OVANHU ovo u wete mefano olo ovashikuli vaJesus. Ova li va dulika kelombwelo laye lokukala muJerusalem. Efiku limwe, ofimbo va li va ongala pamwe va teelela, eumbo alishe omo va li omwa li mwa ningwa eweelelo linene. Ola li tali linyenge ngaashi efudaela lomhepo linene. Ohaluka, aveshe ova li va nambelwa komalaka omundilo komitwe davo. Mbela ou wete omalaka omundilo mefano omo oo a nambela komitwe davo aveshe? Osho mbela otashi ti shike?

Osho osha li oshikumwifilonga. Pefimbo opo, Jesus okwa hangwa nale a shuna meulu kuXe noye a li a tilila ovashikuli vaye omhepo iyapuki yaKalunga. Mbela ou shi shii kutya omhepo oyo oya li ye va kwafela va ninge shike? Aveshe ova li va hovela okupopya omalaka e lili noku lili.

Ovanhu vahapu vomuJerusalem ova li va uda eweelelo olo la li la fa efudaela linene nova li ve uya okutala kutya oshike sha li sha ningwa po. MuJerusalem omwa li mwa hangwa ovanhu vamwe va dja moiwana imwe i lili, va li ve uya okudana oshivilo shOvaisrael hashi ifanwa Opentekoste. Ovanhu ovo va li va dja moiwana imwe kava li tuu va kumwa eshi va li va uda ovahongwa tava popi omalaka avo oshidalelwa mo, tave va hepaululile oikumwifilonga oyo Kalunga a li a longa!

Ovanhu ovo ova ti: ‘Ovanhu aveshe ava ova dja muGalilea. Ndele mbela osha enda ngahelipi opo va dule okupopya omalaka e lili noku lili, oo haa popiwa koilongo oko twa dja?’

Opo nee, Petrus okwa fikama, ndele te va yelifile. Okwa li ta popi newi lopombada ta lombwele ovanhu nghee Jesus a li a dipawa nonokutya Jehova okwe mu nyumuna koufi. Petrus okwe va lombwela yo a ti kutya: ‘Paife Jesus oku li meulu kolulyo laKalunga, nokwe tu tilila omhepo iyapuki oyo a li e tu udanekela, nomolwaasho mwa uda nomwa mona oikumwifilonga aishe oyo.’

Eshi Petrus a mana okupopya, ovanhu vahapu ova li ve udite nai shi na sha naasho Jesus a ningilwa. Ova li va pula tava ti: ‘Otu na okuninga po shike?’ Petrus okwe va lombwela a ti: ‘Omwa pumbwa okulidilulula nokuninginifwa.’ Onghee hano, ovanhu 3 000 lwaapo ova li va ninginifwa mefiku olo tuu olo, ndele tava ningi ovashikuli vaJesus.