TALA nhumbi ovanailonga aveshe ve lipyakidila! Ovaisrael otava tungu ekuma laJerusalem. Opa li pa pita omido 152 okudja eshi Nebukadnesar a li a hanauna po Jerusalem. Nebukadnesar okwa li yo a teyaula po ekuma olo la li la dingilila oshilando nokwa xwika po omivelo dasho. Ndele Ovaisrael kava li va tungulula ekuma loshilando eshi va alukila muJerusalem va dja moukwatwa kuBabilon.

Mbela oto diladila kutya ovanhu ovo ova li ve udite ngahelipi eshi va kala moshilando oule womido adishe odo ndele inashi dingililwa kekuma? Heeno, kava li ve udite va amenwa, molwaashi ovatondi vavo ova li tava dulu oku va ponokela noupu. Hauxuuninwa, omulumenhu oo u wete mefano olo, Nehemia, okwe ke uya ndele ta kwafele oshiwana shi tungulule ekuma loshilando. Mbela ou shi shii kutya Nehemia olyelye?

Nehemia okwa li Omuisrael a dile koshilando hashi ifanwa Susan, oko kwa li haku di Mordekai naEster. Okwa li yo ha longo mombala, nomolwaasho otashi dulika Nehemia a li kaume kaMordekai nomumbada Ester. Ashike Ombibeli inai tumbula nande kutya Nehemia okwa li ha longele omushamane waEster, ohamba Ahasveros. Ndele oya ti kutya okwa li ha longele ohamba Artasasta, oo a pingena po Ahasveros.

Dimbuluka kutya Artasasta oye ohamba iwa oyo ya pele Esra oimaliwa ihapu oyo a li a ka tungifa nayo otembeli muJerusalem. Ndele nande ongaho, Esra ka li a tungifa ekuma loshilando olo la li la teka po. Natu ka taleni kutya osha li sha enda ngahelipi opo Nehemia a ka longe po oilonga oyo.

Opa li pa pita omido 13 okudja eshi ohamba Artasasta ya li ya pa Esra oimaliwa a ka wapeke otembeli. Pefimbo olo, Nehemia okwa li omupindili wohamba. Kungaho, osha yela kutya okwa li ha pindile ohamba omaviinyu nokwa li ha fi oshisho okukwata mo keshe oo ta kendabala okupa ohamba oudiyo. Osho osha li oshilonga sha fimanenena!

Efiku limwe, omupambele waNehemia wedina Hanani okwa li e uya okutalela po Nehemia e li novalumenhu vakwao vamwe. Ova li va hokololela Nehemia kombinga yomaupyakadi oo a li a taalela Ovaisrael nosho yo kutya ekuma laJerusalem inali tungwa natango. Omahokololo a tya ngaho okwa li a udifa nai Nehemia nokwa li a shiivifila Jehova omaupyakadi oo okupitila meilikano.

Efiku limwe, ohamba oya li ya didilika kutya kutya Nehemia ina hafa nande. Onghee hano, oye mu pula tai ti: ‘Omolwashike to monika ngoo wa fa wa nyika oluhodi?’ Nehemia okwa lombwela ohamba kutya okwa nyika oluhodi molwaashi Jerusalem oshi li monghalo ififa ohoni, nokuli nekuma loshilando inali tungwa. Opo nee ohamba oye mu pula tai ti: ‘Owa hala ndi ku ningile shike?’

Nehemia okwa nyamukula a ti: ‘Pitike nge ndi ye kuJerusalem opo ndi ka tungulule ekuma lasho.’ Ohamba Artasasta oya li ohamba inanghenda. Onghee hano, oya li ya lombwela Nehemia kutya ota dulu okuya, noya li ye mu pa oiti yoku ka longifa moilonga yokutunga ekuma. Eshi Nehemia a fika moshilando, okwa lombwela ovanhu ondungediladilo yaye. Ovanhu ova li va panda ondungediladilo oyo, nova ti: ‘Natu hoveleni okutunga.’

Eshi ovatondi vOvaisrael va mona kutya ekuma loshilando ola yeluka, ova ti: ‘Natu yeni ko tu ke va dipaeni nokukangheka oilonga yavo.’ Ndele eshi Nehemia a uda omhangela yavo, okwa pa ovanailonga vaye omaongamukonda nomaonga. Okwa lombwela ovatungi a ti: ‘Inamu tila ovatondi. Kondjeleni ovamwaxo, novana veni, novakulukadi veni nomaumbo eni.’

Ovanhu ova li va kwatwa konyati. Ova kala komalwilo omutenya noufiku nova twikila noilonga yavo. Konima ashike yomafiku 52, ekuma laJerusalem ola li la pwa okutungwa. Ovakalimo vomoshilando paife ova li ve udite va amenwa shi dule nale. Opo nee Nehemia naEsra ova honga ovanhu omhango yaKalunga novanhu ova li va hafa.

Ndele nande ongaho, oinima kaya li ngaashi nale fimbo Ovaisrael va li inava ya moukwatwa kuBabilon, molwaashi ova li natango koshi yepangelo lOvapersia nova li ovapiya vavo. Ndele Jehova okwa li a udaneka kutya ote ke va tumina ohamba ipe, oyo ya li tai ka etela ovanhu ombili. Ohamba oyo olyelye? Ongahelipi tai dulu okweeta ombili kombada yedu? Opa li pa pita omido 450 lwaapo ovanhu inava kundana shihapu shi na sha nohamba oyo ya li ya udanekwa. Hauxuuninwa, opa ka dalwa okaana kamwe monghedi ye likalekelwa. Osho ohatu ke shi lihonga momahokololo taa landula ko.