1. Jesus okwa li te lipula nashike moufiku oo wa tetekela efyo laye?

JESUS okwa li te lipula shi na sha nonakwiiwa yovahongwa vaye moufiku oo wa tetekela efyo laye, molwaashi okwa li e shii kutya ote ke va fiya po. Okwe va lombwela a ti: ‘Kamu fi vomounyuni.’ (Johannes 15:19) Lwanima, okwa li a ilikana kuXe kombinga yavo a ti: “Vo kave fi vomounyuni, ngaashi Ame ndihe fi womounyuni.” (Johannes 17:15, 16) Jesus okwa li a hala okutya ngahelipi?

2. Oshitya ‘ounyuni’ osho Jesus a popya otashi ulike kushike?

² Oshitya ‘ounyuni’ otashi ulike kovanhu ovo vehe shii Kalunga notava pangelwa kuSatana. (Johannes 14:30; Ovaefeso 2:2; Jakob 4:4; 1 Johannes 5:19) Mbela ongahelipi hatu dulu okukala tuhe fi oshitukulwa ‘shounyuni’ ou tau pangelwa kuSatana? Metukulwa eli, ohatu ka kundafana eenghedi di lili noku lili tadi landula: Otu li ovadiinini kOuhamba waKalunga noihatu kufa ombinga moinima yopapolotika. Ohatu henuka omhepo younyuni. Ohatu djala nokuliwapeka monghedi i shii okufimanekwa notu na etaleko li li pandjele li na sha noimaliwa. Ohatu djala yo oilwifo oyo Kalunga e tu pa. — Tala omafatululo oitya pexulilo lembo, oshitwa 16.

3. Jesus okwa li a tala ko ngahelipi opolotika?

³ Eshi Jesus a li kombada yedu, okwa li a mona kutya ovanhu ove na omaupyakadi mahapu nonghalamwenyo yavo oya li idjuu. Okwa li e na ko nasha shili navo nokwa li a hala oku va kwafela. Mbela okwa li a ninga omuwiliki wopapolotika? Hasho. Okwa li e shii kutya ovanhu ova pumbwa shili Ouhamba waKalunga ile epangelo. Jesus oye a li ta ka ninga Ohamba yOuhamba oo, nokwa li ha udifa unene kombinga yao. (Daniel 7:13, 14; Lukas 4:43; 17:20, 21) Jesus ka li ha kufa ombinga nandenande moinima yopapolotika. Eshi Jesus a li koshipala shomupangeli Omuroma, Pontius Pilatus, okwa ti: “Ouhamba wange kau fi womounyuni ou.” (Johannes 18:36) Ovahongwa vaye navo kava li hava kufa ombinga moinima yopapolotika. Embo ledina On the Road to Civilization ola ti kutya Ovakriste vonale “kava li ve na eendodo dopapolotika.” Kunena, Ovakriste vashili navo ihava kufa ombinga moinima yopapolotika. Ohatu yambidida noudiinini Ouhamba waKalunga noihatu kufa ombinga moinima yopapolotika younyuni ou. — Mateus 24:14.

4. Ovakriste vashili ohava yambidida ngahelipi Ouhamba waKalunga?

⁴ Ovakalelipo voilongo ohava kalele po oilongo yavo moilongo imwe, nomolwaasho ihava kufa ombinga moinima yopapolotika yomoilongo omo. Ovavaekwa, ovo ve na eteelelo loku ka pangela pamwe naKristus meulu, navo ove li monghalo ya tya ngaho. Paulus okwa popya shi na sha nOvakriste ovavaekwa a ti: “Ponhele yaKristus ofye hano ovatumwa.” (2 Ovakorinto 5:20) Ovavaekwa ove lile po epangelo laKalunga. Ihava kufa ombinga moinima yopapolotika ile yomapangelo ounyuni ou. (Ovafilippi 3:20) Ponhele yaasho, ovavaekwa ova kwafela ovanhu omamiliyona ve lihonge kombinga yepangelo  laKalunga. “Eedi” dimwe, odo di na eteelelo loku ka kala fiyo alushe mounyuni mupe, ohadi yambidida ovavaekwa. Nado ihadi kufa ombinga moinima yopapolotika. (Johannes 10:16; Mateus 25:31-40) Hano osha yela kutya Ovakriste vashili ihava kufa ombinga moinima yopapolotika younyuni ou. — Lesha Jesaja 2:2-4.

