TALA kovanhu ovo tava sheke omulumenhu oo omunyasha! Mbela ou shi shii kutya omulumenhu oo oye lyelye? Edina laye oJeremia. Jeremia okwa li omuprofeti waKalunga a tongomana.

Diva konima eshi Josia a li a hovela okuhanauna po oihongwafano muIsrael, Jehova okwa li a lombwela Jeremia a ninge omuprofeti waYe. Ashike Jeremia okwa li ta diladila kutya omunini natango okuninga omuprofeti. Ndelenee Jehova okwa li e mu udanekela kutya ote ke mu kwafela.

Jeremia okwa li a pulwa a lombwele Ovaisrael va efe okulonga owii. Okwe va lombwela a ti: ‘Oikalunga oyo hai ilikanwa koiwana yovapaani kai fi ookalunga vashili.’ Ndele Ovaisrael vahapu ova li tava diladila kutya oshixwepo okulongela oikalunga shi dulife okulongela Kalunga kashili Jehova. Eshi Jeremia a li ta londwele ovanhu kutya Kalunga ote ke va handukila omolwoilonga yavo ii, ovanhu ova li ashike tave mu yolo.

Josia okwa ka fya konima yomido donhumba, nomonamati waye Jojakim oye a li a ninga ohamba konima yeemwedi nhatu eshi xe a fya. Ndele omuprofeti Jeremia okwa twikila okulombwela ovanhu ta ti: ‘Jerusalem otashi ka hanaunwa po ngeenge itamu lundulula eendjila deni dii.’ Ovapristeri ova kwata Jeremia nokwiingida pombada tava ti: ‘Ove ou na okudipawa omolweendjovo odo to popi.’ Opo nee, ova ya kovakulunhu vomuIsrael, ndele tava ti: ‘Jeremia na dipawe, molwaashi ota fingi oshilando shetu.’

Mbela Jeremia okwa li e linyenga ngahelipi? Jeremia ka li a tila nandenande. Okwa twikila okulombwela ovanhu aveshe ta ti: ‘Jehova oye a tuma nge ndi mu lombwele kutya ngeenge itamu lundulula onghedi yeni ii yokukalamwenyo, ota ka hanauna po Jerusalem. Ndele kaleni mu shi shii kutya: Ngeenge omwa dipaa nge, omwa dipaa omunhu ehe na etimba.’

Ovakulunhu inava dipaifa nande Jeremia, ashike Ovaisrael kava li va lundulula oikala yavo ii. Lwanima ohamba yaBabilon, Nebukadnesar, oye ke uya okuhomona Jerusalem. Hauxuuninwa, Nebukadnesar okwa kwata ko Jerusalem, ndele ta ningi Ovaisrael ovapika vaye. Ovaisrael omayovi mahapu ova li va twalwa moukwatwa kuBabilon. Diladila ashike ngeno wa kufwa meumbo leni kovanailongo, ndele to twalwa koshilongo nghee ngoo wa dalelwe u ende ko!