OSHILESHWA 44
Mbela omadano oivilo aeshe otaa hafifa Kalunga?
Jehova okwa hala tu hafele onghalamwenyo, nokwa hala tu kale hatu ningi oivilo omafimbo amwe. Ndele mbela omadano aeshe oivilo nosho yo omafiku omafudo ohae mu hafifa ngoo? Ongahelipi hatu dulu okuulika kutya otu hole Jehova, ngeenge tashi uya pokudana oivilo?
1. Omolwashike omadano mahapu oivilo ihaa hafifa Jehova?
Otashi dulika u ka kumwe, shimha we lihongo kutya omadano mahapu oivilo okwa kanghamena komahongo ehe li pamishangwa, ile a kanghamena koinima yoshipaani. Omadano oivilo a tya ngaho otashi dulika a dilila komalongelokalunga oipupulu. Otashi dulika e na ekwatafano noumhulile, ile a kanghamena kehongo lomwenyo ihau fi. Omadano amwe oivilo okwa kanghamena koinima i na sha noidila, ile a kanghamena keitavelo lokukonga elao. (Jesaja 65:11) Ashike Jehova okwa londwela ovapiya vaye a ti: ‘Liyoololei mo; inamu kuma osho sha nyata.’— 2 Ovakorinto 6:17. a
2. Mbela Jehova oha kala e uditile ngahelipi omadano oivilo oo haa yandje efimano la pitilila kovanhu?
Jehova okwe tu londwela tuha wile momwiyo ‘wokulineekela ovanhu.’ (Lesha Jeremia 17:5.) Omafiku amwe omafudo ohaa yandje efimano kovapangeli, ile kovakwaita. Omadano amwe oivilo okwa kwatela mo okufimaneka omadidiliko opashiwana, ile emanguluko loshilongo. (1 Johannes 5:21) Amwe ohaa xumifa komesho oinima yopapolitika, ile omahangano ovahololimadiladilo. Mbela Jehova ota ka kala e udite ngahelipi, ngeenge otwa yandje efimano komunhu, ile komahangano, unene tuu oo taa xumifa komesho omadiladilo, oo e li omhinge nehalo laYe?
3. Mbela elihumbato lilipi tali dulu okuningifa omadano oivilo a kale inaa tambulwa ko?
Ombiibeli oya tokola “okunwa sha pitilila, okukufa ombinga moivilo ihe na elandulafano nomomafiyafano okunwa oikolwifa.” (1 Petrus 4:3) Momadano amwe oivilo, ovanhu ihava kala ve na elipangelo nohava ningi oinima inai koshoka. Opo tu kaleke po oukaume wetu naJehova, otwa pumbwa okukala kokule noinima ya tya ngaho.
KONAKONA MOULE
Lihonga kutya ongahelipi to dulu okuhafifa Jehova mokuninga omatokolo e li pandunge, ngeenge tashi uya pomafiku omafudo nomadano oivilo.
4. Ino kufa ombinga momadano oivilo oyo itai fimanekifa Jehova
Lesha Ovaefeso 5:10, ndele tamu kundafana omapulo taa shikula:
-
Oshike tu na okukaleka momadiladilo, ngeenge hatu ningi etokolo kutya natu dane efiku lefudo lonhumba, ile hasho?
-
Omafiku omafudo elipi haa danwa kovanhu vahapu momudingonoko weni?
-
Mbela oto diladila kutya otaa hafifa ngoo Jehova?
Mbela owe lipulile ngoo nale kutya Kalunga oha kala e uditile ngahelipi omadano omadalo? Ombiibeli kai na apa ya popya nande omupiya waJehova umwe a dana edalo laye. Oya popya ashike omadano omadalo opavali ovanhu ovo va li ihave mu longele. Lesha Genesis 40:20-22 nosho yo Mateus 14:6-10, ndele tamu kundafana omapulo taa shikula:
-
Omonghedi ilipi omadano oo opavali a faafana?
-
Okutala koihopaenenwa oyo yopaMbiibeli, mbela oto diladila kutya Jehova oha kala e uditile ngahelipi omadano omadalo?
Natango otashi dulika u lipule kutya ‘Mbela Jehova oha kala ngoo e na ko nasha, ngeenge handi kufa ombinga momadano omadalo, ile moivilo imwe oyo ihe li pamishangwa?’ Lesha Exodus 32:1-8. Opo nee, dana OKAVIDIO, ndele tamu kundafana omapulo taa shikula.
-
Omolwashike twa pumbwa okukala tu shii oinima oyo tai hafifa Jehova?
-
Ongahelipi hatu dulu okuninga ngaho?
Nghee hatu dulu okushiiva kutya oshivilo shonhumba itashi fimanekifa Kalunga
-
Mbela osha kanghamena ngoo komishangwa? Opo u shiive kombinga yasho, konakona oudilo washo.
