OSHILESHWA 03
Mbela oto dulu ngoo okulineekela Ombiibeli?
Ombiibeli oya udaneka oinima ihapu notai yandje yo omayele. Otashi dulika wa tunhukwa kwaasho to lihongo, nopefimbo opo tuu opo owa lungamena osho to lesha. Mbela oto dulu ngoo okulineekela omaudaneko nosho yo omayele oo taa hangwa membo olo likulu? Mbela osho Ombiibeli ya popya shi na sha nokuhafela onghalamwenyo paife nosho yo monakwiiwa oshi shii ngoo okulineekelwa? Ovanhu omamiliyona ove shi itavela. Ohatu ku ladipike yo naave u i konakone.
1. Mbela Ombiibeli oya popya ngoo oshili, ile oi li ashike embo lomahepu?
Ombiibeli oya popya kutya oi na ‘eendjovo da yuka nodoshili.’ (Omuudifi 12:10) Oya popya kombinga yomahokololo oo a kwatela mo ovanhu volela. (Lesha Lukas 1:3; 3:1, 2.) Ovanandjokonona novalafululi voikulunima ova yandja omaumbangi e shii okulineekelwa e na sha nomido, ovanhu, eenhele nosho yo oiningwanima oyo ya popiwa mOmbiibeli.
2. Omolwashike hatu dulu okukala noushili kutya Ombiibeli inai kwisha?
Ombiibeli oya tumbula oiningwanima oyo ya ka ningwa lwanima, pefimbo opo ya li natango tai shangwa. Pashihopaenenwa, oya popya kombinga younongononi. Vahapu pefimbo opo ya li tai shangwa ova li va yemba ouyelele wa tya ngaho. Ashike kunena, ounongononi otau ulike kutya ouyelele oo wa popiwa mOmbiibeli owoshili. ‘Ihai hekuka nande, notai kalelele fiyo alushe.’— Epsalme 111:8.
3. Omolwashike tu na okulineekela osho Ombiibeli ya popya kombinga yonakwiiwa?
Ombiibeli oya popya kombinga yoinima a ‘yonale ofimbo nokuli inai ningwa.’ (Jesaja 46:10) Oya xunganeka kombinga yoiningwanima oyo ya ka wanifwa po naanaa ngaashi sha li sha popiwa. Oya popya yo shihapu kombinga yeenghalo odo di li ko kunena. Metukulwa eli, ohatu ka tala komaxunganeko amwe Ombiibeli. Onghedi omo a wanifwa po oikumwifi neenghono!
KONAKONA MOULE
Konakona nghee ounongononi kunena tau tu kumwe nOmbiibeli, ndele to ningi omapekapeko kombinga yomaxunganeko amwe Ombiibeli oo a hokwifa neenghono.
4. Ounongononi otau tu kumwe nOmbiibeli
Pefimbo lonale, ovanhu vahapu ova li va itavela kutya edu ola tenhekwa kusha. Dana OKAVIDIO.
Tala osho embo laJob la popya omido 3 500 da pita. Lesha Job 26:7, ndele tamu kundafana epulo tali shikula:
-
Omolwashike tashi kumwifa eshi taku ti edu okwe li endjelelifa ponhele “pehe na sha”?
Edingonoko lomeva ola ka udiwa ko ashike okudja mo 1800 nasha. Didilika yo osho Ombiibeli ya popya pa pita nokuli paife omido 3 500 lwaapo. Lesha Job 36:27, 28, ndele tamu kundafana omapulo taa shikula:
-
Omolwashike onghedi i li paunafangwa omo Ombiibeli ya popya shi na sha nedingonoko lomeva ihokwifa?
-
Mbela omishangwa odo opo wa lesha ode ku linyengifa u kale we lineekela Ombiibeli?
5. Ombiibeli oya xunganeka kombinga yoiningwanima ya fimana
Lesha Jesaja 44:27–45:2, ndele tamu kundafana epulo tali shikula:
-
Ombiibeli oya hangwa ya popya kombinga yomauyelele elipi oule womido 200 ofimbo Babilon inashi teka po?
Ondjokonona otai ulike kutya ohamba Kores yaPersia nosho yo etangakwaita laye ova finda Babilon mo 539 K.O.P. b Ova li va fa omikangha da dja momulonga oo wa li wa dingilila oshilando osho. Konima eshi va hanga omivelo doshilando da fiwa hamwasha, ova li va kwata ko oshilando osho nopehe na okulwa. Kunena, Babilon oshi li natango onduba yoikulukuma pa pita nokuli omido 2 500. Paife natu konakone osho Ombiibeli ya xunganeka.
Lesha Jesaja 13:19, 20, ndele tamu kundafana epulo tali shikula:
-
Ongahelipi osho sha ningilwa Babilon sha koleka okuwanifwa po kwexunganeko olo?
Oikulukuma yaBabilon oi li muIraq
6. Ombiibeli oya xunganeka kombinga yoinima oyo tu wete kunena
Oya popya kombinga yefimbo olo tu li mulo kutya ‘omafiku axuuninwa.’ (2 Timoteus 3:1) Didilika osho Ombiibeli ya popya kombinga yefimbo olo tu li mulo.
Lesha Mateus 24:6, 7, ndele tamu kundafana epulo tali shikula:
-
Ombiibeli oya popya kombinga yeenghalo dilipi didilikwedi odo tadi ka holoka momafiku axuuninwa?
Lesha 2 Timoteus 3:1-5, ndele tamu kundafana omapulo taa shikula:
-
Ombiibeli oya popya kutya ovanhu otava ka kala nomaukwatya a tya ngahelipi pomafiku axuuninwa?
-
Elipi omomaukwatya oo wa didilika movanhu?
VAMWE OHAVA TI: “Ombiibeli embo ashike leengano nomahokololo.”
-
Pataleko loye, oshike she ku tomha kutya ohatu dulu okulineekela Ombiibeli?
ENGONGO
Ondjokonona, ounongononi nosho yo omaxunganeko otai yandje oumbangi kutya ohatu dulu okulineekela Ombiibeli.
Eendululo
-
Mbela Ombiibeli oya popya ngoo oshili, ile embo ashike leengano?
-
Omoinima imwe ilipi omo ounongononi tau tu kumwe nOmbiibeli?
-
Mbela oto diladila kutya Ombiibeli oya xunganeka sha kombinga yonakwiiwa? Omolwashike to tile ngaho?
TALA OUYELELE WA WEDWA PO
Mbela mOmbiibeli omu na oinima ihe fi yoshili i na sha nounongononi?
“Mbela ounongononi otau tu ngoo kumwe nOmbiibeli?” (Oshitukulwa shi li ko jw.org)
Oinima ilipi i li paushili i na sha ‘nomafiku axuuninwa’?
“Omaxunganeko ahamano Ombibeli oo taa wanifwa pefimbo letu” (Oshungonangelo Juli-Septemba 2011)
Lihonga kombinga yanghee omaxunganeko Ombiibeli e na sha nouhamba waGreka a wanifwa po.
Didilika nghee omaxunganeko Ombiibeli a lundulula etaleko lomulumenhu umwe li na sha nOmbiibeli.
“Ngha li nda itavela kutya Kalunga oko e li” (Oshungonangelo No. 5 2017)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
