OSHILESHWA 46
Omolwashike u na okuliyapulila Kalunga nokuninginifwa?
Oho liyapulile Jehova moku mu udanekela okupitila meilikano kutya oto ke mu longela oye aeke nokupitifa tete komesho okulonga ehalo laye monghalamwenyo yoye. (Epsalme 40:8) Konima yaasho, oho ninginifwa. Mokuninga ngaho, oto ulikile vamwe kutya owe liyapulila Jehova. Etokolo lokuliyapulila Jehova olo oshinima sha fimanenena osho omunhu ta dulu okuninga. Oshike tashi dulu oku ku linyengifa u ninge etokolo la tya ngaho la kwata moiti notali lundulula onghalamwenyo yoye?
1. Oshike hashi linyengifa omunhu e liyapulile Jehova?
Ohole oyo hai tu linyengifa tu liyapulile Jehova. (1 Johannes 4:10, 19) Ombiibeli oye tu ladipika ya ti: “Hola Jehova Kalunga koye nomutima woye aushe, nomwenyo woye aushe, nomadiladilo oye aeshe neenghono doye adishe.” (Markus 12:30) Ihatu ulike ashike kutya otu hole Kalunga mwaasho hatu popi, ndele nomwaasho yo hatu ningi. Ngaashi omulumenhu nomukainhu ovo ve holafane shili hava tokola va hombole, nafye ohole yetu yokuhola Jehova ohai tu linyengifa tu mu liyapulile notu ninginifwe.
2. Omanangeko noupuna elipi Jehova ha yandje kwaavo va ninginifwa?
Ngeenge wa ninginifwa, oho ningi oshilyo shoukwaneumbo waJehova wa hafa. Opo nee oto ka mona ohole yaye meenghedi dihapu, noto ka ehena popepi elela naye shi dulife nale. (Lesha Malakia 3:16-18.) Kakele kokukala u na Jehova e li Xo yoye, oto ka kala u li oshitukulwa shoukwaneumbo, oo wa fikama po movamwatate novamwameme, ovo ve hole Jehova nove ku hole yo. (Lesha Markus 10:29, 30.) Ashike owa pumbwa okukatuka eenghatu donhumba, ofimbo ino ninginifwa. Owa pumbwa okulihonga kombinga yaJehova, okukala u mu hole nosho yo okukala u na eitavelo mOmona waye. Xuuninwa, owa pumbwa okuliyapulila Jehova onghalamwenyo yoye. Ngeenge owa katuka eenghatu odo, ndele to ninginifwa, oto ka kala mondjila oyo tai twala komwenyo waalushe. Eendjovo daKalunga oda ti: “Eninginifo olo tali mu xupififa kunena.”— 1 Petrus 3:21.
KONAKONA MOULE
Konakona kutya omolwashike sha fimana u liyapulile Jehova nou ninginifwe.
3. Atushe otu na okuhoolola kutya ohatu longele lyelye
MuIsrael shonale, ovanhu vamwe ova li hava diladila kutya otava dulu okulongela Jehova nosho yo oshikalunga Baal pefimbo limwe. Ashike Jehova okwa li a tuma omuprofeti waye Elia, opo e ke va pukulule. Lesha 1 Eehamba 18:21, ndele tamu kundafana epulo tali shikula:
-
Ovaisrael ova li tava dulu okuninga ehoololo lilipi?
Ngaashi Ovaisrael, nafye otu na okuhoolola kutya ohatu ka longela lyelye. Lesha Lukas 16:13, ndele tamu kundafana omapulo taa shikula:
-
Omolwashike itatu dulu okulongela Jehova nomunhu wonhumba, ile oshinima shonhumba pefimbo limwe?
-
Ongahelipi hatu dulu okuulikila Jehova kutya otwa hoolola oku mu longela?
4. Dilonga kunghee Jehova e ku ulikila ohole
Jehova okwe tu pa eeshali dihapu diwa. Fyeni oshike hatu dulu oku mu pa? Dana OKAVIDIO.
