OMULUMENHU oo a twa eengolo mefano olo oStefanus. Stefanus okwa li omuhongwa waJesus omudiinini. Ndele tala eshi ta ningilwa mefano olo! Ovalumenhu ovo otave mu kupula nomamanya manene. Omolwashike ovanhu ovo ve tonde Stefanus nai ngaho notave mu ningile oshinima shinyanyalifi sha tya ngaho? Natu taleni kutya omolwashike.

Kalunga okwa li a kwafela Stefanus a kale ta longo oikumwifilonga. Ashike ovalumenhu ovo kava li ve shi panda. Onghee hano, ova li tave mu pataneke kombinga yaashi a li ta hongo ovanhu oshili. Kalunga okwa li a pa Stefanus ounongo muhapu nokwa li a nyaneka pomutenya omahongo oipupulu oo va kala tava hongo ovanhu. Osho osha li sha handukifa neenghono ovalumenhu ovo. Onghee hano, ove mu kwata po nova li va konga ovanhu ve mu lundile.

Omupristeri omukulunhu okwa li a pula Stefanus a ti: ‘Eshi tashi popiwa oshoshili tuu?’ Stefanus okwe mu nyamukula ta longifa oshipopiwa shiwa sha dja mOmbibeli. Lwopexulilo loshipopiwa osho, okwa li a popya shi na sha nanghee ovalumenhu ovakolokoshi va li ve tonde ovaprofeti vaJehova vopefimbo lonale. Opo nee, okwa twikila ko a ti: ‘Nye omwa fa ashike ovalumenhu ovo ovakolokoshi. Omwa dipaa omupiya waKalunga, Jesus, noinamu dulika keemhango daKalunga.’

Osho osha li sha handukifa ovawiliki vomalongelokalunga neenghono nova li tave likwesha komayoo omolwehandu. Ndele Stefanus okwa yelula omutwe waye pombada, ndele ta ti: ‘Taleni, ondi wete Jesus e li ofika kolulyo laKalunga meulu.’ Ovalumenhu ovo ova li ve likwata komatwi vaha pwilikine, ndele tava nhukile Stefanus. Ove mu kwata po nove mu kokololela kondje yoshilando.

Eshi va ya kondje yoshilando, ova dula mo oikutu yavo yokombada nove i pa omulumenhu umwe omunyasha wedina Saulus opo ei pashukile. Mbela Saulus ou mu wete mefano olo? Konima yaasho, ovalumenhu vamwe ova li va hovela okudenga Stefanus nomamanya. Opo nee, Stefanus okwa twa eengolo ngaashi u mu wete mefano olo, nokwa ilikana kuKalunga ta ti: ‘Kalunga, ino va valulila nande etimba eli.’ Stefanus okwa li e shi shii kutya ovanhu vamwe vomwaavo ova li ashike va pukifwa kovawiliki vomalongelokalunga. Hauxuuninwa, Stefanus okwa fya.

Ngeenge wa ningilwa owii komunhu wonhumba, mbela oho kendabala oku mu shunifila owii waye ile oho indile Kalunga e mu ningile owii? Stefanus naJesus hasho va li va ninga ngaho. Ponhele yaasho, ova li hava ungaunga novanhu nombili, nokuli naavo va li ovahepeki vavo. Natu kendabaleni tu shikule oshihopaenenwa shavo.