5. Omolwashike Ovakriste ihava kufa ombinga moita?

⁵ Ovakriste vashili ova tala ko ovaitaveli vakwao aveshe ve li oukwaneumbo wa hangana, kashi na nee mbudi kutya ova dja moshilongo ile meputuko lilipi. (1 Ovakorinto 1:10) Ngeno otu ye moita, ngeno ohatu lwifa oilyo youkwaneumbo wetu, sha hala okutya, ovaitaveli vakwetu, ovo Jesus e tu lombwela tu kale tu hole. (Johannes 13:34, 35; 1 Johannes 3:10-12) Kakele kaasho, Jesus okwa lombwela ovahongwa vaye va kale ve hole nokuli novatondi vavo. — Mateus 5:44; 26:52.

6. Ovapiya vaJehova ve mu liyapulila ohava tale ko ngahelipi omapangelo?

 ⁶ Nonande ihatu kufa ombinga moinima yopapolotika tu li Ovakriste, ohatu kendabala tu kale ovakwashiwana vawa. Pashihopaenenwa, ohatu fimaneke omapangelo, mokudulika keemhango nokufuta oifendela. Ashike ohatu yandje alushe ‘osho shaKalunga kuKalunga.’ (Markus 12:17; Ovaroma 13:1-7; 1 Ovakorinto 6:19, 20) ‘Osho shaKalunga’ osha kwatela mo ohole yetu yoku mu hola, okudulika noku mu longela. Otwa halelela okuyandjela Jehova onghalamwenyo yetu aishe ponhele yokuhadulika kuye. — Lukas 4:8; 10:27; lesha Oilonga 5:29; Ovaroma 14:8.

7, 8. “Omhepo younyuni” oshike, nohai nwefa mo ovanhu ngahelipi?

⁷ Okukala twa yooloka ko kounyuni waSatana osha hala okutya katu na okweefa tu nwefwe mo ‘komhepo younyuni.’ Omhepo oyo oya kwatela mo onghedi yokudiladila nelihumbato olo la nwefwa mo kuSatana, noya nwefa mo ovo ihava longele Jehova. Ashike Ovakriste ohava henuka oikala oyo. Ngaashi Paulus a popya, “fye inatu tambula omhepo younyuni, ndelenee Omhepo tuu ei yomuKalunga.” — 1 Ovakorinto 2:12; Ovaefeso 2:2, 3; tala omafatululo oitya pexulilo lembo, oshitwa 17.

⁸ Omhepo younyuni oya ningifa ovanhu va kale ve lihole voovene, ve na ounhwa noihava dulika. Osho ohashi va ningifa va diladile kutya inava pumbwa okudulika kuKalunga. Satana okwa hala ovanhu va ninge keshe osho va hala nopehe na okudiladila koilanduliko. Satana okwa hala ovanhu va itavele kutya “okahalu kombelela nokahalu komesho” oyo ya fimanenena monghalamwenyo. (1 Johannes 2:16; 1 Timoteus 6:9, 10) Ondiaboli otai kendabala neenghono okupukifa ovapiya vaJehova noku  tu ninga oineya tu kale hatu diladila ngaashi yo. — Johannes 8:44; Oilonga 13:10; 1 Johannes 3:8.

