MBELA ou shi shii kutya ovalumenhu ovo Jakob ta popi navo ovapeni? Konima eshi Jakob a enda omafiku mahapu, okwe ke uya pomufima opo a shakena novalumenhu ovo. Ovalumenhu ovo ova li tava lifa eedi davo. Jakob okwe va pula a ti: ‘Ohamu di peni?’

Ove mu nyamukula tava ti: ‘Ohatu di kuHaran.’

Jakob okwe va pula natango a ti: ‘Laban omu mu shii?’

Ovalumenhu ove mu nyamukula tava ti: ‘Heeno, otu mu shii. Tala, omonakadona waye umwe, Rakel, oye oo ta di kwinya te uya okunwefa eedi dambulavo.’ Mbela Rakel ou mu wete mefano olo te uya okunwefa eedi dambulavo?

Eshi Jakob a mona Rakel ta di kwinya needi daxekulu Laban, okwa ya ndele ta alangatifa po emanya pomufima nokuxwiila eedi daLaban. Opo nee Jakob okwa xupita Rakel noku mu lombwela kutya oye lyelye. Rakel okwa li a hafa neenghono. Eshi a ya keumbo okwa lombwela xe Laban kombinga yaJakob.

Laban naye okwa li a hafa neenghono eshi Jakob e uya okukala hadi meumbo lavo. Konima yefimbo, Jakob okwa li a pula a hombole Rakel. Laban okwa li e shi hafela neenghono. Ndelenee Laban okwa li a lombwela Jakob e mu longele omido heyali opo e mu pe Rakel. Molwaashi Jakob okwa li e hole neenghono Rakel, okwa longa oule womido adishe odo a pulwa a longe. Ndele mbela ou shi shii kutya oshike sha ka ningwa po eshi efimbo lokuhombola Rakel la fika?

Laban okwa li a pa Jakob a hombole omonakadona waye woshiveli, Lea, ponhele yokuyandja Rakel. Jakob okwa li a dimina a longele natango Laban omido heyali opo a pewe Rakel a ninge omukulukadi waye. Pefimbo opo, Kalunga okwa li a pitika ovalumenhu va hombole ovakainhu ve dule puumwe. Ashike kunena, Ombibeli otai ti kutya omulumenhu oku na ashike okuhombola omukainhu umwe aeke.