MBELA owa uda nale omunhu ta popi shi na sha nexulilo lounyuni? —  Kunena ovanhu vahapu ohava popi shi na sha nexulilo lounyuni. Ovanhu vamwe ohava diladila kutya ounyuni otau ka xulifwa po okupitila moita omo ovanhu tava ka longifa oilwifo yopalute. Ndele mbela oto diladila kutya Kalunga ota ka efa ovanhu va hanaune po edu letu liwa nosho yo eulu letu liwa neenyofi dalo tadi vilima? — 

Ngaashi twe lihonga nale, Ombibeli oya popya kombinga yexulilo lounyuni, ya ti: “Ounyuni otau xulu po.” (1 Johannes  2:17) Ndele mbela oto diladila kutya eshi taku tiwa ounyuni otau xulu po, edu lo vene olo tali ka xula po? —  Hasho nandenande, molwaashi Ombibeli oya ti kutya Kalunga okwa shita edu opo ‘li kalwe,’ sha hala okutya, opo ovanhu va kale ko nova hafele okukala kulo. (Jesaja 45:18) Epsalme 37:29 otali ti: “Ovayuki, vo otava ka fyuulula [edu, OB-1986] ndee tava kala mo alushe.” Onghee hano, Ombibeli otai ti yo kutya edu otali kala po fiyo alushe. — Epsalme 104:5; Omuudifi 1:4.

Ngeenge eshi taku tiwa kutya ounyuni otau xulu po inashi hala okutya edu lo vene olo tali ka xula po, oshike hano mboli tashi ka xula po? — Ohatu ka mona kutya oshike ngeenge otwa konakona noukeka shi na sha naasho sha li sha ningwa po pefimbo laNoa. Ombibeli oya ti: ‘Ounyuni winya wonale owa nyonaukila meyelu.’ — 2 Petrus 3:6.

Mbela ope na ovanhu vamwe ovo va li va xupa pefimbo lEyelu linene olo la li ko pefimbo laNoa? —  Ombibeli oya ti kutya Kalunga okwa li “a amena Noa, omuudifi wouyuki novakwao va-7, eshi a yelulifa ounyuni wovahenakalunga eyelu.” — 2 Petrus 2:5.

Hano, ounyuni oo wa li wa xula po oshike mboli? Mbela edu olo la li la xula po ile ovanhu ovakolokoshi? —  Ombibeli oya ti kutya ‘ounyuni wovahenakalunga.’ Ndele didilika kutya Noa okwa tiwa kutya okwa li “omuudifi.” Mbela oto diladila kutya okwa li ha udifa kombinga yashike? —  Noa okwa li ta londwele ovanhu shi na sha nexulilo ‘lounyuni winya wonale.’

Eshi Jesus a li ta popi shi na sha nEyelu linene, okwa li a lombwela ovahongwa vaye kombinga yaasho ovanhu va li hava ningi fimbo exulilo olo la li inali uya. Okwa li e va lombwela a ti: ‘Ovanhu pomafiku enya a tetekela eyelu okwa li hava li nohava nu, hava hombola nohava hombolifa, fiyo efiku olo Noa a ya mo monguluwato, ndele vo inave shi shiiva, fiyo eyelu le uya nole va hanauna po aveshe.’ Opo nee Jesus okwa li a popya kutya ovanhu osho tava ka kala ngaho fimbo ounyuni ou inau xula po. — Mateus 24:37-39.

Eendjovo daJesus otadi ulike kutya ohatu dulu okulihonga oshilihongomwa mwaasho ovanhu va li hava ningi fimbo Eyelu inali uya. Mbela  oto dimbuluka kutya ovanhu pefimbo laNoa ova li hava ningi shike ngaashi we lihonga mEtukulwa 10? —  Ovanhu vamwe ova li hava longifa eenghono nokulonga ominyonena. Ndele ngaashi Jesus eshi popya, ovanhu vahapu kava li hava pwilikine eshi Kalunga a li a tuma Noa e va udifile.

Efiku limwe Jehova okwa li a lombwela Noa kutya ota ka hanauna po ovanhu ovakolokoshi neyelu. Okwa li a popya kutya omeva otaa ka tuvika ounyuni aushe, nokuli neendudu. Jehova okwa li a lombwela Noa a tunge ongulu yomomeva ya kula. Ongulu yomomeva oyo oya li ya fa oshikefa sha kula noshile, ngaashi naanaa u i wete mefano olo li li pepandja 238.

Kalunga okwa li a lombwela Noa a tunge ongulu yomomeva ya kula opo a dule okukala mo pamwe noukwaneumbo waye nosho yo oinamwenyo ihapu, opo va xupifwe. Noa noukwaneumbo waye ova li va longa noudiinini. Ova li va teta omiti da kula, nova li va tunga ongulu yomomeva noiti oyo va li va ka. Ova li va tunga ongulu oyo oule womido dihapu molwaashi oya li ya kula neenghono.

Mbela oto dimbuluka kutya Noa okwa li ha ningi yo vali shike oule womido odo a kala ta tungu ongulu yomomeva? —  Okwa li ha udifa, ta londwele ovanhu shi na sha nEyelu olo la li tali ke uya. Mbela ovanhu ova li ngoo va pwilikina kuye? Kapa li nande omunhu umwe a li a pwilikina kuNoa, kakele koukwaneumbo waye. Ovanhu vakwao ova li ashike ve lipyakidila noinima yavo. Mbela oto dimbuluka kutya Jesus okwa ti kutya ova li ve lipyakidila nashike? —  Ova li ve lipyakidila nokulya nokunwa nosho yo okuhombola. Kava li ve wete tava longo oukolokoshi neenghono nokava li va pwilikina eshi Noa te va udifile. Natu ka tale kutya oshike sha li she va ningilwa.

