OMUSHAMANE nomukulukadi ohava kufa ombinga mokudalwa kwokaana. Ngeenge omushamane nomukulukadi va i momilele, omukulukadi oha ningi eteelelo. Ndele ovanhu kave shii naanaa kutya ei olo ngeenge la fimbapala ohali kulu ngahelipi moshidalelo shaina ndele tali ningi okaana. Onghee hano, itashi kumwifa eshi ovanhu hava tale ko okudala ounona ku li oshikumwifilonga.

Ndele okudala ounona oku li ashike ehovelo loshinakuwanifwa shovadali. Ngeenge okaana opo ka dalwa, ohaka kala ke likolelela filufilu kovadali vako, ndele ngeenge taka kulu, ohaka kala ka pumbwa efiloshisho lihapu lihe fi ashike olo lopalutu. Ohaka kala ka pumbwa okukwafelwa opo ka kule pamadiladilo, pamaliudo, paenghedi nosho yo pamhepo.

Opo ounona va kule nawa, ova pumbwa okuulikilwa ohole unene tuu kovadali vavo. Ndele nonande osha fimana kovadali okulombwela ounona vavo kutya ove va hole, ove na yo oku shi ulika okupitila moilonga. Ounona ova pumbwa okutulilwa po oshihopaenenwa shiwa kovadali vavo. Ova pumbwa ewiliko lopaenghedi, sha hala okutya, omafinamhango oo ve na okudulika kuo, noinima ya tya ngaho ove i pumbwa okudja kouhanana wavo fiyo va kula. Ohapa holoka oinima inyikifa oluhodi ngeenge ounona inava kwafelwa fimbo vanini.

MOmbibeli omo amuke mu na omafinamhango a denga mbada oo taa dulu okulongifwa. Ehongo olo le likolelela kOmbibeli ohali eta omauwa e likalekelwa. Ehongo lOmbibeli ohali kwafele ounona va mone kutya osho tava lombwelwa kashi fi eendjovo dovanhu, ndele eendjovo dOmushiti wavo, Xe yavo womeulu. Kungaho, omayele oo ovadali tava pe ovana vavo ohaa kala e na ekanghameno notaa ti sha.

Ombibeli otai ladipike ovadali va findile omafinamhango a yuka momadiladilo ounona vavo. Ndele ngeenge ounona tava kulu, ovadali luhapu ohava mono shidjuu okupopya navo kombinga yoinima oyo ya fimanenena. Embo eli: Lihonga kOmuhongi Munene, ola nuninwa okukwafela ovadali opo paha holoke onghalo  ya tya ngaho. Otali ke mu pa ouyelele wopamhepo oo tamu dulu okulesha pamwe nounona veni. Kakele kaasho, embo eli otali ka kwafela yo ounona va kale tava kundafana novadali vavo.

Oto ka mona kutya membo omu na omapulo onhumba taa wapalele oo e na okunyamukulwa kounona. Ngeenge tamu lesha ndele tamu fiki pulimwe lomomapulo oo, oto ka mona pa tulwa okadidiliko aka ( — ), haka ifanwa okadiladilifo. Ngeenge pe na okadiladilifo ka tya ngaho otashi dimbulukifa omudali kutya oku na okukanghama po nokuladipika okaana ka nyamukule epulo olo la pulwa. Ounona ove hole okukufa ombinga moinima oyo tai ningwa. Ngeenge okaana inaka pewa omhito ka kufe ombinga, otashi ke ka ningifa diva ka kale kehe na ohokwe.

Oshinima shimwe vali osho sha fimanenena oshosho kutya omapulo oo otae ke ku kwafela u shiive osho okaana taka diladila. Ashike okaana otashi dulika ka nyamukule omanyamukulo ehe li mondjila, ndele ouyelele oo wa landula omapulo owa nuninwa okukwafela okaana ka kale haka diladila monghedi ya yuka.

Embo eli oli na yo oshinima shimwe vali she likalekelwa, omafano e dule po 230. Pomafano mahapu ope na omapulo oo taa pula okaana ka nyamukule she likolelela kwaasho ke wete mefano ile osho ka lesha. Onghee hano, kundafana omafano oo pamwe nokaana. Omafano a tya ngaho otaa dulu okukala oshilongifo shiwa shokuhonga osho tashi divilike oilihongomwa ya fimana oyo tai hongwa.

Ngeenge okaana oka shiiva okulesha, ka ladipika ke ku leshele embo olo nosho yo ke lileshele ko vene. Ngeenge okaana oka lesha embo eli lwoikando, otashi ka findila omayele mawa oo e li mo momadiladilo ako nosho yo momutima wako. Ndele opo u pameke ekwatafano lopahole olo li li pokati koye nokaana koye nosho yo okukala mwa fimanekafana, kendabaleni mu leshe embo eli pamwe, notamu shi ningi ondjikilile.

Kunena, ounona oshi na oupu va nwefwe mo koinima ya nyika oluhaelo, oumhulile nosho yo eenghedi dikwao inadi koshoka, oinima oyo ya li ya pumba meedula omilongo opo da piti. Onghee hano, ova pumbwa eameno, nembo eli otali yandje ouyelele tau kwafa monghedi i shii okufimanekwa ndele ola popya oinima kondadalunde. Ndele nande ongaho, ounona ova pumbwa unene tuu okuhongwa kombinga yOdjo younongo aushe, Tate yetu womeulu, Jehova Kalunga. Jesus, Omuhongi Munene, okwa li ha hongo alushe ovanhu kombinga yaJehova Kalunga. Otwe lineekela kutya embo eli otali ke ku kwafela nosho yo oukwaneumbo weni opo mu vyule onghedi yeni yokukalamwenyo i kale tai hafifa Jehova, nomu ka mone omanangeko noupuna taa kalelele.