MOSES okwa li a halelela okutwala oshiwana shaIsrael muKanaan. Onghee hano, okwa indila Jehova a ti: ‘Jehova pitike nge ndi tauluke omulonga waJordan ndi ka tale edu olo liwa.’ Ndele Jehova okwe mu lombwela a ti: ‘Nashi xulile opo. Ino shi endulula vali!’ Mbela ou shi shii kutya omolwashike Jehova a nyamukula Moses ngaho?

Dimbuluka kutya pomhito imwe Moses naAron kava li va fimanekifa Jehova. Moses naAron kava li va lombwela ovanhu kutya Jehova oye a li te ke va kungulukifila omeva okudja memanya. Ponhele yaasho, ova li ve linoma kutya ovo tava ka kungulukifila ovanhu omeva okudja memanya olo. Opo nee, Moses okwa denga emanya. Nomolwaasho, Jehova okwa li a lombwela Moses kutya ita ka ya mo medu laKanaan.

Konima yeemwedi donhumba eshi Aron a fya, Jehova okwa lombwela Moses a ti: ‘Kufa Josua ndele to mu twala komupristeri Eleasar moipafi yovanhu, ndele to lombwele ovanhu aveshe kutya Josua oye omuwiliki wavo mupe.’ Moses okwa li a ninga naanaa ngaashi Jehova e mu lombwela, ngaashi u shi wete mefano olo.

Jehova okwa li a lombwela Josua a ti: ‘Kala wa pama; ino kala wa tila. Oto ka twala Ovaisrael medu laKanaan olo nde va udanekela, nohandi ka kala pamwe naave.’

Lwanima, Jehova okwa li a lombwela Moses a londe koxulo yomhunda yaNebo oyo ya li medu lOvamoab. Moses okwa li ta dulu okutala edu liwa laKanaan olo la li kombada yomulonga waJordan. Jehova okwa ti kuMoses: ‘Edu olo olo nda udanekela oludalo laAbraham, Isak naJakob. Onde ku pa omhito u li tale, ndele ito ka ya mo.’

Moses okwa fila koxulo yomhunda yaNebo. Okwa fya e na omido 120, ndele okwa li e na natango oukolele nokwa li ha mono ko nawa. Ovaisrael ova li va nyika oluhodi neenghono nova li tava lili eshi Moses a fya. Ndele nande ongaho, ova li va hafa molwaashi ova li ve na omuwiliki mupe, Josua.