1, 2. Oshike twa pumbwa okushiiva kombinga yaSatana neendemoni daye?

ONGHALAMWENYO mounyuni mupe waJehova otai ka kala iwa. Ohatu ka kala ngaashi Jehova a li a hala tu kale. Ashike paife otu li mounyuni oo tau pangelwa kuSatana neendemoni daye. (2 Ovakorinto 4:4) Nokuli nonande ihatu va mono, oko ve li nove na eenghono dinene.

² Metukulwa eli, ohatu ka kundafana nghee hatu dulu okukala popepi naJehova nokuliamena kuSatana. Jehova okwa udaneka kutya ote ke tu kwafela. Ashike otwa pumbwa okushiiva eenghedi odo Satana neendemoni daye hava longifa opo ve tu yule noku tu ponokela.

3. Ondiaboli oya hala tu ninge shike?

³ Satana okwa ti kutya ovanhu ohava longele ashike Jehova omolwomatomheno okulihola mwene notava ka efa po oku mu longela ngeenge ova hangwa komaupyakadi. (Lesha Job 2:4, 5.) Ngeenge umwe okwa ulike kutya okwa hala okulihonga kombinga yaJehova, Satana neendemoni daye ohave shi didilike mo nohava kendabala oku mu kangheka. Ohava kala va handuka ngeenge omunhu e liyapulila Jehova ndele ta ninginifwa. Ombiibeli oya faafanifa Ondiaboli ‘nonghoshi tai kumbu, notai kongo ou tai xwake po.’ (1 Petrus 5:8) Satana okwa hala okunyona po  ekwatafano letu naJehova. — Epsalme 7:1, 2; 2 Timoteus 3:12.

4, 5. (a) Oshike osho Satana ita dulu okuninga? (b) ‘Okukondjifa Satana’ osha hala okutya shike?

⁴ Inatu tu pumbwa okukala twa tila Satana neendemoni daye. Jehova okwa ngabeka osho tava dulu oku tu ningila. Jehova okwa udaneka kutya “ongudu inene” yOvakriste vashili otai ka xupa “momahepeko manene” ile tu tye poudjuu munene. (Ehololo 7:9, 14) Kape na osho Ondiaboli tai dulu okuninga i ye moshipala oshinima osho, molwaashi Jehova ota amene oshiwana shaye.

 ⁵ Ngeenge otwa kala popepi naJehova, Satana ita ka dula okunyona po ekwatafano letu naJehova. Eendjovo daKalunga oda ti: “Omwene ota kala pamwe nanye, ngeenge tamu kala pamwe naye.” (2 Omafimbo 15:2; lesha 1 Ovakorinto 10:13.) Ovalumenhu novakainhu ovadiinini vonale vahapu, ngaashi Abel, Henok, Noa, Sara naMoses, ova li va kondjifa Ondiaboli mokukala popepi naJehova. (Ovaheberi 11:4-40) Nafye ohatu dulu okuninga sha faafana. Eendjovo daKalunga oda udaneka da ti: “Kondjifeni Satana, ndele ye te mu i onhapo.” — Jakob 4:7.

6. Satana ohe tu ponokele ngahelipi?

⁶ Nonande Satana oku shii kutya Jehova okwa ngabeka osho ta dulu oku tu ningila, natango oha kendabala keshe osho ta dulu opo a nghundipaleke ekwatafano letu naJehova. Kunena, Ondiaboli ohai tu ponokele meenghedi di lili noku lili nohai longifa oinheya ngaashi oyo ya longifile eedula omayovi da pita. Ohai longifa oinheya imwe ilipi?

7. Omolwashike Satana ha ponokele oshiwana shaJehova?

⁷ Omuyapostoli Johannes okwa ti: ‘Ounyuni aushe ou li mepangelo lomunawii.’ (1 Johannes 5:19) Satana oye ta pangele ounyuni ou woukolokoshi nokwa hala yo okupangela oshiwana shaJehova. (Mika 4:1; Johannes 15:19; Ehololo 12:12, 17) Ondiaboli oi shii kutya oi na ko okafimbo kaxupi nomolwaasho otai tu fininike neenghono opo tu efe po oudiinini wetu kuKalunga. Omafimbo amwe Ondiaboli ohai tu ponokele odikilila, ofimbo omafimbo amwe omonangumika.

