OSHILESHWA 40
Ongahelipi hatu dulu okukala twa koshoka momesho aKalunga?
Diladila kuina omudali omunahole oo ta longekida okamonamati ka ye kofikola. Oha shilipaleke kutya okwe ka kosha, noikutu yako oya yela. Osho otashi ka ningifa okamati oko ka kale ke na oukolele, notashi ka ulika kutya ovadali vako ohave ka file oshisho. Sha faafana, Tate yetu omunahole, Jehova, okwa hala tu kale twa koshoka palutu nosho yo paenghedi. Ngeenge otwa kala twa koshoka, otashi tu etele ouwa fye vene notashi fimanekifa Jehova.
1. Ongahelipi hatu dulu okukala twa koshoka palutu?
Jehova okwe tu lombwela a ti: “Kaleni ovayapuki.” (1 Petrus 1:16) Ouyapuki owa pambafana nokukala twa koshoka palutu nosho yo paenghedi. Ohatu dulu okukala twa koshoka palutu mokukala hatu likosho pandjikilile nokukaleka oikutu yetu ya yela, omaumbo etu nosho yo oyeendifo yetu. Ohatu dulu yo okukwafela mokukaleka Olupale lOuhamba letu la yela. Ngeenge otwa kala twa koshoka palutu, ohatu ka fimanekifa Jehova.— 2 Ovakorinto 6:3, 4.
2. Eenghedindjikilile dilipi twa pumbwa okuhenuka, opo tu kale twa koshoka?
Ombiibeli oye tu ladipika tai ti: “Tu likosheni kedilo keshe lombelela naali lomhepo.” (2 Ovakorinto 7:1) Onghee otu na okuhenuka keshe osho tashi dulu okunyona po olutu nosho yo omadiladilo etu. Osho hatu diladila oshi na okukala tashi hafifa Jehova, onghee hano otu na okuninga keshe osho hatu dulu, opo tu henuke omadiladilo inaa koshoka. (Epsalme 104:34) Okupopya kwetu oku na yo okukala kwa koshoka.— Lesha Ovakolossi 3:8.
Oshike vali tashi dulu oku tu ningifa tu kale inatu koshoka palutu, ile paenghedi? Ope na oinima imwe oyo tai dulu okunyateka omalutu etu, oyo twa pumbwa okuhenuka filufilu. Oinima oyo ongaashi okushila omakaya, ile epangwe nosho yo okulongifa oingangamifi ikwao omolwomalihafifo. Ngeenge otwa henuka oinima oyo, ohatu ka kala tu na oukolele, nohatu ka ulika kutya otwa fimaneka oshali yomwenyo. Ohatu ka kendabala yo okukala twa koshoka paenghedi mokuhenuka okuninga oinima oyo inai koshoka, ngaashi okulidanena koilyo yoludalo nosho yo okutala omafano oipala. (Epsalme 119:37; Ovaefeso 5:5) Kashi pu okweefa po eenghedindjikilile odo, ashike Jehova ota dulu oku tu kwafela tu di efe po.— Lesha Jesaja 41:13.
KONAKONA MOULE
Lihonga kutya omolwashike hatu ka fimanekifa Jehova, ngeenge otwa kala twa koshoka palutu. Tala yo kutya ongahelipi to dulu okuhenuka okuninga oinima oyo inai koshoka.
3. Okukala twa koshoka palutu ohaku fimanekifa Jehova
Ohatu dulu okumona kutya Jehova okwa tala ko ngahelipi oukoshoki mokukonakona eemhango odo a pele Ovaisrael. Lesha Exodus 19:10 no 30:17-19, ndele tamu kundafana omapulo aa:
-
Eevelishe odo otadi holola shike kombinga yetaleko laJehova li na sha noukoshoki wopalutu?
-
Oshike to dulu okukala ho ningi pandjikilile, opo u kale wa koshoka palutu?
Otashi pula efimbo neenghendabala, opo tu kale twa koshoka palutu. Nohatu dulu okuninga ngaho, kutya nee ohatu kala peni, ile otu na oiniwe i fike peni. Dana OKAVIDIO, ndele tamu kundafana epulo tali shikula.
-
Ongahelipi okukaleka oinima yetu ya koshoka taku dulu okufimanekifa oilonga yetu yokuudifa?
4. Efa po eenghedindjikilile inadi koshoka
Jehova ota dulu oku tu kwafela tu efe po eenghedindjikilile inadi koshoka
Ngeenge oho shili omakaya, ile ho longifa oingangamifi omolwomalihafifo, otashi dulika u kale u shii kutya oshidjuu okweefa po oinima oyo. Ndele mbela oshike tashi dulu oku ku kwafela? Diladila kunghee oinima oyo tai dulu oku ku kuma. Lesha Mateus 22:37-39, ndele tamu kundafana nghee okushila omakaya nokulongifa oingangamifi taku dulu okukuma . . .
-
ekwatafano lomunhu naJehova.
-
oukwaneumbo wavo naavo ve mu dingilila.