Omeenghedi dimwe dilipi Jehova e ku ulikila ohole? Lesha Epsalme 104:14, 15 nosho yo 1 Johannes 4:9, 10, ndele tamu kundafana omapulo taa shikula:
-
Eeshali dilipi wa pewa kuJehova wa pandula unene?
-
Eeshali odo ode ku ningifa u kale u mu uditile ngahelipi?
Ngeenge twa pewa oshali oyo tu hole unene, ohatu kala twa hala okuulikila olupandu oo e i tu pa. Lesha Deuteronomion 16:17, ndele tamu kundafana epulo tali shikula:
-
Ngeenge owa diladila koinima aishe oyo Jehova e ku pa, oto ke linyengifwa u mu ningile shike?
5. Okuliyapulila Jehova ohaku etifa omanangeko noupuna mahapu
Ovanhu vahapu ova itavela kutya, ngeenge ove liningile omadina, ve na oilonga iwa, ile oimaliwa ihapu, otava ka kala va hafa. Mbela osho oshoshili ngoo? Dana OKAVIDIO, ndele tamu kundafana omapulo taa shikula.
-
Nonande omudanitanga oo a ulikwa mokavidio okwa li e hole etanga lokeemhadi, omolwashike a li a efa po eifano olo?
-
Okwa li a tokola okuliyapulila Jehova, ndele hatanga lokeemhadi. Mbela oto diladila kutya okwa ninga etokolo li li mondjila? Omolwashike to tile ngaho?
Ofimbo omuyapostoli Paulus ina ninga Omukriste, okwa li ta lalakanene eifano la denga mbada. Okwa li a hongwa omhango yOshijuda komuhongi, oo a li e shiivike nawa. Ashike okwa li a efa po eifano olo, opo a ninge Omukriste. Mbela okwa li e lipa oushima eshi a ninga ngaho? Lesha Ovafilippi 3:8, ndele tamu kundafana omapulo taa shikula:
-
Omolwashike Paulus a ti kutya osho a li ha ningi, ofimbo ina ninga Omukriste, osha li “oimbodi yongaho”?
-
Okwa li a mona omanangeko noupuna elipi?
-
Pokati kokulongela Jehova nokulongifa onghalamwenyo yoye monghedi imwe i lili shilipipo sha denga mbada?
Eshi Paulus a ninga Omukriste, okwa mona shihapu shi dulife osho a kanifa
VAMWE OHAVA TI: “Kashi li pandunge okuliyandjela Kalunga onghalamwenyo yoye.”
-
Omolwashike sha fimana okuliyapulila Jehova?
ENGONGO
Ohole ohai tu linyengifa tu liyapulile Jehova notu ninginifwe.
Eendululo
-
Omolwashike tu na okukala tu hole Jehova noku mu longela nomutima wetu aushe?
-
Jehova oha nangeke noupuna ngahelipi ovo va ninginifwa ve li Eendombwedi daye?
-
Mbela owa hala okuliyapulila Jehova?
TALA OUYELELE WA WEDWA PO
Tala kutya omolwashike omudanitanga nosho yo omushikingalo va hoolola okuliyapulila Jehova.
Ovanyasha tava pula— Ohandi ka longifa ngahelipi onghalamwenyo yange?— Okutala konakudiwa (6:54)
Konakona omatomheno amwe vali e na sha nokuliyapulila Jehova.
“Omolwashike u na okuliyapulila Jehova?” (Oshungonangelo, 1 Januali 2010)
Mokavidio komusika taka shikula, tala nghee vamwe va hafa eshi ve liyapulila Jehova.
Mehokololo “Onda kala oule womido handi lipula kutya ‘Omolwashike tu li po?’” didilika osho sha li she linyengifa omukainhu umwe a mone kutya oshike sha fimanenena monghalamwenyo yaye.
“Ombiibeli ohai lundulula onghalamwenyo yovanhu” (Oshungonangelo, 1 Novemba 2012)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
