MBELA olyelye a li ha kala a hafa eshi Saulus a li ha longo owii? — Satana Ondiaboli oye a li ha kala a hafa. Ovawiliki velongelokalunga lOshijuda navo ova li yo hava kala va hafa. Opo nee eshi Saulus a li a ninga omuhongwa wOmuhongi Munene ndele ta hovele okukala ha ifanwa Paulus, ovawiliki vomalongelokalunga ovo ova li ve mu tonda. Mbela paife ou wete kutya omolwashike sha li shidjuu kovahongwa vaJesus okulonga ouwa? — 

Omupristeri omukulunhu wedina Ananias pomhito imwe okwa li a lombwela ovanhu va denge Paulus moshipala. Ananias okwa li yo a kendabala okutulifa Paulus modolongo. Paulus okwa li shili ha mono oixuna neenghono eshi a ninga omuhongwa waJesus. Pashihopaenenwa, ovanhu vamwe ovakolokoshi ova li va denga Paulus nova li va kendabala oku mu dipaa nomamanya makula. — Oilonga 23:1, 2; 2 Ovakorinto 11:24, 25.

Ovanhu vahapu otava ka kendabala yo oku tu ningifa tu longe oilonga oyo inai hokiwa kuKalunga. Onghee hano, diladila kombinga  yomapulo aa taa landula apa: Mbela ou hole ouwa shi fike peni? Mbela ou hole ouwa neenghono noto ka kendabala oku u longa nokuli nonande vamwe ova kale ve ku tonde eshi to longo ouwa? Otashi pula ouladi okuninga ngaho, hasho mbela? — 

Otashi dulika u lipule kutya: ‘Omolwashike ovanhu ve na okukala ve tu tonde molwaashi hatu longo ouwa? Mbela kave na ngeno okukala va hafa?’ Heeno, ova wana ngeno okukala va hafa. Luhapu ovanhu ova li ve hole Jesus omolwoilonga iwa oyo a li ha longo. Pomhito imwe, ovanhu aveshe moshilando ova li va ongala pomuvelo weumbo limwe omo mwa li Jesus. Ova li ve uya kuJesus molwaashi okwa li ta velula ovanaudu. — Markus 1:33.

 Omafimbo amwe, ovanhu kava li hava kala va hafela osho Jesus a li ta hongo. Nonande okwa li alushe ha longo osho sha yuka, vamwe ova li ve mu tonde neenghono molwaashi okwa li ha popi oshili. Osho osha li sha ningwa efiku limwe muNasaret, moshilando omo Jesus a kulila. Jesus okwa li a ya koshinagoga, konhele oko Ovajuda va li hava ka ongala opo va longele Kalunga.

Jesus okwa li a yandja oshipopiwa shiwa sha dja mOmishangwa fimbo a li moshinagoga. Tete ovanhu ova li ve shi hafela nova li va kuminwa eendjovo diwa odo a li ta popi. Osha li shidjuu kuvo okwiitavela kutya Jesus oo a kulila moshilando shavo oye ta popi eendjovo odo diwa.

Opo nee Jesus okwa li a popya kutya Kalunga okwa hokwa yo ovanhu ovo vehe fi Ovajuda. Eshi Jesus a popya oshinima osho, ovo va li moshinagoga ova li va handuka. Mbela ou shi shii kutya omolwashike va li va handuka? —  Omolwaashi ova li tava diladila kutya ovo ashike va li va hokiwa kuKalunga. Ova li hava diladila kutya ove dule ovanhu vakwao. Onghee hano, ova li va hovela okutonda Jesus omolweendjovo daye. Mbela ou shi shii kutya ova li va kendabala okuningila shike Jesus? — 

Ombibeli oya ti: ‘Ova ta mo Jesus moshilando, ndele ove mu twala komungenge womhunda oko oshilando shavo sha li sha tungilwa, ve ke mu undulile poshi. Ndele Ye okwa pita mokati kavo ndele okwa ya.’ — Lukas 4:16-30.

Ngeenge owa ningilwa oshinima sha tya ngaho, mbela oto ka shuna ko ngoo vali kovanhu ovo ndele to va lombwele kombinga yaKalunga? — Osho otashi pula ouladi, hasho mbela? —  Ndele konima yomudo umwe, Jesus okwa li a shuna kuNasaret. Ombibeli oya ti: ‘Okwe va longa moshinagoga yavo.’ Jesus ka li a efa po okupopya oshili molwaashi ngeno a tila ovanhu ovo va li vehe hole Kalunga. — Mateus 13:54.