8. Omukriste keshe okwa pumbwa okushiiva shike?

⁸ Ovaefeso 6:12 ova ti: ‘Ekondjo letu olo okukondjifa eemhepo dowii mevalelwa.’ Omukriste keshe oku na okukondjifa Ondiaboli neendemoni dayo. Otwa pumbwa  okushiiva kutya aveshe ovo ve liyapulila Jehova ove li molwoodi. Omuyapostoli Paulus okwa ladipika Ovakriste vokuEfeso lwoikando itatu monhumwafo oyo a li e va shangela a ti kutya nava ‘kale ofika’ ile tu tye nava kale va pama. — Ovaefeso 6:11, 13, 14.

9. Satana neendemoni daye otava kendabala oku tu ningila shike?

⁹ Satana neendemoni daye otava kendabala oku tu pukifa meenghedi di lili noku lili. Ngeenge otwa pondola meyeleko limwe laSatana, inashi hala kutya ohatu ka pondola momayeleko aeshe. Ondiaboli ohai kendabala okushiiva omaunghundi etu opo i dule okuhoolola eemwiyo doku tu yula. Ashike inatu pumbwa okuyulwa molwaashi Ombiibeli oye tu honga kombinga yeemwiyo dOndiaboli. (2 Ovakorinto 2:11; tala omafatululo oitya pexulilo lembo, oshitwa 31.) Omwiyo umwe oo hai longifa oo oumhulile.

10. (a) Oumhulile oshike? (b) Jehova okwa tala ko ngahelipi oumhulile?

¹⁰ Oumhulile owa kwatela mo okulongifa eenghono di dule dopaushitwe odo hadi ningifa omunhu a kale e na ekwatafano neendemoni, ngaashi okunyanekela onakwiiwa, oulodi, okutikila ile okukendabala okupopya noonakufya. Jehova okwe tu lombwela kutya oumhulile ou li “oixuna” nonokutya itatu dulu okukufa ombinga moumhulile nopefimbo opo tuu opo ohatu longele Jehova. (Deuteronomion 18:10-12; Ehololo 21:8) Ovakriste ove na okuhenuka oinima aishe oyo i na ekwatafano noumhulile. — Ovaroma 12:9.

11. Okukala twa hokwa oinima ya nyika oumhulile otashi dulu otu ningifa tu ninge shike?

¹¹ Satana oku shii kutya ngeenge otwa kala twa hokwa oinima oyo ya nyika oumhulile, otashi ka kala shipu kuye  oku tu kokela moumhulile. Ngeenge otwa kufa ombinga moinima i na sha noumhulile, otashi ka nyona po ekwatafano letu naJehova.

12. Satana okwa hala okunwefa mo ngahelipi omadiladilo etu?

¹² Satana oha kendabala okungwangwaneka omadiladilo ovanhu. Oha kunu ovanhu omalimbililo fiyo va hovela okudiladila kutya “owii oo ouwa, nouwa oo owii.” (Jesaja 5:20) Ondiaboli otai xumifa komesho ediladilo olo kutya omayele Ombiibeli ihaa kwafa sha nonokutya ohatu ka kala twa hafa ngeenge otwa kala ihatu dulika komifikamhango daKalunga.

13. Ongahelipi Satana a li a kendabala okulimbililika vamwe?

¹³ Omwiyo umwe oo Satana ha longifa opo a pondole oo okutandaveleka omalimbililo. Okwa kala ta longifa onghedi oyo oule wefimbo lile. Moshikunino shaEden, Satana okwa li a kendabala okulimbililika Eva moku mu pula ta ti: ‘Kalunga okwa ti shili: Inamu lya komiti adishe domoshikunino?’ (Genesis 3:1) Lwanima, pefimbo laJob, Satana okwa li a pula Jehova moipafi yovaengeli a ti: “U shii Job ota tila Kalunga ongaho?” (Job 1:9) Konima eshi Jesus a ningifwa, Satana okwa li e mu yeleka a ti: “Oove ngeenge Omona waKalunga, lombwela hano omamanya aa a shituke omingome.” — Mateus 4:3.