Ninga eenghendabala, opo u efe po eenghedindjikilile da nyata. a Dana OKAVIDIO.
Lesha Ovafilippi 4:13, ndele tamu kundafana epulo eli:
-
Ongahelipi okwiilikana pandjikilile, okukonakona Ombiibeli nokukala pokwoongala, taku dulu okukwafela omunhu a finde eenghedindjikilile inadi koshoka?
5. Kondjifa omadiladilo nosho yo oilonga inai koshoka
Lesha Ovakolossi 3:5, ndele tamu kundafana omapulo taa shikula:
-
Otu shi shii ngahelipi kutya oinima ngaashi okutala omafano oipala, okulitumina omatumwalaka, ile omafano taa pendula omahalo opamilele nosho yo okulidanena koilyo yoludalo inai koshoka koshipala shaJehova?
-
Mbela ou wete ngoo sha yuka, eshi Jehova a teelela tu kale twa koshoka paenghedi, nongeenge osho, omolwashike to tile ngaho?
Tala nghee to dulu okukondjifa omadiladilo inaa koshoka. Dana OKAVIDIO.
Jesus okwa longifa efaneko a ulike kutya otu na okukala twa tokola toko okuninga keshe osho twa pumbwa, opo tu kale twa koshoka paenghedi. Lesha Mateus 5:29, 30, ndele tamu kundafana epulo tali shikula:
-
Nonande Jesus ina hala kutya otu na okuliyahameka palutu, okwa ulika kutya otwa pumbwa okukatuka eenghatu. Eenghatu dilipi omunhu a pumbwa okukatuka, opo a henuke omadiladilo inaa koshoka? b
Ngeenge oto kondjo nokweefa po okudiladila oinima inai koshoka, kala u shii kutya Jehova okwa lenga eenghendabala doye. Lesha Epsalme 103:13, 14, ndele tamu kundafana epulo tali shikula:
-
Ngeenge oto kondjo nonghedindjikilile yonhumba inai koshoka, ongahelipi omushangwa oo tau ku tu omukumo, opo u twikile nokukondja?
Ino sholola, ngeenge wa endulula epuko
Oshi na oupu tu diladile kutya, ‘Onda ninga vali epuko, onghee itandi ke shi pondola.’ Ashike diladila kwaashi: Ngeenge omulotoki okwa punduka, inashi hala kutya ita dulu okufindana mefiyafanepo, ile kutya okwa pumbwa oku ka djuulula ko. Sha faafana, ngeenge owa endulula vali epuko, osho inashi hala kutya ito ka pondola vali mokukondjifa onghedindjikilile oyo inai koshoka. Noitashi ti yo kutya exumokomesho alishe olo wa ninga itali ti sha vali. Keshe umwe ota dulu okuninga epuko, noshi li oshitukulwa shokuninga exumokomesho. Onghee ngeenge owa endulula epuko, ino sholola! Jehova ote ku kwafele u finde onghedindjikilile inai koshoka, oyo to kondjo nayo.
VAMWE OHAVA TI: “Onda pikwa neenghono. Onghee itandi dulu okweefa po oshinima osho.”
-
Omushangwa ulipi to ka longifa, opo u ulikile omunhu kutya Jehova ota dulu oku mu kwafela a dule okweefa po onghedindjikilile oyo inai koshoka?
ENGONGO
Ohatu hafifa Jehova mokukala twa koshoka palutu, pamadiladilo nosho yo paenghedi.
Eendululo
-
Omolwashike sha fimanenena okukala twa koshoka?
-
Ongahelipi hatu dulu okukala twa koshoka palutu?
-
Ongahelipi hatu dulu okukala hatu diladila oinima ya koshoka nosho yo okukala twa koshoka paenghedi?
TALA OUYELELE WA WEDWA PO
Oinima i li paunafangwa ilipi to dulu okuninga, opo u kale wa koshoka, nonande ku na oiniwe ihapu?
Tala eenghatu tadi longo odo to dulu okukatuka, opo u efe po okushila omakaya.
“Nghee to dulu okweefa po okushila omakaya” (Kala oupafi!, Mei 2010)
Konakona oidjemo oyo hai etifwa kokutala omafano oipala.
Tala kutya ongahelipi omulumenhu umwe a efa po okukala a pikwa kokutala omafano oipala.
“Onda punduka lwoikando fimbo inandi pondola” (Oshungonangelo No. 4 2016)
a Oshitukulwa “Nghee to dulu okweefa po okushila omakaya,” shi li koshi yoshipalanyole, Tala ouyelele wa wedwa po, moshitukulwa eshi, osha yelifa eenghatu odo omunhu ta dulu okukatuka, opo a efe po okukala a pikwa.
b Opo u mone ekwafo li na sha nanghee to dulu okweefa po onghedindjikilile yokulidanena koilyo yoludalo, tala oshitukulwa “Ongahelipi handi dulu okuxulifa po okulidanena koilyo yoludalo?” membo Omapulo oo ovanyasha hava pula— Omanyamukulo oo taa kwafele, Embo 1, etukulwa 25.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
