OSHILESHWA 52
Omolwashike eholokepo letu nosho yo onghedi yetu yokudjala ya fimana?
Atusheni otu na ehoololo kutya otwa hala okudjala nokuliwapeka monghedi ya tya ngahelipi. Ngeenge otwa wilikwa komafinamhango onhumba Ombiibeli, itashi ke tu kwafela ashike tu hoolole nawa omidjalo detu, ndele ohatu ka hafifa yo Jehova. Natu ka kundafane amwe omomafinamhango oo.
1. Omafinamhango elipi e na oku tu wilika, eshi hatu hoolola kutya otu na okudjala nokuliwapeka ngahelipi?
Otu na “okudjala monghedi yefimaneko, oikutu tai wapalele noi li pandjele,” notu na okukala twa koshoka, opo ovanhu va mone kutya otu li “ovatilikalunga.” (1 Timoteus 2:9, 10) Natu ka kundafane omafinamhango ane taa shikula: (1) Otu na okudjala “monghedi yefimaneko.” Otashi dulika wa mona pokwoongala kutya oshiwana shaJehova ohashi djala meenghedi da yoolokafana, ndele onghedi yetu yokudjala nokuliwapeka momitwe otai ulike kutya otwa fimaneka Kalunga, oo hatu longele. (2) Otu na okudjala “oikutu tai wapalele,” sha hala kutya eholokepo letu kali na okupendula omahalo opamilele, ile li ningife vamwe va kale tava yandje elitulemo la pitilila kufye. (3) Ohatu ulike kutya otu na ‘ondjele’ mokuhenuka okulandula omoode keshe oyo tai kondo. (4) Eholokepo letu oli na alushe okuulika kutya otu li “ovatilikalunga,” opo vamwe va mone kutya ohatu longele Kalunga kashili.— 1 Ovakorinto 10:31.
2. Eholokepo letu otali dulu okukuma ngahelipi ovaitaveli vakwetu?
Nonande otu na emanguluko lokuhoolola osho twa hala okudjala, otu na okudiladila kutya eholokepo letu otali ka kuma ngahelipi vamwe. Inatu hala okupundukifa nande oumwe, ndele ponhele yaasho, otwa hala ‘okuningila vakwetu ouwa, opo tu va pameke.’— Lesha Ovaroma 15:1, 2.
3. Ongahelipi eholokepo letu tali dulu okunanena vamwe kelongelokalunga lashili?
Ohatu kendabala okudjala monghedi yefimaneko pomhito keshe, ndele ohatu yandje elitulemo le likalekelwa koidjalomwa yetu, unene tuu ngeenge hatu i kokwoongala, ile hatu i moilonga yokuudifa. Inatu hala ovanhu va kale va yemba etumwalaka letu la fimana. Ndele ponhele yaasho, otwa hala eholokepo letu li ningife ovanhu va kale va hala okulihonga oshili, notu “fimanekife omahongo aKalunga Omuxupifi wetu.”— Titus 2:10.
KONAKONA MOULE
Konakona nghee hatu dulu okushilipaleka kutya omidjalo nosho yo eholokepo letu otai ningifa vamwe va mone kutya otu li Ovakriste.
Eholokepo letu ohali ulike kutya otwa fimaneka ovo ve na eenghonopangelo, ile hasho. Nonande Jehova oha yandje elitulemo kwaasho shi li momitima detu, eholokepo letu otali dulu yo okuulika kutya otwe mu fimaneka
4. Eholokepo letu liwa otali ulike kutya otwa fimaneka Jehova
Omolwashike sha fimanenena okushilipaleka kutya eholokepo letu oliwa? Lesha Epsalme 47:2, ndele tamu kundafana omapulo taa shikula:
-
Okukala tu shii kutya onghedi yetu yokudjala otai dulu okukuma nghee vamwe va tala ko Jehova oshi na okukuma ngahelipi okudjala kwetu?
-
Mbela osha pumbiwa ngoo okukala hatu lipula shi na sha neholokepo letu, ngeenge tu li pokwoongala, ile hatu kufa ombinga moilonga yokuudifa? Omolwashike to tile ngaho?
