OSHIWEDELWAKO
Finda ounghundi wokulidanena koilyo yoludalo
Okulidanena koilyo yoludalo oku li onghedindjikilile oyo inai hokiwa kuKalunga, oyo hai ningifa omunhu a kale e na oikala yokulihola mwene nokunyateka omadiladilo aye. * Omunhu oo he lidanene koilyo yoludalo ota dulu yo okukala a tala ko vamwe ve li ashike oinima yokulihafifa pamilele. Omunhu a tya ngaho iha tale ko omilele di li oshinima shopahole, ndele ohe di tale ko ashike di li oshinima shokulihafifa pakafimbo opo a pepelelwe komahalo opamilele. Ndele epepelelo la tya ngaho olopokafimbo ashike. Paulelalela, okulidanena koilyo yoludalo ohaku pendula omahalo oo taa dulu okutwala ‘moluhaelo, monyata, nosho yo molwisho loipala,’ ponhele yokudipaa oinhimbu yetu opo tuha lalakanene oinima ya tya ngaho. — Ovakolossi 3:5.
Omuyapostoli Paulus okwa ti: “Ovaholike, tu likosheni kedilo keshe naali lombelela naali lomhepo, fye tu wanifeni eyapulo mokutila Kalunga.” (2 Ovakorinto 7:1) Ngeenge oshidjuu kwoove okudulika keendjovo odo, ino teka omukumo. Jehova oku “yadi ekufilo” nokwe lilongekida alushe oku ku kwafela. (Epsalme 86:5; Lukas 11:9-13) Eshi omutima woye tau ku pe oushima nosho yo eshi to ningi eenghendabala u efe po onghedindjikilile oyo, otashi ulike kutya ou na oikala iwa, nonande omafimbo amwe oho dopa okulipangela. Dimbuluka yo kutya ‘Kalunga oku dule omitima detu, noinima aishe oku i shii.’ (1 Johannes 3:20) Kalunga iha tale ashike komanyono etu, ndele oha tale komaukwatya etu mawa. Osho ohashi mu dulifa a pwilikine nolukeno komailikano etu eshi hatu ilikana twa mana mo, hatu mu pula e tu file onghenda. Onghee hano, ino loloka okwiilikana kuKalunga we lininipika nowa mana mo, ngaashi ashike okaana haka i kuxe ngeenge ke li moudjuu. Jehova ote ke ku pa eliudo la koshoka. (Epsalme 51:3-14, 19; Jesaja 1:18) Ndele owa pumbwa okukatuka eenghatu dokondadalunde metwokumwe nomailikano oye. Pashihopaenenwa, kendabala okuhenuka okutala omafano oipala oludi keshe nosho yo ookaume vai. *
Ngeenge ou na oupyakadi wokulidanena koilyo yoludalo tau twikile, kundafana oshinima sha tya ngaho nomudali woye Omukriste ile nakaume koye a pyokoka pamhepo nomunahole. * — Omayeletumbulo 1:8, 9; 1 Ovatessaloniki 5:14; Titus 2:3-5.
^ okat. 3 Okulidanena koilyo yoludalo otaku ulike konghedi omo omunhu ha kala ta fengafenga koilyo yaye yoludalo opo e liudife nawa onga omunhu tai momilele.
^ okat. 4 Oilyo yomaukwaneumbo mahapu ohai tula eekombiyuta dayo peenhele opo tapa dulu okumonika kwaaveshe, opo shi i kwafele. Kakele kaasho, omaukwaneumbo amwe ohaa lande eeprograma dokombiyuta odo hadi koshola meekombiyuta oinima oyo inai koshoka. Ndele nande ongaho, eeprograma da tya ngaho itadi dulu okulineekelwa filufilu.
^ okat. 5 Opo u mone omaetepo taa kwafa kombinga yanghee to dulu okufinda ounghundi wokulidanena koilyo yoludalo, tala oshitukulwa “Ovanyasha tava pula . . . Ongahelipi handi dulu okufinda onghedindjikilile ei?” mo-Awake! yaNovemba 2006, nosho yo embo Questions Young People Ask—Answers That Work, Embo 1, epandja 178-182.
