ATUSHENI otwa hala okukala twa hafa, hasho mbela? —  Ndele ovanhu vahapu inava hafa shili. Mbela ou shi shii kutya omolwashike? — Omolwaashi inave lihonga kutya oshike osho tashi dulu oku va etela ehafo. Ohava diladila kutya okulikongela oinima ihapu yopamaliko otaku dulu oku va etela ehafo. Ndele ngeenge va mono oinima yopamaliko, ihava kala alushe va hafa.

Omuhongi Munene okwa popya oshinima sha fimana osho tashi dulu okweetela ovanhu ehafo a ti: “Okuyandja oku nelao komesho yokutambula.” (Oilonga 20:35) Mbela ongahelipi hatu dulu okukala twa hafa? —  Ohatu dulu okumona ehafo mokukala hatu yandje nosho yo okukala hatu longele vamwe oilonga yonhumba. Mbela owa kala nale u shii kombinga yaasho? — 

Natu diladile moule shi na sha naasho. Mbela Jesus okwa li a hala okutya kutya omunhu oo ta pewa oshali ita ka kala a hafa? —  Ahowe, hasho a li a hala okutya ngaho. Mbela oho kala  wa hafa ngeenge wa pewa oshali? —  Atusheni ohatu kala twa hafa ngeenge twa pewa oshali iwa.

Ndele Jesus okwa ti kutya ohashi kala shihafifa neenghono ngeenge hatu yandje eeshali kuvamwe shi dulife okupewa eeshali. Mbela olyelye to diladila kutya okwa yandja oinima ihapu kovanhu e dule keshe umwe? —  Heeno, oJehova Kalunga.

Ombibeli otai ti kutya Kalunga oha “yandjele ovanhu aveshe omwenyo nomufudo noinima aishe.” Ohe tu lokifile odula okudja meulu nohe tu pitifile yo etango laye, opo omiti di kule, notu dule okumona oikulya. (Oilonga 14:17; 17:25) Onghee hano, itashi kumwifa eshi Ombibeli tai ti kutya Jehova ‘oKalunga omunelao’! (1 Timoteus 1:11, OB-1954) Kalunga oha hafele okuyandja oinima kuvamwe. Nafye ohatu ka kala twa hafa ngeenge otwa kala hatu yandje.

Mbela oshike osho hatu dulu okupa vamwe? Oto ti ngahelipi? —  Omafimbo amwe eeshali ohadi kala di na ondilo. Ngeenge oshali oyo wa hala okuyandja kuumwe otai di kofitola ou na oku i futa. Onghee hano, ngeenge owa hala okupa umwe oshali ya dja kofitola, ou na okwoongela oimaliwa fiyo osheshi ya wana opo u ka lande oshali oyo.

Ndele haeshali adishe hadi di kofitola. Pashihopaenenwa, ngeenge oku na oupyu efiku olo, okakopi komeva matalala oha ka talaleke omunhu shili. Onghee hano, ngeenge owa pe omunhu oo a fya enota omeva matalala, oto ka mona ehafo olo hali di mokuyandja.

Efiku limwe, otashi dulika meme woye e ku kwafele mu teleke omungome. Otashi ka kala shihafifa okuteleka omungome pamwe nameme woye. Ndele mbela otashi ke ku etela ngoo ehafo linene ngeenge owa li omungome oo oove auke? —  Heeno, oto dulu okupa ko umwe womookaume koye komungome oo shi li oshali. Mbela ino hala okuninga ngaho efiku limwe? — 

Omuhongi Munene nosho yo ovayapostoli vaye ova li ve shi shii kutya  okuyandja oku na elao. Mbela ou shi shii kutya ova li va pa ovanhu shike? — Okwa li ve va po oshinima osho sha denga mbada kuhe na vali. Ova li ve shii oshili kombinga yaKalunga, nova li hava lombwele vamwe kombinga yonghundana iwa nehafo. Ova li have shi ningi nopehe na okupula vamwe ve va pe oimaliwa omolwoilonga oyo va li tava longo.

