OSHITUKULWA 1
Okudja peshito fiyo opEyelu laNoa
Eulu nedu ola dja peni? Etango, omwedi, neenyofi nosho yo oinima ihapu oyo i li kombada yedu oya shitwa kulyelye? Ombibeli otai yandje enyamukulo la yela kutya oinima aishe oyo oya shitwa kuKalunga. Nomolwaasho, embo eli ola hovela nomahokololo Ombibeli e na sha neshito.
Ohatu ke lihonga kutya tetetete Kalunga okwa shita oishitwa yopamhepo, sha hala kutya, ovanhu ve mu fa. Oishitwa oyo ohai ifanwa ovaengeli. Konima yefimbo, Kalunga okwa ka shita edu opo li kalwe kovanhu ngaashi fye. Okwa shita omulumenhu nomukainhu ndele te va tula moshikunino shiwa neenghono. Ovanhu ovo votete ova li Adam naEva. Ndele Adam naEva ova ka nyona kuKalunga nova li va tokolelwa efyo.
Okudja eshi Adam a shitwa fiyo osheshi Eyelu linene lopefimbo laNoa le uya, opa pita omido 1 656. Momukokomoko wefimbo olo, opa li ovanhu vahapu ovo va li tava longo owii. Meulu omwa li oishitwa yopamhepo Satana novaengeli vaye ovanawii. Kombada yedu okwa li Kain novanhu vakwao vahapu ovo va li hava longo owii. Vamwe vomuvo ova li nokuli ovalumenhu ovanaenghono. Ndele kombada yedu okwa li yo ku na ovanhu ovo va li hava longo ouwa, ngaashi Abel, Henok naNoa. Moshitukulwa eshi shotete, ohatu ke lihonga kombinga yovanhu aveshe ovo nosho yo kombinga yoiningwanima oyo ya ningwa pefimbo lavo.
MOSHITUKULWA ESHI
EHOKOLOLO 1
Nghee Kalunga a hovela okushita oinima
Ehokololo li na sha neshito olo li li membo laGenesis oli pu okuudiwa ko nolitunhula nokuli nokounona vanini.
EHOKOLOLO 2
Oshikunino shiwa
Ngaashi sha popi muGenesis, Kalunga okwa shita oshikunino shaEden shi li onhele ye likalekelwa. Kalunga okwa hala edu alishe li kale ngaashi oshikunino osho shiwa.
EHOKOLOLO 3
Ovanhu votete
Kalunga okwa shita Adam naEva, ndele te va tula moshikunino shaEden. Ova li ovalihomboli votetetete.
EHOKOLOLO 4
Adam naEva ova li va tewa mo meumbo lavo
Embo laGenesis otali tu lombwele nghee oparadisa ya kana.
EHOKOLOLO 5
Onghalamwenyo ya ninga idjuu
Adam naEva ova li va shakeneka omaupyakadi mahapu okudja eshi va tewa mo moshikunino. Ngeno ova dulikile kuKalunga, ngeno ova kala tava hafele onghalamwenyo pamwe novana vavo.
EHOKOLOLO 6
Omonamati muwa nomonamati mwii
Ehokololo laKain naAbel olo li li muGenesis otali tu hongo kutya otu na okukala ovanhu va tya ngahelipi nosho yo kutya oikala ilipi tu na okulundulula diva fimbo inai mena omidi momitima detu.
EHOKOLOLO 7
Omulumenhu omuladi
Oshihopaenenwa shaHenok otashi ulike kutya oto dulu okulonga osho sha yuka nokuli nonande ovanhu aveshe ovo ve ku dingilila otava longo owii.
EHOKOLOLO 8
Ovatongolume ovo va li kombada yedu
Genesis etukulwa 6 ote tu lombwele kombinga yovatongolume ovo va li hava hepeke ovanhu. Ovatongolume ovo ova li va dalwa kovaengeli ovo va dile meulu nokudjala omalutu ovanhu ndele tave uya kombada yedu.
EHOKOLOLO 9
Noa ta tungu ongulu yomomeva
Noa noukwaneumbo waye ova li va xupa pEyelu molwaashi ova li va dulika kuKalunga nonande ovanhu vamwe kava li va pwilikina.
EHOKOLOLO 10
Eyelu linene
Ovanhu tava yolo etumwalaka laNoa lelondwelo. Ashike kava li tava yolo eshi odula ya hovela okuloka! Lihonga nghee ongulu yomomeva ya xupifa Noa noukwaneumbo waye nosho yo oinamwenyo ihapu.
