OMAFIMBO amwe Jehova oha ningi oinima monghedi ikumwifi opo a amene ounona nosho yo ovo itava dulu okulikwafa vo vene. Ngeenge owa i moluxwa, otashi dulika u ka mone onghedi imwe omo Jehova he shi ningi. Ndele tete otashi dulika u kale uhe udite ko osho tashi ningwa po lela.

Otashi dulika u mone okadila ka nambela pedu popepi naave. Okadila oko otashi dulika ka kale ka fa ka mona oshiponga, taka kokolola omavava ako notaka faduka po eshi to kendabala okweehena popepi nako. Ngeenge owe ka landula, otaka i ashike ka yuka komesho. Opo nee ombadilila, okadila oko oto ka mona ka tuka po ka ya. Mboli omavava ako inaa mona oshiponga nandenande. Mbela ou shi shii kutya okadila oko oka li taka ningi shike?  — 

Popepi naapo wa li eshi okadila oko ka li ka nambela pedu, ope na oudilona vako va holekwa moixwa. Okadila oko oka li ka tila kutya pamwe oto mono oudilona vako ndele to va monifa oshiponga. Onghee hano, okadila oko oka li take liningifa ka fa ka mona oshiponga ndele take ku twala kokule noudilona vako. Mbela ou shi shii kutya olyelye ta dulu oku tu amena ngaashi okadila oko ka li ka amena oudilona vako? —  Ombibeli oya faafanifa Jehova nokadila kamwe haka ifanwa onhwa, oko haka kwafele oudilona vako. — Deuteronomion 32:11, 12.

 Okaana kaJehova ke na ondilo neenghono oko Omona waye omuholike Jesus. Eshi Jesus a li meulu fimbo a li ine uya kombada yedu, okwa li omunhu wopamhepo omunaenghono ngaashi Xe. Okwa li ta dulu okulifila oshisho ye mwene. Ndele eshi a li a dalwa e li okahanana kombada yedu, ka li ta dulu okulikwafa ye mwene, nomolwaasho okwa li a pumbwa okwaamenwa.

Jesus okwa li e na okukula nokuninga omukulunhu a wanenena opo a wanife po ehalo laKalunga olo a li e mu tumina kombada yedu. Ndele Satana okwa li a kendabala okudipaa Jesus fimbo a li okaana. Ope na ehokololo litunhula li na sha nanghee Jehova a li a amena Jesus. Mbela owa hala okuuda kombinga yalo?  — 

Konima eshi Jesus a dalwa, Satana okwa li a etifa po oshinima sha fa onyofi oyo ya li keulu koilongo yokOushilo. Ovanongo veenyofi ova li va landula onyofi oyo oshinano sheekilometa omafele fiyo okuJerusalem. Eshi va li va fika muJerusalem ova li va pula kutya okaana oko ka li taka ka ninga ohamba yOvajuda oka dalelwa peni. Eshi ovanhu ovo va li ve shii Ombibeli osho ya ti shi na sha naasho va li va pulwa kombinga yaasho, ova li va nyamukula va ti: “OmuBetlehem.” — Mateus 2:1-6.

 Eshi Herodes ohamba ikolokoshi yomuJerusalem ya li ya uda shi na sha nohamba ipe oyo opo ya li ya dalwa moshilando shopoushiinda Betlehem, oya li ya lombwela ovanongo veenyofi ya ti: ‘Indeni nye mu ka konge okaana; ndele ngeenge mwe ka mono, lombweleni nge.’ Mbela ou shi shii kutya omolwashike Herodes a li a hala okushiiva kutya Jesus oku li peni? — Omolwaashi Herodes okwa li a twa ondubo nokwa li a hala okudipaa Jesus.

Mbela Kalunga okwa li a amena ngahelipi Omona waye? —  Eshi ovanongo veenyofi va li va mona Jesus, ova li ve mu pa eeshali. Konima yefimbo, Kalunga okwa li a londwela ovanongo veenyofi okupitila mondjodi vaha shune kuHerodes. Onghee hano, ovanongo veenyofi ova li va ya nondjila imwe i lili eshi va shuna keumbo ndele inava shuna ko kuJerusalem. Eshi Herodes a li a mona kutya ovanongo veenyofi ova shuna, okwa li a handuka neenghono. Opo nee okwa li a kendabala okudipaifa Jesus, mokudipaifa ounona aveshe voumati muBetlehem ovo va li ve li koshi yomido mbali. Ndele pefimbo opo Jesus okwa hangwa a dja mo muBetlehem.

Mbela ou shi shii kutya Jesus okwa li a xupifwa ngahelipi? —  Konima eshi ovanongo veenyofi va li va shuna keumbo, Jehova okwa li a londwela omushamane waMaria, Josef, kutya nava ye onhapo kuEgipti, na Jesus okwa li a amenwa kohamba ikolokoshi Herodes. Omido donhumba konima yaasho, eshi Maria naJosef va li va aluka kuEgipti naJesus, Kalunga okwa li a londwela vali Josef. Okwa li e mu londwela okupitila mondjodi opo a tembukile kuNasaret, oko Jesus ta ka kala meameno. — Mateus 2:7-23.