Efiku limwe, omuyapostoli Paulus nakaume kaye, omuhongwa Lukas, ova li va shakena nomukainhu oo a li a hala okumona ehafo olo hali di mokuyandja. Ova li va shakena naye pomulonga wonhumba. Paulus naLukas ova li va ya komulonga oo, molwaashi ova li va uda kutya oyo onhele yokwiilikanena. Eshi va fika pomulonga oo, ova li va hanga po ovakainhu vamwe ovo va li tava ilikana.

Paulus okwa li a hovela okulombwela ovakainhu ovo onghundana iwa kombinga yaJehova Kalunga nosho yo yOuhamba waYe. Umwe womovakainhu ovo okwa li Lidia, nokwa li ta pwilikine nawa kwaasho Paulus a li ta popi. Konima yefimbo, Lidia okwa li a hala okuningila sha Paulus osho sha li tashi ka ulika kutya okwa li a hokwa shili onghundana iwa oyo a li a udifilwa. Onghee hano, okwa li a indila Paulus naLukas a ti: “Onye ngenge tamu tale nge onda itavela Omwene, ileni hano meumbo lange nye mu kale mo.” Lidia okwa li e va ladipika ve uye meumbo laye. — Oilonga 16:13-15.

Lidia okwa li a hafa eshi ovapiya ovo vaKalunga va li ve uya meumbo laye. Okwa li e va hole molwaashi ova li ve mu kwafela e lihonge kombinga yaJehova naJesus nosho yo shi na sha nanghee ovanhu tava dulu oku ka kala nomwenyo waalushe. Lidia okwa li a hafa eshi a li a pa Paulus naLukas oikulya nosho yo onhele yokutulumukwa. Onghee hano, Lidia okwa li a mona elao mokuyandja molwaashi okwa li a hala okuyandja kuvamwe tashi di komutima shili. Osho osho oshinima shimwe osho tu na okukaleka momadiladilo. Otashi dulika pa kale umwe oo te tu lombwele kutya otu na okuyandja oshali komunhu wonhumba. Ndele ngeenge inatu hala shili okuyandja oshali komunhu oo, itatu ka kala shili twa hafa okuyandja oshali oyo.

Pashihopaenenwa, ongahelipi ngeenge ou na ouleke vonhumba ovo wa hala okulya? Ngeenge onde ku lombwele kutya yandja po vamwe kokaana kamwe, oto ka kala ngoo wa hala oku ka pa? —  Ndele mbela ongahelipi ngeenge ou na ouleke vonhumba ndele to shakene nakaume koye umwe oo u hole neenghono? Ndele mbela ongahelipi ngeenge oove mwene wa tokola  kutya oto ka pamo kaume koye mouleke voye, mbela osho itashi ke ku hafifa? — 

Omafimbo amwe ohatu kala tu hole omunhu wonhumba neenghono nohatu kala twa hala oku mu pa keshe osho tu na. Osho osho naanaa tu na okukala hatu ningi ngaho shi na sha naKalunga, eshi ohole yetu yoku mu hola tai ningi yomoule.

Omuhongi Munene okwa li e shii omukainhu umwe ohepele oo a li e udite ngaho. Okwa li e mu mona motembeli muJerusalem. Omukainhu oo okwa li ashike e na oumaliwa vavali vanini, ndele okwa li a tula oumaliwa ovo moshikefa shomayambidido ile oshali kotembeli. Kape na oo a li e mu lombwela nokutya na yambidide oumaliwa ovo. Ovanhu vahapu ovo va li motembeli kava li nokuli ve shii osho a ninga. Omukainhu oo okwa li a yandja omayambidido, molwaashi okwa li e na ehalo loku shi ninga nokwa li e hole Jehova shili. Osha li she mu etela ehafo eshi a li a yandja oumaliwa ovo. — Lukas 21:1-4.

Ope na eenghedi di lili noku lili omo hatu dulu okuyandja kuvamwe. Mbela ou shii eenghedi donhumba omo hatu dulu oku shi ninga? —  Ngeenge otwa kala hatu yandje tashi di komutima, ohatu ka kala twa hafa. Nomolwaasho Omuhongi Munene e tu lombwela a ti: “Yandjeni.” (Lukas 6:38) Ngeenge otwa kala hatu ningi ngaho, ohatu ka hafifa ovanhu vakwetu, nohatu ka kala tu na ehafo linene.