TALA koshikepa oyo i li mefano ya mona oixuna! Oshikepa oyo oya li ya tekauka moipambu. Mbela ou wete ovanhu ovo va nukila momeva mefano omo? Ovanhu vamwe ova fika nale komutunda nokuli. Mbela Paulus ou mu wete mo mefano olo? Natu ka taleni kutya oshike sha li she mu ningilwa.

Dimbuluka kutya Paulus okwa kala a idililwa modolongo muKesarea oule womido mbali. Opo nee, okwa li a londekwa moshikepa pamwe novanadolongo vakwao vamwe, ndele tava twalwa kuRoma. Fimbo ve li molweendo olo, opa li pa tukuluka oshikungulu shinene shomhepo eshi va li tava ende popepi nonhunhu yaKreta. Oshikungulu osho osha li shidjuu neenghono, nomolwaasho ovashingi voshikepa ova li va nyengwa okupangela oshikepa. Ova kala oule wefimbo mefuta ihava mono etango omutenya ile eenyofi oufiku. Hauxuuninwa, eshi pa pita omafiku mahapu, ovanhu ovo va li moshikepa ova li va kanifa filufilu elineekelo kutya itava ka xupa nandenande.

Opo nee, Paulus okwa fikama ndele ta ti kuvo: ‘Kape na nande oumwe womunye ta ka fya, oshikepa oyo aike tai ka hanauka po. Molwaashi omweengeli waKalunga umwe okwa li e uya kwaame onguloshi, ndele ta ti: “Paulus ino tila! Ove ou na okuya kuRoma opo u ke lipopile koshipala shOmukesari waRoma. Kalunga ota ka xupifa ovanhu aveshe ovo u li pamwe navo moshikepa.”’

Mokati koufiku wefiku eti-14 okudja eshi oshikungulu shomhepo sha li sha hovela, ovashingi voshikepa ova li va didilika kutya omeva okwa li taa ende taa ningi maxupi. Ova li va umbila omakanghamifo (eehangela) momeva, molwaashi ova li va tila kutya pamwe oshikepa otai ke lidenga momamanya molwaashi okwa li kwa laula. Ongula yefiku la ka shikula ko, ova li ve wete omutunda nova tokola okushinga oshikepa fiyo okomunghulofuta.

Eshi va ehena komunghulofuta, oshikepa oye lidenga mehekedu olo la li la ongala koshi yomeva, ndele tai dame. Opo nee, omakufikufi manene okwa hovela okulidenga moshikepa noya hovela okutekauka moipambu. Opo nee, omukulunhu wetangakwaita okwa lombwela ovanhu, a ti: ‘Amushe ava mu shii okuyowa nukileni tete mefuta mu yowe fiyo okomutunda. Amushe ava muhe shii okuyowa otamu nukile mo xuuninwa, ndele tamu kwatelele koipambu oyo ya dja koshikepa.’ Ovanhu ovo ova li va ninga naanaa ngaashi va lombwelwa. Kungaho, ovanhu aveshe 276 ovo va li moshikepa ova ka fika komutunda inava ninga sha, ngaashi naanaa omweengeli a li a udaneka.

Onhunhu oko va li ohai ifanwa Melite. Ovanhu vokonhunhu oyo ova li ovanambili nova li va fila oshisho ovanhu ovo va dja moshikepa. Eshi onghalo yomhepo ya alukila kouwa, Paulus okwa li a londekwa moshikepa imwe, ndele ta twalwa kuRoma.