Mbela paife ou wete nghee Jehova a li a amena Omona waye? — Mbela oto ti olyelye a fa oudilona ovo hava kala va holekwa kooina moixwa ile a fa Jesus eshi a li okaana kanini? Mbela ino va fa? —  Ope na ovanhu ovo va hala oku ku etela oshiponga. Mbela ou shi shii kutya ovo oolyelye?  — 

 Ombibeli otai ti kutya Satana okwa fa onghoshi tai kumbu oyo ya hala oku tu lya po. Ndele ngaashi ashike onghoshi hai li po luhapu ounimwena, Satana neendemoni daye navo ohava ponokele luhapu ounona. (1 Petrus 5:8) Ndele nande ongaho, Jehova oku na eenghono e dule Satana. Jehova ota dulu okwaamena ounona ile a kufe po owii oo Satana he va ningile.

Mbela oto dimbuluka osho Ondiaboli neendemoni dayo hai kendabala oku tu ningifa ngaashi twa mona mEtukulwa 10 lembo eli? —  Heeno, ohava kendabala oku tu ningifa tu ye momilele odo inadi hokiwa kuKalunga. Oolyelye ashike ve na okuya momilele? —  Ovanhu ashike vavali va kula, omulumenhu nomukainhu, ndele ove na okukala va hombola.

Ndele shinyikifa oluhodi, ovakulunhu vamwe ove hole okuya momilele nounona. Ngeenge ova ningi ngaho, oumati noukadona otashi dulika va hovele okulonga oilonga ii oyo ve lihonga kovakulunhu va tya ngaho. Ounona navo ohava hovele okulongifa oilyo yavo yoludalo monghedi ya puka. Osho osho sha li sha ningwa po mefimbo lonale muSodom. Ombibeli oya ti kutya ovanhu vomuSodom ‘ovanyasha novakulunhu,’ ova li va kendabala okunangala novalumenhu ovo va li ve uya okutalela po Lot. — Genesis 19:4, 5.

Onghee hano, ngaashi ashike Jesus a li a pumbwa okwaamenwa, naave owa pumbwa okwaamenwa kovakulunhu nokounona nokuli ovo tashi dulika va kale tava kendabala okuya naave momilele. Luhapu, ovanhu va tya ngaho ohave liningifa va fa ookaume koye. Otashi dulika nokuli va kale va hala oku ku pa oshinima shonhumba ngeenge owe va udanekele kutya ito ka lombwela ovanhu vamwe osho va hala oku ku ninga. Ndele ovanhu va tya ngaho ove lihole vo vene, nova hala ashike okulihafifa, ngaashi ashike Satana neendemoni daye. Ovanhu va tya ngaho ohava kendabala okulihafifa mokuya momilele nounona, noshinima sha tya ngaho osha puka neenghono.

Mbela ou shi shii kutya ovanhu va tya ngaho otashi dulika va ninge po shike opo ve lihafife? —  Otashi dulika va kendabale okufengafenga oilyo yoye yoludalo ile va fengafengife oilyo yavo yoludalo kwaayo yoye. Ndele ino efa nandenande omunhu wonhumba e ku danene koulumenhu woye  ile poukainhu woye. Ino efa nokuli omumwaina woye womumati ile wokakadona ile meme woye ile tate woye e ku danene koilyo yoye yoludalo. Oilyo yoye yoludalo oyopaumwene.

Ongahelipi to dulu okwaamena olutu loye kovanhu ovo hava longo oilonga ii ya tya ngaho? —  Ino efa nandenande omunhu wonhumba e ku danene koilyo yoye yoludalo. Ngeenge omunhu wonhumba okwa kendabala okuninga ngaho, mu lombwela nondaka yomokule to popi nomufindo to ti: “Ino kuma nge! Ohandi ke shi tonga ko!” Ngeenge omunhu a tya ngaho okwa ti kutya oove u na ondjo omolwaasho sha ningwa po, ino shi itavela molwaashi kashi fi shoshili. Dja po puye ndele to ka lombwela umwe kombinga yaasho, kashi na nee mbudi kutya omunhu oo a li ta ningi ngaho oshike shoye. Ou na oku mu lopota nonande okwe ku lombwele kutya osho mwa li tamu ningi naye oshiholekwa. Ou na okudja po puye ndele to ke mu lopota, nonande okwe ku udanekele oku ku pa oinima iwa ile e ku tilife.

Ino kala wa tila, ndele owa pumbwa okukala wa lungama. Ngeenge ovadali voye ove ku londwele kombinga yovanhu vonhumba ile eenhele donhumba odo da nyika oshiponga, owa pumbwa okupwilikina kuvo. Ngeenge owa ningi ngaho, oto ka henuka ovanhu ovakolokoshi ovo tava dulu oku ku etela oshiponga.