MBELA ovanhu ovo u wete mefano omo otava ningi shike? Ovanhu ovo ova li ve na oshivilo shinene. Ohamba yaBabilon oya li ya shiva koshivilo ovaenda eyovi va fimana. Ova li tava nwine omaviinyu momaholo oshingoldo nooshisilveri nova li tava lile moiyasha oyo ya kufilwe motembeli yaJehova kuJerusalem. Ohaluka, ova li va mona eke lomunhu momhepo, ndele tali hovele okushanga kekuma. Ovanhu aveshe ova li tava kakama koumbada.

Belsassar, omutekulu waNebukadnesar, oye a li omupangeli pefimbo opo. Eshi ohamba Belsassar ya mona eke olo tali shange kekuma, oya ingida mokule opo ovanongo vayo va ka talwe. Ohamba oya lombwela ovanongo vayo ya ti: ‘Keshe ou ta dulu okulesha eshangelo eli ndele te li fatululile nge, ohandi ke mu pa eeshali dihapu nota ka ninga omupangeli omutitatu mouhamba.’ Ndele mupya munene, kapa li nande oumwe womovanongo vaye a li a dula okulesha eshangelo olo ile okufatulula kutya otali ti ngahelipi.

Ina yohamba okwa li a uda eweelelo, ndele te uya konduda oyo ya kula yovaenda. Opo nee okwa lombwela ohamba a ti: ‘Akutu ohamba, ino tila! Mouhamba woye omu na omulumenhu umwe oo e shii ookalunga vayapuki. Eshi xokulu Nebukadnesar a li ohamba, okwa li e mu ninga elenga la kula lovanongo vaye aveshe. Edina laye oDaniel. Tuma ovapiya voye va ka tale Daniel, molwaashi oye ta dulu oku ku fatululila eshangelo eli.’

Daniel okwa ka etwa divadiva. Belsassar okwa li a udanekela Daniel eeshali ngeenge okwa fatulula eshangelo olo. Ashike Daniel okwa anya okutambula ko eeshali dohamba, ndele ta hepaulula kutya omolwashike Jehova a li a kufa xekulu yaBelsassar, Nebukadnesar, ouhamba. Daniel okwa ti: ‘Xokulu okwa li omulinenepeki, nomolwaasho a li a handukilwa kuJehova.’

Okwa lombwela Belsassar, a ti: ‘Ove ou shii oinima aishe oyo ya li ya ningilwa xokulu Nebukadnesar, ndele naave ou na ashike ounhwa ngaashi ye. Owa kufa omaholo oo a kufilwe kotembeli yaJehova u nwine mo nosho yo oiyasha opo u lile mo. Owa li to fimaneke oikalunga ya longwa moiti nomomamanya, ndele ino fimaneka nande Omushiti wetu Munenenene. Omolwomatomheno oo, Kalunga okwa tuma eke olo li shange eendjovo odo.’

Opo nee Daniel okwa twikila ko ta ti: ‘Eshangelo eli la shangwa kekuma otali lesha ngaha: MENE, MENE, TEKEL na UFARSIN.’

‘MENE otashi ti kutya Kalunga okwa vala omafiku ouhamba woye nokwe u xulifa po. TEKEL otashi ti kutya ove owa yelekwa noshiyelekifo, ndele owa monika kutya ino wana. UFARSIN otashi ti kutya ouhamba woye owa yandjwa po kOvamedia nokOvapersia.’

Ndele fimbo Daniel ina mana okupopya, Ovamedia nOvapersia ova hovela nale nokuli okuponokela Babilon. Ova li va kwata ko oshilando osho, ndele tava dipaa Belsassar. Eshangelo olo lokekuma ola li la wanifwa moufiku oo tuu oo. Ndele mbela Ovaisrael ovo va li moukwatwa waBabilon ova ka ningilwa shike? Ohatu ke shi mona komesho. Paife natu ka taleni kutya Daniel okwa ka ningilwa shike.