1, 2. Omolwashike tu na okukala twa lungama ngeenge hatu hoolola omalihafifo?

NATU tye nee ngeno owa hala okulya oshiimati ndele to mono kutya kombinga imwe okwa ola. Oto ka ninga po shike? Mbela oto ke shi lya po ashike? Mbela oto ke shi kupulashi? Ile oto ka teta ko ombinga oyo ya ola ndele to li oyo iwa?

² Omalihafifo otaa dulu okufaafanifwa noshiimati meenghedi da yoolokafana. Omalihafifo amwe omawa, ashike oitukulwa ihapu yomuo oya ola, oku shi popya  pafaneko, molwaashi okwa kwatela mo oluhaelo, elongifo leenghono ile oumhulile. Mbela ngeenge to hoolola omalihafifo oho ti: “Oshe likolelela kwaame mwene. Ohandi dulu okuhoolola omalihafifo oo nda hala.” Ile oho ti kutya: “Omalihafifo aeshe omai”? Ile oho hoolola omalihafifo oye pandunge, mokuhenuka oo mai nokuhafela oo mawa?

3. Oshike tu na okudiladila kombinga yasho ngeenge hatu hoolola omalihafifo?

³ Atusheni otwa pumbwa omalihafifo, notwa hala oku a hoolola pandunge. Ndele otwa pumbwa okulipula nghee omalihafifo oo hatu hoolola taa dulu okukuma onghedi yetu yokulongela Jehova.

4. Efinamhango limwe lOmbiibeli lilipi tali dulu oku tu kwafela tu hoolole omalihafifo pandunge?

⁴ Eshi twe liyapulila Jehova, otwe mu udanekela kutya ohatu ka longifa onghalamwenyo yetu opo tu mu longele. (Lesha Omuudifi 5:4.) Otwa udaneka kutya ‘ohatu ka ninga ashishe okufimanekifa Kalunga.’ (1 Ovakorinto 10:31) Osho osha hala okutya otwe liyapulila Kalunga nokuli nongeenge hatu fuda po ile hatu kufa ombinga momalihafifo, ndele hangeenge ashike tu li pokwoongala ile moilonga yomomapya.

5. Otu na okulongela Jehova monghedi ya tya ngahelipi?

⁵ Keshe osho hatu ningi monghalamwenyo ohashi kumu okulongela kwetu Jehova. Paulus okwe shi yelifa nawa eshi a ti: “Yandjeni omalutu eni eyambo liyapuki li nomwenyo, la wapalela Kalunga.” (Ovaroma 12:1) Jesus okwa ti: “Hola Omwene Kalunga koye nomutima woye aushe nomwenyo woye aushe neenghono doye adishe.” (Markus 12:30) Otwa hala alushe okupa Jehova osho sha  denga mbada. MuIsrael shonale, ngeenge ovanhu va li tava yandje omayambo oinamwenyo kuJehova, ova li va teelelwa va yandje oinamwenyo oyo i na oukolele. Ngeenge eyambo olo tava yandje kala li monghalo iwa, Jehova kali he li tambula ko. (Leviticus 22:18-20) Sha faafana, Jehova ota dulu okukala ina hokwa onghedi yetu yoku mu longela. Ngahelipi mbela?

6, 7. Omalihafifo oo hatu hoolola otaa dulu ngahelipi okukuma onghedi yetu yokulongela Jehova?

⁶ Jehova okwe tu lombwela a ti: “Kaleni ovayapuki, osheshi Aame omuyapuki.” (1 Petrus 1:14-16; 2 Petrus 3:11) Jehova ota ka kala a hokwa onghedi yetu yoku mu longela ngeenge otu li ovayapuki notwa koshoka. (Deuteronomion 15:21) Itatu dulu okulongela Jehova twa koshoka ngeenge ohatu ningi oinima oyo e tonde, ngaashi oinima oyo ya nyika oluhaelo, elongifo leenghono naayo i na ekwatafano noumhulile. (Ovaroma 6:12-14; 8:13) Natango, ngeenge ohatu lihafifa noinima oyo, itashi hafifa Jehova. Osho otashi dulu okuningifa okulongela kwetu Jehova ku kale inaku koshoka noinaku tambulwa ko kuye, notashi dulu okunyona po ekwatafano letu naye.

⁷ Ongahelipi hatu dulu okuhoolola omalihafifo pandunge? Omafinamhango elipi tae ke tu kwafela tu mone kutya oludi lomalihafifo elipi Jehova a hokwa naao ina hokwa?

8, 9. Otu na okuhenuka omalihafifo oludi lilipi? Omolwashike?