Meshabata limwe, Jesus okwa li a ya koshinagoga oko kwa li ku na omulumenhu umwe e na eke la fya. Jesus okwa li a pewa eenghono kuKalunga opo a velule omulumenhu oo. Ndele ovanhu vamwe ovo va li moshinagoga ova li va kendabala okuningila Jesus owii. Mbela Omuhongi Munene okwa li a ninga po shike? —  Tete okwa li e va pula a ti: ‘Olyelye  mokati keni e na odi imwe aike, ndele tai wile moshilambo mefiku leshabata, ite i kwata ndee te i shili mo ngeno?’

Ova li tava ka kufa mo odi yavo melambo, nonande omefiku lEshabata omo va li ve na ngeno okufuda po. Onghee hano, Jesus okwa li e va lombwela a ti: ‘Hano oshi li xwepo okukwafela omunhu mEshabata, molwaashi omunhu oku dule odi neenghono.’ Hano osha yela kutya Jesus okwa li ta dulu okukwafela omulumenhu oo moku mu velula.

Jesus okwa li a lombwela omulumenhu oo a yukililife eke laye. Diva, omulumenhu oo okwa li a veluka. Omulumenhu oo ka li tuu a hafa! Ndele ongahelipi shi na sha novanhu vamwe ovo va li po? Mbela ova li ngoo va hafa? —  Ahowe, kava li va hafa. Ova li va tonda Jesus neenghono nokuli. Onghee hano, ova li va ya pondje ndele tava pangele omhangela va dipae Jesus. — Mateus 12:9-14.

Nokunena onghalo osho i li ngaho. Nonande otu longe oilonga iwa ihapu, itatu dulu okuhafifa ovanhu aveshe. Onghee hano, otu na okukala twa tokola kutya otwa hala lela okuhafifa lyelye. Ngeenge otwa hala okuhafifa Jehova Kalunga nosho yo Omona waye Jesus Kristus, otu na alushe okulonga osho tava hongo. Ndele ngeenge otwa ningi ngaho, mbela olyelye te ke tu tonda? Olyelye te ke shi ninga shidjuu kufye okulonga ouwa? — 

Satana Ondiaboli oye te ke tu tonda. Ndele mbela oolyelye vali tave ke tu tonda? —  Ovanhu ovo va pukifwa kOndiaboli va itavele oinima ya puka. Jesus okwa li a lombwela ovawiliki vomalongelokalunga vopefimbo laye a ti: “Nye omu na xo yeni, Satana, ndele ouhalu waxo yeni mwa hala oku u wanifa.” — Johannes 8:44.

Ope na ovanhu vahapu ovo ve holike kOndiaboli. Jesus okwa ti kutya ovanhu va tya ngaho ovo “ounyuni.” Mbela Jesus okwa li ta popi kombinga yashike eshi a popya “ounyuni”? —  Natu pandje kuJohannes 15:19, tu tale. Eendjovo odo daJesus otadi ti: “Ngeno onye vomounyuni, ngeno ounyuni u hole ovakwao, ndelenee eshi mu he fi vomounyuni, Ame eshi nde mu hoolola mo mounyuni, onghee ounyuni tau mu tondo.”

Hano ounyuni oo u tonde ovahongwa vaJesus oo ovanhu ovo vehe fi  ovashikuli vaye. Mbela omolwashike ounyuni u tonde ovahongwa vaJesus? —  Diladila shi na sha naasho. Olyelye omupangeli wounyuni ou? — Ombibeli oya ti: ‘Ounyuni aushe ou li mepangelo lomunawii.’ Omunawii oo oSatana Ondiaboli. — 1 Johannes 5:19.

Mbela paife ou wete kutya omolwashike hashi kala shidjuu neenghono okulonga ouwa? —  Satana nounyuni waye ohave shi ningi shidjuu neenghono. Ndele ope na vali etomheno limwe kutya omolwashike hashi kala shidjuu okulonga ouwa. Mbela oto dimbuluka etomheno olo? — MEtukulwa eti-23 lembo eli, otwe lihonga kutya atusheni otwa fyuulula oulunde. Itashi ka kala mbela shiwa ngeenge oulunde, Ondiaboli nosho yo ounyuni wayo oya kala ihe po vali? —

Ombibeli oya udaneka ya ti: “Ounyuni otau xulu po.” Osho osha hala okutya, ovanhu aveshe ovo vehe fi ovashikuli vOmuhongi Munene itava ka kala po vali. Itava ka efuwa va kale nomwenyo fiyo alushe. Mbela ou shi shii kutya oolyelye tava ka kala nomwenyo fiyo alushe? —  Ombibeli oya ti: “Ou ta longo ehalo laKalunga, oye ta kala alushe.” (1 Johannes 2:17) Ovo hava longo ouwa, sha hala okutya, hava “longo ehalo laKalunga,” otava ka kala fiyo alushe mounyuni mupe waKalunga. Onghee hano, otwa hala okukala hatu longo ouwa nonande oshidjuu, hasho mbela? —