14. Ongahelipi Satana ta dulu okupukifa ovanhu va diladile kutya oumhulile inau nyika oshiponga?

¹⁴ Kunena, Ondiaboli otai twikile okukuna ovanhu omalimbililo. Ohai kendabala okuningifa ovanhu va kale va limbililwa ngeenge oumhulile owa puka ngoo shili mokuningifa oinima imwe i na sha nao i monike ya fa inai nyika oshiponga. Nokuli nOvakriste vamwe ihava kala ve wete wa nyika oshiponga. (2 Ovakorinto 11:3) Ndele mbela oshike tu na okuninga po opo tu liamene?  Ongahelipi hatu dulu okushilipaleka kutya inatu nwefwa mo koinheya yaSatana? Natu ka konakoneni eenghedi mbali omo Satana ta dulu oku tu pukifa: omalihafifo nosho yo ouhaku.

15. Ongahelipi tashi dulika tu kufe ombinga moumhulile okupitila momalihafifo?

¹⁵ Kunena, eefilima dihapu, ouvidio, eeprograma doko-TV, omaudano okokombiyuta nosho yo eenhele dokointaneta, ohadi ulike oinima oyo i na ekwatafano neendemoni nosho yo noumhulile. Vahapu ova tala ko oinima oyo inai nyika oshiponga noihafifa, noihava mono kutya osha nyika oshiponga okweefa onghalamwenyo yavo i nwefwe mo keendemoni. Omunhu ota dulu okunwefwa mo keendemoni okupitila moinima ngaashi, okutala mokakola ile momukonda, okutongolola omifinda odo di li peke nosho yo okutengeneka osho tashi ka ningwa monakwiiwa. Ondiaboli ihai holola oinima oyo ya nyika oshiponga nohai kendabala oku i ningifa i kale ya fa itai dulu okushiivika, ikumwifi noiyolifa. Omunhu ota dulu nokuli okudiladila kutya inashi nyika oshiponga okutala oinima i na sha noumhulile, shimha ashike iha kufa ombinga moumhulile. Omolwashike okudiladila ngaho kwa nyika oshiponga? — 1 Ovakorinto 10:12.

16. Omolwashike tu na okuhenuka omalihafifo a kwatela mo oumhulile?

¹⁶ Satana neendemoni daye ihava dulu okushiiva osho hatu diladila. Ashike otava dulu okushiiva osho twa hala nonokutya ohatu diladila shike, she likolelela komatokolo oo hatu ningi paumwene nosho yo momaukwaneumbo, mwa kwatelwa ehoololo li na sha nomalihafifo. Ngeenge otwa hoolola eefilima, eengalo ile omambo e na sha novapopi  neemhepo, okutikila, okukala nekwatafano neendemoni, ovalodi, oilulu ile oinima ya yukila oko, Satana neendemoni daye otava ka mona kutya otwa hala oku i shiiva. Osho otashi ke va ningifa va kale va hala oku tu nwefa mo neenghono noumhulile. — Lesha Ovagalati 6:7.

17. Ongahelipi Satana ta dulu okulongifa ehalo letu lokukala noukolele?

¹⁷ Satana ota dulu yo okulongifa ehalo letu lokukala noukolele. Kunena, ovanhu vahapu kave na oukolele. Omunhu otashi dulika a kendabale omauhaku e lili noku lili ndele ita veluka. (Markus 5:25, 26) Otashi dulika nokuli a kale a lulilwa ndele ta kala a hala okukendabala keshe  shimwe. Ndele tu li Ovakriste, otu na okukala twa lungama opo tuha hoolole ouhaku wa kwatela mo ‘oumhulile.’ — Leviticus 19:26.