⁸ Kunena, oku na omaludi mahapu omalihafifo. Amwe otaa wapalele Ovakriste, ndele amwe itaa wapalele. Tete natu ka tale kutya oludi lilipi lomalihafifo tu na okuhenuka.

 ⁹ Eefilima, eenhele dokointaneta, eeprograma doko-TV, omaudano okokombiyuta nosho yo omaimbilo mahapu okwa kwatela mo oluhaelo, elongifo leenghono ile oumhulile. Oinima oyo ii luhapu ohai ulikwa ya fa inai nyika oshiponga, nohai ningifwa i kale ya fa ihafifa. Ashike Ovakriste ohava henuka omalihafifo oo ehe li metwokumwe nomifikamhango daJehova di na sha noukoshoki. (Oilonga 15:28, 29; 1 Ovakorinto 6:9, 10) Ngeenge otwa henuka omalihafifo a tya ngaho, ohatu ulikile Jehova kutya otu tonde osho shii. — Epsalme 34:14; Ovaroma 12:9.

10. Oshike tashi ka ningwa po ngeenge otwa hoolola omalihafifo a puka?

¹⁰ Vamwe ove udite kutya kape na sha sha puka shi na sha nomalihafifo oo a kwatela mo oluhaelo, elongifo leenghono ile oumhulile. Ohava ti: ‘Oshike sha puka shi na sha nao? Nghi na fiku ndi ka ninge oinima oyo.’ Ngeenge ohatu diladila ngaho, ohatu lifufya. Ombiibeli oya ti: “Omutima woovene ou nomakoto u dule ashishe nowa nyonauka.” (Jeremia 17:9) Ngeenge ohatu lihafifa noinima oyo Jehova ina hokwa, ongahelipi hatu dulu okutya otu tonde oinima oyo? Ngeenge ohatu lihafifa noinima oyo luhapu, ohatu ka hovela oku i tala ko ya fa inai nyika oshiponga. Mokweendela ko kwefimbo, eliudo letu otali ka nghundipala ndele tali kala ihali tu londwele vali ngeenge tu li pokuninga etokolo la puka. — Epsalme 119:70; 1 Timoteus 4:1, 2.

11. Ovagalati 6:7 otave tu kwafele ngahelipi tu kale hatu hoolola omalihafifo pandunge?

¹¹ Eendjovo daKalunga ode tu lombwela da ti: “Eshi omunhu te shi kunu, osho tuu te shi teya yo.” (Ovagalati 6:7) Osho otashi ulike kutya ngeenge otwa kala hatu lihafifa noinima ii, mokweendela ko kwefimbo ohatu ke i  ninga. Pashihopaenenwa, vamwe ova nwefwa mo neenghono komalihafifo a nyika oluhaelo, ndele navo tava i moluhaelo. Ashike Jehova okwe tu pa ekwafo olo twa pumbwa opo tu dule okuhoolola omalihafifo pandunge.

12. Oshike tashi tu kwafele tu kale hatu ningi omatokolo e li pandunge e na sha nomalihafifo?

¹² Omalihafifo amwe inaa hokiwa nandenande kuJehova, notu shii kutya otu na oku a henuka. Ndele mbela ongahelipi ngeenge katu shii naanaa kutya natu ninge shike? Jehova ine tu pa omusholondodo weemhango di na sha naasho tu na okuninga po nosho yo waasho tuhe na okutala, okupwilikina ile okulesha. Ponhele yaasho, okwa hala tu longife eliudo letu la deulwa kOmbiibeli. (Lesha Ovagalati 6:5.) Jehova okwe tu pa omafinamhango, sha hala okutya, eeshili da fimanenena odo tadi tu hongo nghee ha tale ko oinima. Omafinamhango oo ohae tu kwafele tu deule eliudo letu. Ohae tu kwafele tu shiive kutya “ehalo lOmwene olilipi” opo tu dule okuninga omatokolo oo tae mu hafifa. — Ovaefeso 5:17.

13. Omolwashike Ovakriste hava ningi omatokolo a yoolokafana e na sha nomalihafifo? Oshike osho Ovakriste aveshe ve na okuninga?

¹³ Luhapu, Ovakriste ihava kufa ombinga momalihafifo a faafana. Omolwashike mbela? Omolwaashi otu hole oinima ya yoolokafana. Natango, osho shi holike kuumwe hasho shi holike kumukwao. Ndele nande ongaho, Ovakriste aveshe ove na okuwilikwa komafinamhango Ombiibeli ngeenge tava ningi omatokolo. (Ovafilippi 1:9) Osho otashi ke tu kwafela tu hoolole omalihafifo oo a hokiwa kuKalunga. — Epsalme 119:11, 129; 1 Petrus 2:16.