5. Nghee to dulu okuhoolola pandunge onghedi yoye yokudjala nokuliwapeka
Kutya nee oikutu yetu oyondilo, ile oyombilixa, oi na okukala ya yela notai wapalele onghalo omo tu li. Lesha 1 Ovakorinto 10:24 nosho yo 1 Timoteus 2:9, 10. Opo nee tamu kundafana kutya omolwashike tu na okuhenuka okudjala oikutu . . .
-
oyo tai ulike kutya katu na ko nasha.
-
oyo ya ponda, hai limonikila, ile tai pendula omahalo omilele.
Nonande Ovakriste kave li koshi yOmhango yaMoses, Omhango oyo otai tu hongo nghee Jehova ha tale ko oinima. Lesha Deuteronomion 22:5, ndele tamu kundafana epulo tali shikula:
-
Omolwashike ovalumenhu ve na okuhenuka okuliwapeka nokudjala va fa ovakainhu nonokutya ovakainhu kave na okudjala va fa ovalumenhu?
Lesha 1 Ovakorinto 10:32, 33 nosho yo 1 Johannes 2:15, 16, ndele tamu kundafana omapulo taa shikula:
-
Omolwashike tu na okushilipaleka kutya eholokepo letu itali pundukifa vamwe momudingonoko, ile meongalo letu?
-
Eenghedi dokudjala nokuliwapeka dilipi di li apeshe moshitukulwa sheni?
-
Mbela oto diladila kutya eenghedi dimwe domwaado otadi wapalele ngoo Omukriste? Omolwashike to tile ngaho?
Ohatu dulu okudjala nokuliwapeka meenghedi da yoolokafana, ndele pefimbo opo tuu opo ohatu hafifa Jehova
VAMWE OHAVA TI: “Ondi na oufemba wokudjala osho nda hala.”
-
Mbela oto tu kumwe naasho? Omolwashike to tile ngaho?
ENGONGO
Ngeenge otwa hoolola pandunge oidjalomwa yetu, ohatu ka ulika kutya otwa fimaneka Jehova nosho yo ovanhu vakwetu.
Eendululo
-
Omolwashike onghedi yetu yokudjala nokuliwapeka ya fimana kuJehova?
-
Omafinamhango amwe elipi taa dulu oku tu wilika, eshi hatu ningi omatokolo e na sha neholokepo letu?
-
Omolwashike eholokepo letu tali dulu okukuma onghedi omo vamwe va tala ko elongelokalunga lashili?
TALA OUYELELE WA WEDWA PO
Tala kutya onghedi yoye yokudjala otai ka kuma ngahelipi etaleko lavamwe li na sha naave.
“Omidjalo dange ohadi monika ngahelipi?” (Oshitukulwa shi li ko jw.org)
Lihonga kutya omolwashike shi li pandunge okudiladila koilanduliko, ofimbo ino shangwa otattoo.
“Ombiibeli oya popya shike kombinga yeetattoo?” (Oshitukulwa shi li ko jw.org)
Konakona omafinamhango a wedwa po, oo taa dulu oku ku wilika, eshi to ningi omatokolo.
“Mbela onghedi yoye yokudjala otai fimanekifa ngoo Kalunga?” (Oshungonangelo, Septemba 2016)
Ongahelipi omukainhu umwe, oo a li a hala okuhafifa Kalunga, e lihonga okutambula ko onghedi yavamwe yokudjala?
“Onda li handi pundukifwa konghedi yavamwe yokudjala nokuliwapeka” (Kala oupafi!, 22 Desemba 2003)
Otashi dulika yo u hafele oikundafanwa ei
OMAPULO OO HAA PULWA LUHAPU
Ekonakonombiibeli olo hali ningwa kEendombwedi daJehova oshike?
Peenghundafana doshali odo hadi ningwa kEendombwedi daJehova, oto dulu okulongifa etoloko lOmbiibeli keshe. Owa manguluka okushiva oukwaneumbo weni aushe, ile keshe umwe oo wa hala a kale po.