-
Mbela ohashi yandje efimano la pitilila kovanhu, komahangano, ile komadidiliko opashiwana? Otwa fimaneka Jehova komesho yoinima aishe, notwe lineekela kutya oye ashike ta dulu okukandula po omaupyakadi aeshe mounyuni.
-
Mbela eenghedindjikilile dasho odi li ngoo metwokumwe nomifikamhango dOmbiibeli? Otwa pumbwa okukala twa koshoka paenghedi.
5. Kwafela vamwe va kale va fimaneka eitavelo loye
Omafimbo amwe, ohashi kala shidjuu okwaanya, ngeenge vamwe tave ku fininike u kufe ombinga momadano oivilo, oyo itai hafifa Jehova. Va yelifila shi na sha nomatokolo oye nengungumano nosho yo nelungi. Opo u mone oshihopaenenwa shanghee to dulu okuninga ngaho, dana OKAVIDIO.
Lesha Mateus 7:12, ndele tamu kundafana omapulo taa shikula:
-
Metwokumwe novelishe oyo, mbela oto ka lombwela ovapambele voye, ovo vehe fi Eendombwedi, kutya kave na okudana omafiku omafudo?
-
Oshike to dulu okuninga, opo u shilipaleke ovapambele voye kutya, nonande iho dana pamwe navo oivilo yomafiku omafudo, natango ou va hole nou na ko nasha navo?
6. Jehova okwa hala tu kale twa hafa
Okwa hala tu hafele omafimbo mawa pamwe novapambele nosho yo nookaume ketu. Lesha Omuudifi 8:15, ndele tamu kundafana epulo tali shikula:
-
Ovelishe ei otai ulike ngahelipi kutya Jehova okwa hala tu kale twa hafa?
Jehova okwa hala oshiwana shaye shi kale hashi hafele pamwe. Dana OKAVIDIO, opo u mone nghee osho hashi kala shi liwetikile poyoongalele yetu yopaiwana.
Lesha Ovagalati 6:10, ndele tamu kundafana omapulo taa shikula:
-
Mbela otwa pumbwa okudana omafiku omafudo, oo haa danwa apeshe, opo tu ulike kutya ohatu ‘ningile vamwe ouwa’?
-
Onghedi yokuyandja ilipi hai ku hafifa, mbela okuyandja sha molwaashi u udite kutya ou na oshinakuwanifwa shokuyandja mefiku lefudo lonhumba, ile okuyandja nehalo liwa?
-
Omafimbo amwe, Eendombwedi dihapu ohadi longekidile ovana oinima iwa yonhumba noku va pa omaano, oo va li inava teelela. Ngeenge ou na ounona, mbela oinima ilipi ye likalekelwa to dulu oku va ningila?
VAMWE OHAVA TI: “Oudilo womafiku omafudo inau fimana naanaa. Osho sha fimana okuhafela ashike pamwe novapambele nosho yo nookaume.”
-
Ove oto ti ngahelipi?
ENGONGO
Jehova okwa hala tu kale hatu hafele pamwe novapambele nosho yo nookaume ketu. Ndele ina hala tu kufe ombinga momadano oivilo, oyo itai mu hafifa.
Eendululo
-
Omapulo elipi twa pumbwa okupula, oo tae tu kwafele tu mone kutya oshivilo shonhumba otashi hafifa Jehova, ile hasho?
-
Ongahelipi hatu dulu okukwafela ovapambele nosho yo ookaume va ude ko omatokolo oo twa ninga e na sha nomafiku omafudo?
-
Ou shi shii ngahelipi kutya Jehova okwa hala tu kale twa hafa nokushambukilwa pamwe navamwe?
TALA OUYELELE WA WEDWA PO
ihonga kombinga yomafiku omafudo oo Ovakriste ihava dana.
“Omolwashike Eendombwedi daJehova ihadi dana omafiku omafudo?” (Oshitukulwa shi li ko jw.org)
Tala omatomheno ane kutya omolwashike twa itavela kutya omadano omadalo itaa hafifa Kalunga.
“Omolwashike Eendombwedi daJehova ihadi dana omadalo?” (Oshitukulwa shi li ko jw.org)
Tala nghee omunyasha umwe a li a ungaunga nelungi naavo va li tave mu sheke kofikola, molwaashi iha dana Okrismesa.
Ovakriste omamiliyona kunena ova tokola okuhadana Okrismesa. Mbela oto diladila kutya ove uditile ngahelipi etokolo olo?
“Ova mona oshinima shimwe shi li xwepo” (Oshungonangelo, 1 Desemba 2012)
a Tala omafatululo oitya, oshitwa 5, opo u shiive osho to dulu okuninga po, ngeenge opa holoka eenghalo, omo ovanhu tava dana oivilo nosho yo omafiku omafudo.
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