14. (a) Omolwashike sha fimana okutala kutya ohatu longifa efimbo li fike peni momalihafifo? (b) Paulus okwa pa Ovakriste omayele elipi?

 ¹⁴ Otwa pumbwa yo okutala kutya ohatu longifa efimbo li fike peni momalihafifo. Osho otashi ka ulika kutya otwa tala ko ngahelipi omalihafifo. Tu li Ovakriste, okulongela Jehova osho oshinima sha fimanenena monghalamwenyo yetu. (Lesha Mateus 6:33.) Ndele nopehe na oku shi shiiva, oshi na oupu tu efe omalihafifo a mane po efimbo letu lihapu. Paulus okwa pa Ovakriste omayele a ti: “Litaleni hano nawa nhumbi hamu ende, hangaashi omalai, ndelenee ongaashi ovanaendunge; longifeni nawa efimbo.” (Ovaefeso 5:15, 16) Otu na okulitulila po omangabeko kutya ohatu ka longifa efimbo li fike peni momalihafifo nokukala alushe twa  pitifa komesho okulongela Kalunga monghalamwenyo yetu. — Ovafilippi 1:10.

15. Ongahelipi hatu dulu okuhenuka omalihafifo oo taa dulu okunyona po ekwatafano letu naJehova?

¹⁵ Otu na okuhenuka omalihafifo oo tu shii kutya inaa hokiwa kuJehova. Ndele mbela ongahelipi kombinga yomalihafifo oo twa limbililwa shi na sha nao? Mbela otwa pumbwa ngoo natango okukala twa lungama? Diladila kwaashi: Natu tye nee ngeno oto ende mondjila oyo ya enda komhunda, mbela oto ka kendabala okweenda komungenge? Hasho nandenande. Ngeenge owa fimaneka omwenyo woye, oto ka kendabala okukala kokule noshiponga. Osho osha faafana nokuhoolola omalihafifo. Eendjovo daKalunga ode tu lombwela kutya: “Omhadi yoye i kaleka kokule nowii.” (Omayeletumbulo 4:25-27) Onghee hano, ihatu henuka ashike omalihafifo oo tu shii kutya inaa koshoka, ashike ohatu henuka yo omalihafifo oo tu wete ita e tu wapalele notaa dulu okunyona po ekwatafano letu naJehova.

16. (a) Oinima imwe ilipi Jehova e tonde? (b) Ongahelipi hatu dulu okuulika kutya otu tonde osho Jehova e tonde?

¹⁶ Omupsalme umwe okwa ti: “Akutu onye ava, mu hole Omwene, tondeni owii!” (Epsalme 97:10) Ombiibeli otai tu hongo kombinga yanghee Jehova ha diladila nanghee ha kala e udite. Lipula kutya ongahelipi osho we lihonga tashi dulu oku ku kwafela u kale ho tale ko oinima ngaashi Jehova he i tale ko. Pashihopaenenwa, otwe lihonga kutya Jehova oku tonde “elaka li noipupulu, nomake taa tileshi ohonde ihe netimba, omutima tau diladila omauko mai, eemhadi tadi endelele okuninga owii.” (Omayeletumbulo 6:16-19) Otwe lihonga  kutya otu na okuhenuka ‘oluhaelo, oukalele woikalunga, oundudu, oukodi, ehandu, efupa, oukolwe, eenhingo naikwao ya fa ei.’ (Ovagalati 5:19-21) Mbela ou wete nghee omafinamhango Ombiibeli taa dulu oku ku kwafela u hoolole omalihafifo? Otwa hala okudulika komifikamhango daJehova meembinga adishe dokukalamwenyo kwetu, kutya nee otu li navamwe ile ongeenge tu li ofye atuke. (2 Ovakorinto 3:18) Omatokolo oo hatu ningi ngeenge tu li ofye atuke luhapu ohaa holola kutya otwa tya ngahelipi. — Epsalme 11:4; 16:8.

17. Fimbo inatu hoolola omalihafifo, omapulo elipi twa pumbwa okulipula?

¹⁷ Ngeenge to hoolola omalihafifo, lipula kutya: ‘Ongahelipi ehoololo lange tali ka kuma ekwatafano lange naJehova? Ongahelipi tali ka kuma eliudo lange?’ Natu ka konakoneni omafinamhango amwe vali oo taa dulu oku tu kwafela ngeenge hatu hoolola omalihafifo.

18, 19. (a) Omayele elipi Paulus a pa Ovakriste? (b) Omafinamhango elipi tae ke tu kwafela tu hoolole omalihafifo pandunge?