9. Omhepo younyuni otai dulu oku tu nwefa mo ngahelipi?

⁹ Ngaashi ashike omhepo oyo hatu fudile mo, omhepo younyuni oya dingilila keshe umwe womufye. Ngeenge itatu ningi eenghendabala da mana mo tu kondjife omhepo oyo, otai ke tu nwefa mo. (Lesha Omayeletumbulo 4:23.) Osho otashi dulu okuhovela noinima oyo ya fa inai nyika oshiponga, ngaashi okweefa tu nwefwe mo komadiladilo nosho yo koikala yovanhu ovo ihava longele Jehova. (Omayeletumbulo 13:20; 1 Ovakorinto 15:33) Ile ohatu dulu okunwefwa mo kovashunimonima, komafiyafano omaudano nosho yo kokutala omafano oipala. — Tala omafatululo oitya pexulilo lembo, oshitwa 18.

10. Ongahelipi hatu dulu okukondjifa omhepo younyuni?

¹⁰ Ongahelipi hatu dulu okuhenuka okunwefwa mo komhepo younyuni? Otwa pumbwa okukala popepi naJehova nokweefa ounongo waye u tu wilike. Otwa pumbwa oku mu ilikana alushe e tu pe omhepo yaye iyapuki nokukala twe lipyakidila moilonga yaye. Jehova oye aeke omunaenghono a shiya ko meshito alishe. Otu na elineekelo kutya ota dulu oku tu kwafela tu kondjife omhepo younyuni. — 1 Johannes 4:4.

11. Omhepo younyuni oya nwefa mo ngahelipi onghedi yovanhu yokudjala?

¹¹ Ohatu ulike yo kutya katu fi oshitukulwa shounyuni monghedi yetu yokudjala noyokuliwapeka. Ovanhu vahapu mounyuni ohava djala opo va pewe elitulemo, va pendulile vamwe omadiladilo inaa koshoka, va ulike kutya ihava dulika moshitukulwa shavo ile ve liulike kutya  ove na oimaliwa i fike peni. Vamwe kave na ko nasha nanghee tava monika. Otashi dulika va djale monghedi yokuhe na ko nasha ile oinima inai koshoka. Katu na okweefa oikala ya tya ngaho i nwefe mo onghedi yetu yokudjala nokuliwapeka.

12, 13. Omafinamhango elipi taa dulu oku tu kwafela ngeenge hatu hoolola osho tu na okudjala?

¹² Tu li ovapiya vaJehova, otwa hala okukala alushe hatu djala oikutu ya yela, i li monghalo iwa notai wapalele onghalo. Ohatu djala “noshishohoni noukoshoki” opo tu ulike kutya otu na ‘etilokalunga.’ — 1 Timoteus 2:9, 10; Judas 21.

 ¹³ Onghedi omo hatu djala otai dulu okukuma etaleko lavamwe li na sha naJehova noshiwana shaye. Otwa hala okuninga ‘ashishe okufimanekifa Kalunga.’ (1 Ovakorinto 10:31) Okukala noshishohoni ile nelininipiko osha kwatela mo okufimaneka omaliudo nosho yo omadiladilo avamwe. Onghee hano, ngeenge hatu hoolola oikutu ile kutya otwa hala okukala hatu monika ngahelipi, otu na okudimbuluka kutya omahoololo oo hatu ningi ohaa kumu vamwe. — 1 Ovakorinto 4:9; 2 Ovakorinto 6:3, 4; 7:1.

14. Oshike tu na okukaleka momadiladilo ngeenge hatu hoolola oikutu oyo hatu djala eshi hatu kufa ombinga momalipyakidilo opaKriste?

¹⁴ Ohatu djala ngahelipi ngeenge tu li pokwoongala ile moukalele? Mbela ohatu yandje unene elitulemo kufye vene? Mbela okudjala kwetu ohaku fifa vamwe ohoni? Mbela ohatu kala tu udite kutya onghedi yetu yokudjala oshinima shetu shopaumwene? (Ovafilippi 4:5; 1 Petrus 5:6) Oshoshili kutya keshe umwe oha kala a hala okukala a fewa, ashike omaukwatya opaKriste oo hae tu ningifa tu kale twa fewa. Omaukwatya oo, oo Jehova ha kala e wete ngeenge te tu tale. Ohaa ulike kutya otwa tya ngahelipi momitima detu, sha hala okutya, ‘omunhu womeni womomutima oo u na ondilo koshipala shaKalunga.’ — 1 Petrus 3:3, 4.

