KONIMA eshi pa pita omido dihapu, ovanamati vaNoa ova ka kala ve na ounona vahapu. Ounona vavo navo ova enda tava kulu nova ka dala yo ounona vahapu. Kungaho, ovanhu ova li va hapupala diva kombada yedu.

Opa li omutekulululwa waNoa wedina Nimrod. Nimrod okwa li omukolokoshi. Okwa li omukongo woifitukuti, nokwa li ha dipaa ovanhu noinamwenyo. Okwa li yo e lininga ye mwene ohamba, opo a pangele ovanhu vakwao. Ndele Kalunga ka li a hokwa nandenande oikala yaNimrod.

Pefimbo opo, ovanhu ova li hava popi elaka limwe. Nimrod okwa li a hala ovanhu va kale ashike ponhele imwe opo a dule oku va pangela. Mbela ou shi shii kutya oshike osho a li a ninga po? Okwa li a lombwela ovanhu va tunge oshilando noshungo inene. Oto dulu oku va mona mefano olo li li pedu eshi va li tava foloma eedopi.

Jehova Kalunga ka li a panda ondunge oyo. Okwa li a hala ovanhu ve lihanene kombada yedu alishe. Ndele ovanhu ova li va lombwelafana tava ti: ‘Ileni tu litungileni oshilando noshungo ileile ya twa meulu. Natu liningileni edina!’ Ovanhu ova li va hala okulikongela efimano vo vene ponhele yokufimanekifa Kalunga.

Nomolwaasho Kalunga okwa li a xulifa po oilonga yavo yokutunga oshungo. Mbela ou shi shii kutya oshike osho Kalunga a li a ninga po? Okwa li a dongakanifa elaka olo va li hava popi, ndele tava hovele okupopya omalaka a yoolokafana. Kungaho, ovatungi kava li vali tava dulu okuudafana. Omolwaasho, oshilando osho osha ka lukwa Babel ile Babilon, osho tashi ti: “Edundakano.”

Okudja opo ovanhu ova fiya po Babel. Ova li ve litukaula meengudu she likolelela ko-malaka ndele tave lihanene kombada yedu alishe.