¹⁸ Ohatu yadifa omadiladilo etu noinima oyo hatu lihafifa nayo. Paulus okwa ti: “Ashishe osho shoshili, naasho sha fimana, naasho sha yuka, naasho sha koshoka, naasho shi holike, naasho shi netumbalo liwa, ongee onghedi iwa ile epandulo, ei aishe i diladileni.” (Ovafilippi 4:8) Ngeenge otwa yadifa omadiladilo etu noinima iwa, ohatu dulu okutya: “Eendjovo domokanya kange nomadilongo omomutima wange nae ku wapalele, Omwene.” — Epsalme 19:14.

¹⁹ Lipula kutya: ‘Ohandi yadifa omadiladilo ange nashike? Konima ngeenge nda tale ofilima ile oprograma yonhumba, mbela ohandi kala nda hafa nondi  udite omadiladilo ange a pepelelwa? Mbela ohandi kala ndi udite ombili nondi na eliudo la koshoka? (Ovaefeso 5:5; 1 Timoteus 1:5, 19) Ohandi kala ngoo ndi udite nda manguluka okwiilikana kuJehova? Ile ohandi kala ndi udite ondjo? Mbela omalihafifo ohaa diladilifa nge kombinga yelongifo leenghono ile oinima oyo ya nyika omilele? (Mateus 12:33; Markus 7:20-23) Mbela omalihafifo oo nda hoolola otaa ningifa nge ndi kale nda “faafana nounyuni ou”?’ (Ovaroma 12:2) Omanyamukulo etu e li paushili otaa dulu oku tu kwafela tu mone kutya oshike twa pumbwa okuninga opo tu kaleke po ekwatafano letu naJehova la kola. Otwa hala okwiilikana ngaashi omupsalme oo a ti: “Omesho ange a alula ko, aha tale koinima yongaho.” * — Epsalme 119:37.

20, 21. Omolwashike tu na okukaleka momadiladilo omaliudo avamwe ngeenge hatu hoolola omalihafifo?

²⁰ Otwa pumbwa okukaleka momadiladilo efinamhango limwe la fimana olo tali ti: “Aishe ohai ningwa, ndele haaishe tai tungu. Inapa kala ou ta kongo ouwa waye mwene, ndelenee keshe umwe na konge ouwa wamukwao.” (1 Ovakorinto 10:23, 24) Okukala tu na emanguluko lokuninga oshinima shonhumba inashi hala okutya otu na oku shi ninga. Otu na okudiladila nawa kutya omatokolo oo hatu ningi otaa ka kuma ngahelipi ovamwatate novamwameme.

²¹ Otu na omaliudo a yoolokafana. Pashihopaenenwa,  otashi dulika eliudo loye li ku pitike u tale oprograma yonhumba ko-TV. Ashike owa ka didilika kutya oprograma oyo tuu oyo ohai nyenyetele eliudo lomumwatate ile lomumwameme wonhumba. Mbela oto ka ninga po shike? Nonande ou na oufemba woku i tala, oto dulu okutokola uhe i tale. Omolwashike? Omolwaashi ino hala ‘okunyona kovamwaxo’ ile nokuli ‘okunyona kuKristus.’ (1 Ovakorinto 8:12) Inatu hala okuninga sha osho tashi dulu okupundukifa Ovakriste vakwetu. — Ovaroma 14:1; 15:1; 1 Ovakorinto 10:32.

22. Ongahelipi hatu dulu okuulika kutya otu na ondjele ngeenge tashi uya komatokolo oo a ningwa kOvakriste vakwetu?

²² Mepingafano naasho, ongahelipi ngeenge eliudo loye itali ku pitike u tale, u leshe ile u ninge sha osho umwe e wete inashi puka? Molwaashi ou hole omumwaxo nowa fimaneka eliudo laye, ito ke mu fininika a ninge etokolo la fa loye. Pashihopaenenwa, omunhu oo ta shingi otuwa oku shii kutya vamwe otava dulu okushingilila ile okushinga kanini ve mu dule, ashike natango ove li ovashingi vawa. Sha faafana, atusheni ohatu dulika komafinamhango Ombiibeli, ashike ohatu kala tu na omataleko a yoolokafana ngeenge tashi uya pokuhoolola omalihafifo oo taa wapalele. — Omuudifi 7:16; Ovafilippi 4:5.

23. Oshike tashi ke tu kwafela tu hoolole omalihafifo pandunge?

²³ Mbela oshike tashi dulu oku tu kwafela tu hoolole omalihafifo pandunge? Ngeenge otwa kala hatu longifa nawa eliudo letu la deulwa komafinamhango Ombiibeli notu na ko nasha shili novamwatate novamwameme, ohatu ka ninga omatokolo e li pandunge. Ohatu ka kala yo twa hafa molwaashi otu shii kutya ohatu ningi ‘ashishe okufimanekifa Kalunga.’