenge owa hala okupanga oukaume naKalunga, ou na okulihonga onghedi oyo ya yuka yoku mu longela. — Mateus 7:13, 14.