Eshi Noa noukwaneumbo waye va ya mongulu yomomeva, Jehova okwa li a idila omivelo dayo. Ndele ovanhu ovo va li kondje yongulu oyo kava li natango va itavela kutya Eyelu otali uya. Ombadilila, odula oya li ya hovela okuloka, nodula oyo kaya li tai loko ngaashi odula hai loko kunena. Oya li odula yepoola, nokonima ashike yokafimbo kaxupi,  omeva okwa li a hapupala a fa omulonga wa kula nokwa li taa popola mokule. Omeva oo okwa li taa ufa po omiti dinene nokwa li taa kungulula po omamanya manene a fa ashike oumanya vanini. Oshike sha li sha ningilwa ovanhu ovo va li kondje yongulu yomomeva? —  Jesus okwa ti: “Eyelu le uya nole va hanauna po.” Ovanhu aveshe ovo va li kondje yongulu yomomeva ova li va fya omeva. Omolwashike mbela va li va fya? —  Jesus okwa ti: “Inave shi shiiva.” Kava li va pwilikina kuNoa. — Mateus 24:39; Genesis 6:5-7.

Dimbuluka kutya Jesus okwa ti kutya osho sha li sha ningilwa ovanhu vopefimbo laNoa oshi li oshihopaenenwa tashi londwele kufye nena. Oshike hatu lihongo mo moshinima osho? — Ovanhu pefimbo opo kava li ashike va hanaunwa po molwaashi va li ovakolokoshi ndele ova li yo va hanaunwa po molwaashi vahapu vomuvo ova li ve lipyakidila unene nokava li ve na efimbo lokulihonga kombinga yaKalunga nosho yo osho a li ta ka ninga. Otu na okulungama opo tuha kale twe va fa, hasho mbela? — 

Mbela oto diladila kutya Kalunga natango ota ka hanauna po ounyuni ou neyelu? —  Hasho nandenande, Kalunga okwa udaneka kutya ita ka hanauna po vali ounyuni ou neyelu. Okwa ti: ‘Outa wange ohandi u tula moilemo, u ninge edidiliko.’ Jehova okwa ti kutya outa wodula otau ka kala edidiliko kutya ‘omeva itaa ka ninga vali eyelu a nyonaune po ombelela aishe.’ — Genesis 9:11-17.

Onghee hano, otu na okukala tu na oushili kutya Kalunga ita ka hanauna po vali ounyuni ou neyelu. Ndele ngaashi twe lihonga nale, Ombibeli oya popya yo shi na sha nexulilo lounyuni ou. Eshi Kalunga ta ka hanauna  po ounyuni ou, oolyelye tava ka xupifwa? —  Mbela ovanhu ovo ve lipyakidila noinima yakwalukeshe noinava hala okulihonga kombinga yaKalunga? Mbela ovovo hava kala vehe na efimbo lokukonakona Ombibeli? Oto diladila ngahelipi? — 

Otwa hala okukala mokati kovanhu ovo tava ka xupifwa kuKalunga, hasho mbela? —  Mbela itashi ka kala shihafifa ngeenge oukwaneumbo wetu owa kala wa fa waNoa ndele Kalunga te ke tu xupifa atushe? — Ngeenge otwa hala oku ka xupa pexulilo lounyuni ou, otwa pumbwa okuuda ko kutya Kalunga ote ke u hanauna po ngahelipi nokweeta ounyuni waye mupe wouyuki. Natu ka tale kutya ote ke shi ninga ngahelipi.

Ombibeli otai tu pe enyamukulo muDaniel 2:44. Omushangwa oo otau popi kombinga yomafiku etu tau ti: “Pomafiku eehamba dinya Kalunga ou komeulu ota ka dika ouhamba [epangelo] itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene otau ka kala fiyo alushe.”

Omushangwa oo ou u udite ko ngoo? —  Ombibeli otai ti kutya epangelo laKalunga otali ka hanauna po omapangelo aeshe okombada yedu. Omolwashike mbela? —  Omolwaashi ihaa dulika komunhu oo a nangekwa po kuKalunga a ninge Ohamba. Olyelye oo Kalunga a nangeka po a ninge Ohamba? — OJesus Kristus.

Jehova Kalunga oku na oufemba okuhoolola epangelo olo li na okupangela, nokwa hoolola Omona waye, Jesus, oye a ninge Ohamba. Mafiku, Jesus Kristus oo e li Ohamba yOuhamba waKalunga, ota ka kwatela komesho mokuhanauna po omapangelo aeshe ounyuni ou. Ombibeli oya hokolola kutya Jesus osho ta ka ninga ngaho mEhololo 19: 11-16, ngaashi tashi ulikwa nokuli nomefano omo. Ombibeli otai ti kutya oita yaKalunga omo ta ka hanauna po omapangelo aeshe ohai ifanwa Harmagedon.

Kalunga okwa ti kutya Ouhamba waye otau ka hanauna po omapangelo aeshe opanhu. Mbela Kalunga okwe tu lombwela tu hanaune po  omapangelo oo? —  Ahowe, Ombibeli otai ti kutya Harmagedon “oita mefiku linene laKalunga omunamapangelo aeshe.” (Ehololo 16:14, 16) Onghee hano, Harmagedon oita yaKalunga, na Kalunga ota ka longifa Jesus Kristus opo a kwatele komesho omatangakwaita omeulu moita oyo. Mbela oita yaHarmagedon oi li popepi? Natu tale ngeenge ohatu dulu okushiiva kutya oi li popepi ile hasho.