NGEENGE owa tale mOmbibeli, oto ka hanga mo embo ledina Rut. Embo olo otali hokolola ondjokonona youkwaneumbo wonhumba oo wa li ko eshi Israel sha li tashi wilikwa kovatokolipangeli. Rut okwa li omukainhu omunyasha a dja kedu lOvamoab. Ka li Omuisrael. Ndele eshi e lihonga kombinga yaJehova Kalunga, okwa ka kala e mu hole neenghono. Naomi okwa li omukulukadi womukulunhu. Oye a li a kwafela Rut e lihonge shihapu kombinga yaJehova.

Naomi okwa li Omuisrael. Naomi nomushamane waye novanamati vavo vavali ova li va tembukila kedu lOvamoab, eshi muIsrael mwa li mu na ondjala. Konima yefimbo omushamane waNaomi okwa fila medu laMoab. Lwanima, ovanamati vaNaomi ova ka hombola oukadona vavali Ovamoab. Omadina oukadona ovo oRut naOrpa. Ndele konima yomido 10 lwaapo, ovanamati vaNaomi navo ova ka fya. Osho kasha li tuu sha nyikifa Naomi noitenya yaye ivali oluhodi! Mbela Naomi okwa ka ninga po shike?

Efiku limwe, Naomi okwa li a tokola okushuna kOvaisrael vakwao. Okwa li pe na oshinano shile neenghono. Rut naOrpa ova li va hala okukala pamwe naNaomi, nomolwaasho ova li va tokola okuya pamwe naye. Ndele konima yefimbo eshi va enda oshinano, Naomi okwa fikama ndele ta lombwele ovakainhu ovo, a ti: ‘Shuneni komaumbo ovadali veni.’

Naomi okwe va xupita ndele te va lekele va shune. Ovakainhu ovo ova hovela okulila, molwaashi ova li ve hole Naomi neenghono. Ove mu nyamukula tava ti: ‘Ahowe! Itatu shuna, ohatu i pamwe naave koshiwana shoye.’ Ndele Naomi okwa ti kuvo: ‘Omu na okushuna oukadona vange. Oshixwepo mu shune komaumbo ovadali veni.’ Eshi Orpa a uda eendjovo odo, okwa shuna keumbo lavo, ndele Rut ina shuna.

Opo nee Naomi okwa fikama vali, ndele ta lombwele Rut ta ti: ‘Orpa ota shuna keumbo. Indeni mu ka ye pamwe namukweni keumbo.’ Ndele Rut okwa nyamukula a ti: ‘Ino kondjifa nge ndi shune! Efe nge ndi ye pamwe naave. Apa to i, naame opo ngoo handi i, naapa to ka kala, naame opo handi ka kala. Oshiwana shoye otashi ka ninga yo oshiwana shange, naKalunga koye ota ka ninga Kalunga kange. Apa to file, naame opo handi file nopo handi ka pakwa.’ Konima eshi Rut a popya eendjovo odo, Naomi ina kondjifa vali Rut a shune keumbo.

Hauxuuninwa, Naomi naRut ova li va fika medu lOvaisrael. Ova li ve uya okukalelela medu olo. Diva, Rut okwa hovela okukala ta pupudulula oilya momapya, molwaashi osha li efimbo lokuteya. Omulumenhu umwe wedina Boas okwa li a pitika Rut a kale ta pupudulula oilya mepya laye. Mbela ou shi shii kutya ina yaBoas olyelye? Boas okwa dalwa kuRahab, oo a li a xupa muJeriko.

Efiku limwe Boas okwa lombwela Rut a ti: ‘Onda uda ondjokonona yoye aishe nouwa oo wa longela Naomi. Ondi shi shii kutya osha enda ngahelipi u fiye po ovadali voye noshilongo sheni nonghee we uya okukala mokati kovanhu ovo ino shiiva nande onale. Jehova ne ku nangeke noupuna.’

Rut okwa nyamukula Boas a ti: ‘Omwene wange, owa fila nge onghenda. Owa hekeleka nge eshi wa popya naame monghedi iwa.’ Boas okwa li e hole Rut neenghono. Konima yokafimbo, Boas okwa ka hombola po Rut. Osho kasha li tuu sha hafifa Naomi! Ndele Naomi okwa ka kala a hafa neenghono unene tuu eshi Boas naRut va dala okamonamati kavo koshiveli, kedina Obed. Obed okwa ka ninga xekulu yaDavid. Ohatu ke lihonga shihapu kombinga yaDavid momahokololo e li komesho.