15. Omolwashike Jehova ine tu lombwela kondadalunde kutya natu kale hatu djala ngahelipi nosho yo nghee tu na okukala hatu monika?

¹⁵ Jehova ine tu pa omusholondodo weemhango di na sha naasho tu na okudjala naasho tuhe na okudjala. Ponhele yaasho, okwe tu pa omafinamhango Ombiibeli, oo taa dulu oku tu kwafela tu ninge etokolo li li pandunge. (Ovaheberi 5:14) Okwa hala tu kale hatu ningi omatokolo e likolelela kohole yoku mu hola nosho yo yokuhola vamwe, kashi na nee mbudi kutya okwa tya ngahelipi.  (Lesha Markus 12:30, 31.) Mounyuni aushe, ovapiya vaJehova ohava djala meenghedi da yoolokafana she likolelela komaputuko avo nokwaasho ve hole. Osho ohashi va ningifa va kale va fewa.

16. Ongahelipi etaleko lounyuni li na sha noimaliwa li li omhinge naasho Jesus a honga? Omapulo elipi tu na okulipula?

¹⁶ Satana okwa hala ovanhu va diladile kutya oimaliwa nosho yo oinima yopamaliko oyo tai va etele ehafo, ashike ovapiya vaJehova ove shii kutya osho kashi fi shoshili. Otwe lineekela eendjovo daJesus odo tadi ti:  “Omwenyo womunhu ihau xupifwa kouhapu weliko laye.” (Lukas 12:15) Oimaliwa itai dulu oku tu etela ehafo lashili. Itai tu pe ookaume kashili, ombili yashili yopamadiladilo ile omwenyo waalushe. Oshoshili kutya otwa pumbwa oinima imwe yopamaliko, notwa hala okukala hatu hafele onghalamwenyo. Ashike Jesus okwe tu honga kutya ohatu ka kala ashike twa hafa ngeenge otu na ekwatafano liwa naKalunga nongeenge otwa pitifa komesho oku mu longela monghalamwenyo yetu. (Mateus 5:3; 6:22) Lipula kutya: ‘Mbela onda nwefwa mo ketaleko lounyuni li na sha noimaliwa? Mbela ohandi diladila nokupopya unene kombinga yoimaliwa?’ — Lukas 6:45; 21:34-36; 2 Johannes 6.

17. Onghalamwenyo yoye otai ka kala ya tya ngahelipi ngeenge owa henuka etaleko lounyuni li na sha noimaliwa?

¹⁷ Ngeenge otwa yandje elitulemo kokulongela Jehova nokuhenuka onghedi omo ounyuni hau tale ko oimaliwa, ohatu ka kala tu na onghalamwenyo i na eityo. (Mateus 11:29, 30) Ohatu ka kala twa wanenwa kwaasho tu na nohatu ka kala tu na ombili yopamadiladilo noyokomutima. (Mateus 6:31, 32; Ovaroma 15:13) Itatu ka kala tu na oisho ihapu i na sha noinima yopamaliko. (Lesha 1 Timoteus 6:9, 10.) Ohatu ka mona yo ehafo olo hali di mokuyandja. (Oilonga 20:35) Ohatu ka kala yo tu na efimbo la wana lokukala pamwe novaholike vetu. Otashi dulika yo nokuli tu kale hatu kofa nawa. — Omuudifi 5:12.

18. Satana ota kendabala oku tu ningila shike?

¹⁸ Satana ota kendabala okunyona po ekwatafano letu naJehova, nomolwaasho otwa pumbwa okuninga eenghendabala opo tu li kaleke po. Otu na okulwifa ‘eemhepo  dowii.’ (Ovaefeso 6:12) Satana neendemoni daye inava hala tu kale twa hafa ile tu ka kale nomwenyo fiyo alushe. (1 Petrus 5:8) Ovatondi ovo ovanaenghono otave tu lwifa, ashike ohatu dulu oku va finda kekwafo laJehova.