18. Omukriste oku na okuhenuka ouhaku woludi lilipi?

¹⁸ MuIsrael shonale, omwa li vamwe ovo va li hava longifa ‘oumhulile.’ Jehova okwa li e va lombwela a ti: “Ngeenge tamu yelula omaoko eni; nonande mu indile omaindilo mahapu, itandi a udu.” (Jesaja 1:15) Diladila ashike kutya Jehova ka li nokuli a pwilikina komailikano avo! Inatu hala okuninga sha osho tashi dulu okunyona po ekwatafano letu naJehova noku mu ningifa ehe tu kwafele, unene tuu ngeenge hatu vele. (Epsalme 41:3) Onghee hano, otu na okukonakona ngeenge ouhaku oo hatu diladila owa kwatela mo oumhulile ile hasho. (Mateus 6:13) Ngeenge otwa mono kutya otwa fa tu na ekwatafano noumhulile, otwa pumbwa oku u henuka. — Tala omafatululo oitya pexulilo lembo, oshitwa 32.

19. Ongahelipi Ondiaboli ya tilifa ovanhu vahapu?

¹⁹ Ovanhu vamwe ohava diladila kutya kaku na Ondiaboli nosho yo eendemoni, ofimbo vamwe ve shii kutya oko di li molwaashi ove na oimoniwa. Ovanhu vahapu ohava kala va tila eemhepo dowii nova pikwa koidila. Vamwe ohava tilifa ovanhu mokukala tava hokolola omahokololo e na sha noinima ii oyo eendemoni hadi ningile ovanhu. Luhapu ovanhu ohava kala va tunhukwa okuuda omahokololo oo nohava kala va hala oku a lombwela vamwe. Omahokololo a tya ngaho luhapu ohaa ningifa ovanhu va kale va tila Ondiaboli.

20. Ongahelipi hatu dulu okutandavelifa oipupulu yaSatana?

²⁰ Dimbuluka kutya Satana okwa hala ovanhu va kale ve mu tila. (2 Ovatessaloniki 2:9, 10) Omunaipupulu  noku shii okunwefa mo omadiladilo ovanhu ovo va nanenwa koinima ya nyika oumhulile noku va ningifa va itavele oinima oyo ihe fi yoshili. Ovanhu otashi dulika va hokolole omahokololo e na sha noinima oyo tava diladila kutya ova mona nova uda. Ngeenge ovanhu ova kala nokweendulula omahokololo a tya ngaho lwoikando, omahokololo oo otaa ka wedelwa. Inatu hala okukwafela Satana mokutilifa ovanhu, mokukala hatu endulula omahokololo a tya ngaho. — Johannes 8:44; 2 Timoteus 2:16.

21. Ponhele yokuhokolola omahokololo e na sha neendemoni, ohatu dulu okupopya kombinga yashike?

²¹ Ngeenge umwe womoshiwana shaJehova okwa li e na ekwatafano neendemoni, ke na okweendulula ehokololo li na sha noinima oyo opo a hafife vamwe. Oshiwana shaJehova kashi na okumbadapalekwa kukeshe osho Ondiaboli neendemoni tadi dulu okuninga. Ponhele yaasho, otu na okuyandja elitulemo kuJesus nokeenghono odo Jehova e mu pa. (Ovaheberi 12:2) Jesus kali ha hafifa ovahongwa vaye shi na sha nomahokololo e na sha neendemoni. Okwa li a yandja elitulemo ketumwalaka lOuhamba ‘nokoilonga inene yaKalunga.’ — Oilonga 2:11; Lukas 8:1; Ovaroma 1:11, 12.

22. Owa tokola toko okuninga shike?

²² Inatu dimbwa kutya elalakano laSatana olo okunyona po ekwatafano letu naJehova. Ota kendabala okuninga keshe shimwe opo a ninge ngaho. Ashike otu shii eenghedi odo Ondiaboli hai longifa, notwa tokola okuhenuka keshe osho shi na ekwatafano neendemoni. Ita tu ‘pe Satana onhele’ opo a nghundipaleke etokolotoko letu. (Lesha Ovaefeso 4:27.) Ngeenge otwa kondjifa Ondiaboli, ohatu ka kala twa amenwa keemwiyo dayo, na Jehova ote ke tu amena. — Ovaefeso 6:11.