Ohashi tu yahameke neenghono ngeenge omupambele wetu ile kaume ketu kopofingo a kondwa mo meongalo omolwokuhelivela ombedi. Onghedi omo hatu linyenge kewiliko lOmbibeli li na sha nokukonda mo ovanyoni meongalo otai dulu okuulika kutya otu hole Kalunga shi fike peni nonokutya otu li ovadiinini kelongekido laye shi fike peni. * Konakona omapulo amwe oo haa holoka po kombinga yovanhu ovo va kondwa mo meongalo.

Otu na okuungaunga ngahelipi novanhu ovo va kondwa mo meongalo? Ombibeli oya ti: “Ngenge pe na ou ha ifanwa omumwaxo, ye omuhaeli ile omunalwisho ile omukaleli woikalunga ile omusheki ile ongholwe ile omunyeki, mu ha endafane naye, nye mu ha lye nandenande naye.” (1 Ovakorinto 5:11) Ombibeli oya popya natango kutya omunhu keshe oo ‘iha kala mehongo laKristus’ “inamu mu tambula meumbo, nye inamu mu kunda. Osheshi ou te mu kundu, oye ta kwatafana noilonga yaye ii.” (2 Johannes 9-11) Katu na okukundafana oinima i na sha nelongelokalunga letu nomunhu oo a kondwa nokatu na okweendafana naye. Oshungonangelo yOshiingilisha yo 15 Septemba 1981, epandja 25, oya ti: “Okupopifa ashike omunhu ngahenya otaku dulu okutwala meenghundafana noshi na oupu mu hovele nokuli okupanga oukaume. Mbela otwa hala okukala hatu popi nomunhu oo a kondwa nokupanga oukaume naye?”

Osha pumbiwa ngoo shili okuhenuka filufilu okweendafana nomunhu oo a kondwa mo meongalo? Heeno, osha pumbiwa omolwomatomheno mahapu. Etomheno lotete, okuhenuka okweendafana nomunhu oo a kondwa otashi ulike kutya otu li ovadiinini kuKalunga nosho yo kEendjovo daye. Ihatu dulika ashike kuKalunga ngeenge shipu, ndele ohatu dulika yo kuye nongeenge shidjuu. Ohole yetu yokuhola Kalunga ohai tu linyengifa tu dulike koipango yaye aishe, notwa dimina kutya oku li omuyuki nomunahole nonokutya eemhango daye otadi tu etele ouwa muhapu. (Jesaja 48:17; 1 Johannes 5:3) Etomheno etivali, okuhenuka okweendafana nomunyoni oo ine livela ombedi ohashi tu amene nohashi amene yo eongalo alishe kenwefemo lii lopamhepo nolopaenghedi nohashi kaleke po edina liwa leongalo. (1 Ovakorinto 5:6, 7) Etomheno etitatu, okudulika kwetu filufilu  komafinamhango Ombibeli otaku dulu nokuli okweetela ouwa omunhu oo a kondwa mo meongalo. Ngeenge otwa yambidida etokolo olo la ningwa kokomitiye yopamhangu, ohatu dulu okulinyengifa omutima womunyoni oo ina tambula ko ekwafo olo a li ta pewa kovakulunhuongalo. Ngeenge omunhu oo a kondwa okwa kala iha endafana vali novaholike vaye, otashi dulu oku mu kwafela e ‘lialuluke,’ noku mone kutya okwa nyona sha kwata moiti ndele ta katuka eenghatu a alukile kuJehova. — Lukas 15:17.

Ohatu ka ninga po shike ngeenge omupambele wetu umwe okwa kondwa mo meongalo? Monghalo ya tya ngaho, omolwekwatafano lopofingo olo la kala pokati koilyo youkwaneumbo, otashi dulu okukala eshongo linene okuulika oudiinini wetu kuJehova. Mbela otu na okuungaunga ngahelipi nomupambele wetu oo a kondwa mo meongalo? Itatu dulu okukundafana onghalo keshe oyo tashi dulika i holoke po, ndele natu ka yandje elitulemo keenghalo dopavali odo hadi holoka po luhapu.

Efimbo limwe, otashi dulika hamu di meumbo limwe nomupambele oo a kondwa. Molwaashi ngeenge omunhu a kondwa itashi ti kutya ekwatafano laye noukwaneumbo ola xula po, omunhu a tya ngaho ota dulu okutwikila okulonga oilonga yakeshe efiku moukwaneumbo nosho yo okuninga oinima imwe i lili noku lili pamwe noukwaneumbo. Ndele nande ongaho, omunhu oo a kondwa ke na vali ekwatafano lopamhepo noilyo youkwaneumbo oyo i li Ovakriste omolwonghatu oyo a katuka. Onghee hano, oilyo youkwaneumbo oyo idiinini itai dulu vali okukundafana naye kombinga yoinima yopamhepo. Pashihopaenenwa, ngeenge oukwaneumbo tau ningi elongelokalunga pamwe, ndele omunhu oo a kondwa opo e li, ke na okukufa ombinga meenghundafana da tya ngaho. Ndele ngeenge omunhu oo a kondwa okaana kanini, ovadali vako ove na natango oshinakuwanifwa shoku ka honga noku ka pa outekuduliko. Onghee hano, ovadali ovanahole otava dulu okukonakona Ombibeli nokaana kavo. * — Omayeletumbulo 6:20-22; 29:17.

Efimbo limwe, omunhu oo a kondwa otashi dulika a kale iha di meumbo limwe noukwaneumbo wonhumba wovapambele vaye. Nonande otashi dulika oukwaneumbo oo u kale wa pumbwa okukundafana kanini nomupambele oo a kondwa peemhito dimwe opo va kundafane oinima yonhumba oyo va pumbwa okukundafana ve li ovapambele,  eenghundafana da tya ngaho kadi na okukala oshinima osho hashi ningwa ondjikilile. Oilyo idiinini youkwaneumbo wopaKriste kai na okukonga omalipopilo opo i endafane nomupambele oo a kondwa ndele iha di meumbo lavo. Ponhele yaasho, oudiinini wayo kuJehova nosho yo kehangano laye ou na oku i linyengifa i yambidide elongekido lopamishangwa li na sha nokukonda mo ovanyoni meongalo. Oudiinini wayo otau dulu okukwafela omunyoni a mone ouwa moutekuduliko oo a pewa keongalo. * — Ovaheberi 12:11.