19. Ovaefeso 6:14-18 ova hokolola ngahelipi “oilwifo aishe” yOmukriste?

¹⁹ Momafimbo onale, ovakwaita ova li hava djala oilwifo opo ve liamene molwoodi. Sha faafana, nafye otu na okudjala “oilwifo aishe” oyo Jehova e tu pa. (Ovaefeso 6:13) Oilwifo oyo otai ke tu amena. Oilwifo oyo oya popiwa mOvaefeso 6:14-18 taku ti: “Kaleni ofika mwe limanga oshiya sheni noshili, nye mwa djala ponhulo oipapa yoivela youyuki, nelilongekeko tali di mevaengeli lombili li ninge eenghaku keemhadi deni. Mwaaishe kwateni oshikelelifo sheitavelo, mu dule okudima po nasho oikuti yomunawii ya xwama omundilo, nembale loshivela lexupifo li tambuleni, neongamukonda lOmhepo, nokutya, eendjovo daKalunga. Eshi shi ningeni nomailikano nomaindilo aeshe nokwiilikana alushe mOmhepo.”

20. Otu na okuninga po shike opo “oilwifo aishe” i tu kwafele?

²⁰ Ngeenge omukwaita okwa dimbwa oshilwifo shaye shimwe ndele oshilyo shaye shimwe sholutu tashi kala inashi amenwa, ovatondi vaye otava ka shoneka opo inapa amenwa. Opo “oilwifo” yetu yopamhepo i tu amene, inatu dimbwa po nande oshimwe. Otwa pumbwa okukala twe i djala aishe efimbo keshe noku i kaleka monghalo iwa. Otu na okukala hatu kondjo, ofimbo ounyuni waSatana neendemoni daye inava hanaunwa po. (Ehololo 12:17; 20:1-3) Onghee hano, ngeenge ohatu kondjifa omahalo onhumba ile ounghundi wonhumba, inatu sholola. — 1 Ovakorinto 9:27.

21. Oshike tashi dulu oku tu kwafela tu findane molwoodi letu?

 ²¹ Itatu dulu okulwifa Ondiaboli keenghono detu vene. Ashike kekwafo laJehova, ohatu dulu oku i finda. Opo tu kale ovadiinini, otwa pumbwa okwiilikana kuJehova, okukonakona Eendjovo daye nokukala hatu endafana novamwatate novamwameme. (Ovaheberi 10:24, 25) Osho otashi ke tu kwafela tu kale ovadiinini kuKalunga notwe lilongekida okupopila eitavelo letu.

22, 23. (a) Ongahelipi hatu dulu okukala alushe twe lilongekida okupopila eitavelo letu? (b) Oshike hatu ka kundafana metukulwa tali landula?

²² Otwa pumbwa okukala twe lilongekida okupopila eitavelo letu efimbo keshe. (Johannes 15:19) Eendombwedi daJehova ohadi kala da yooloka ko kovanhu vahapu moinima imwe. Lipula kutya: ‘Mbela ondi udite ko ngoo kutya omolwashike hatu kala twa yooloka ko? Onda tomhwa ngoo shili kutya osho sha popiwa kOmbiibeli nosho yo komupiya omudiinini nomunaendunge oshi li mondjila? Ondi udite ngoo etumba eshi ndi li Ondombwedi yaJehova? (Epsalme 34:2; Mateus 10:32, 33) Ohandi dulu ngoo okuyelifila vamwe kombinga yeitavelo lange?’ — Mateus 24:45; Johannes 17:17; lesha 1 Petrus 3:15.

²³ Meenghalo dihapu, ohatu kala tu shii kutya otu na okuninga po shike opo tu kale twa yooloka ko kounyuni. Ashike omafimbo amwe, ihatu kala tu shii kutya natu ninge po shike. Satana oha kendabala oku tu yula meenghedi di lili noku lili. Onghedi imwe oyo ha longifa oyo omalihafifo. Ongahelipi hatu dulu okuhoolola omalihafifo pandunge? Ohatu ke shi mona metukulwa tali landula.