Eshi wa lesha okambo aka, mbela kwa li wa kumwa okumona kutya Ombiibeli ohai popi oinima oyo i li metwokumwe nounongononi washili? Ovanhu vahapu ohava kuminwa oshinima osho. Ohava kala yo va kumwa okushiiva kutya Ombiibeli itai popile oinima ihapu oyo hai popiwa komalongelokalunga. Pashihopaenenwa, omalongelokalunga amwe ohaa hongo kutya Kalunga okwa shita oinima aishe meshito, mwa kwatelwa oinima i na omwenyo, moule womafiku ahamano kondadalunde. Ndele oushili wo vene oyoo kutya Ombiibeli itai pataneke omatengeneko ovanongononi e na sha nokutya ewangadjo nosho yo edu oya kala ko efimbo li fike peni. a

Natango, nonande Ombiibeli oya popya ashike pauxupi shi na sha nanghee oinima i na omwenyo ya shitwa, otashi yandje omhito kovanongononi va nongonone oinima i lili noku lili. Ombiibeli oya ti kutya Kalunga okwa shita oinima i na omwenyo “pamaludi ayo.” (Genesis 1:​11, 21, 24) Etumbulo olo otashi dulika itali tu kumwe nomadiladilo amwe ovanongononi, ndele oushili wetumbulo olo owa kolekwa paunongononi. Ondjokonona younongononi otai ulike kutya omadiladilo, ile omahongo amwe ounongononi ohae uya taa i, ndele oshili ihai lunduluka.

Ndele ope na ovanhu vahapu ovo inava hala okukonakona osho Ombiibeli tai hongo, molwaashi ova kenyanana omalongelokalunga. Ova kenyanyana koihelele nokoulingilingi womalongelokalunga, naashi haa xwaxwameke oita. Ndele mbela osha yuka ngoo okutokola Ombiibeli she likolelela kelihumbato lavamwe ovo hava ti kutya ova itavela mOmbiibeli? Natu shi diladile ngaha, ovanongononi vahapu ovanamitimadiwa ova yemba ovo hava longifa ehongo loevolusi okuxumifa komesho oukwamuhoko nosho yo elongifo leenghono. Mbela otashi ka kala ngoo sha yuka okutokola ehongo loevolusi omolwelihumbato lovanhu ovo? Otashi ka kala pandunge okukonakona ehongo olo meyukililo nokutala ngeenge ope na oumbangi tau li yambidida.

Ohatu ku ladipike u konakone yo Ombiibeli sha yukilila. Oto ke shi limonena kutya osho tai hongo osha yooloka ko kwaasho hashi hongwa komalongelokalunga mahapu. Ombiibeli itai xumifa komesho oita nelongifo leenghono, ndele otai hongo ovapiya vaKalunga vaha kufe ombinga moita nova efe po outondwe, molwaashi ohau etifa elongifo leenghono. (Jesaja 2:2-4; Mateus 5:43, 44; 26:52) Ombiibeli otai ladipike ovanhu va longife eendunge dokuyoolola, opo va kale tava longele Kalunga ve na eitavelo la kanghamena koumbangi washili, ponhele ashike yokwiitavela nokukomangela oinima ngahenya nopehe na oumbangi. (Ovaroma 12:1; Ovaheberi 11:1) Ponhele yoku tu shololifa tuha pule omapulo, Ombiibeli ohai tu ladipike tu konge omanyamukulo e na sha nomapulo taa limbililike monghalamwenyo.

Pashihopaenenwa, mbela owe lipulile nale kutya, ‘Ngeenge Kalunga oko e li, omolwashike a efa pa kale oukolokoshi?’ Ombiibeli oya nyamukula epulo olo nosho yo amwe monghedi tai mbilipaleke. b Onghee ohatu ku ladipike u i konakone, opo u mone kutya oshili oilipi. Kape na omalimbililo, oto ka mona omanyamukulo makumwifi, ahokwifi, e li pandunge nokwa kanghamena koumbangi washili. Osho osho shi li ngaho, molwaashi Ombiibeli oya shangifwa kOmushiti.