EPULO 3
Ongahelipi handi dulu okupopya novadali vange?
MBELA OTO KA NINGA PO SHIKE?
Diladila konghalo ei: Efiku limwe konguloshi mEtitatu eshi George weedula 17 a mana oilonga yaye yomeumbo, okwa li e na efimbo la wana lokufuda po. Okwa tema ko-TV, ndele ta kala omutumba moshipundi shaye osho e hole.
Fimbo e li omutumba, xe okwa fikama moshivelo ta monika a handuka.
Xe okwa ti: “George! Omolwashike to hepeke efimbo nokutala o-TV, ponhele yokukwafela mumwanyoko noilonga yaye yofikola? Ku na efiku wa ningile eshi wa lombwelwa!”
George okwa ngongota ta ti: “Keshe fimbo aame ngoo meumbo omu!”
Xe okwa endeka okutwi ndele ta pwilida ta ti: “To ti ngahelipi George?”
George okwa nyamukula ta keme ye ta ngwilula omesho ta ti: “Aaye inandi tya sha Tate.”
Xe okwa popya a handuka neenghono ta ti: “Ino popya vali naame nondaka i li ngaho!”
Ngeno okwa li oove George, ngeno owa ninga po shike?
KANGHAMA NDELE TO DILADILA!
Okukala ho kundafana novadali voye osha fa ashike to shingi otuwa. Ngeenge owa hange opate ya fitikwa, oto dulu okukonga po ondjila imwe vali.
PASHIHOPAENENWA:
Okakadona kedina Lea oka ti: “Ohandi mono shidjuu okukundafana natate. Omafimbo amwe ohandi popi naye, nolwanima oha pula nge ta ti, ‘Ombili unene, mbela okwa li to popi naame?’”
LEA OKU NA OMAHOOLOLO ATATU.
-
Ota dulu okuhanyaukila xe.
Lea ota dulu kwiingida mokule ta ti: “Pwilikina! Oshinima eshi osha fimana!”
-
Ota dulu okuxulifa po okupopya naxe.
Lea ota dulu okusholola okupopya naxe kombinga yomaupyakadi aye.
-
Ota dulu okuteelela efimbo la wapala opo a twikile neenghundafana davo.
Lea ota dulu okupopya naxe oshipala noshipala lwanima, ile e mu shangele ombapila i na sha noupyakadi waye.
Eetepo lilipi to popile?
DIDILIKA KUTYA: Xe yaLea okwa li e lipyakidila nasha, nonghee ka li a didilika kutya Lea okwa kenyanana. Ngeenge Lea okwa hoolola po Eetepo la-A, xe ita ka uda ko kutya omolwashike Lea te mu hanyaukile. Eetepo olo osha yela kutya itali ke linyengifa xe a pwilikine keendjovo daye, noitali ulike efimaneko neduliko kuxe. (Ovaefeso 6:2) Onghee hano, eetepo eli itali ka etela nande oumwe womuvo ouwa.
Ngaashi ashike omushingi ha kongo po ondjila imwe ngeenge okwa hange opate ya fitikwa, naave oto dulu okukonga onghedi imwe omo to dulu okupopya novadali voye
Nonande Eetepo la-B otali dulu okukala ehoololo lipu olo ta dulu okukufa, halo li li pandunge lelalela. Omolwashike mbela? Omolwaashi opo Lea a ungaunge nomupondo nomaupyakadi aye, oku na okukundafana naxe, nonokutya opo xe e mu kwafele, okwa pumbwa okushiiva kutya oshike sha enda po. Okukala a mwena itaku pondola sha.
Shi na sha nEetepo la-C, Lea ina efa eshongo olo li mu ye moshipala aha kundafane naxe. Ponhele yaasho, okwa kendabala okukundafana naxe pomhito imwe vali. Lea otashi dulika a ka kale e udite a pepelelwa ngeenge okwa hoolola okushangela xe ombapila.
Okushanga ombapila otashi dulu yo oku mu kwafela a yelife kondadalunde kombinga youpyakadi waye. Ngeenge xe okwa lesha ombapila oyo ota ka mona kutya Lea okwa li a hala oku mu lombwela kombinga yashike, naasho otashi ke mu kwafela a ude ko oupyakadi waye. Lea naxe otava dulu okumona ouwa mEetepo la-C. Kashi na nee mbudi kutya otava kundafana oshipala noshipala ile omombapila, eetepo olo oli li metwokumwe nelondwelo lOmbiibeli olo tali ti: “Tu lalakaneni hano eshi tashi hapupalifa ombili.” — Ovaroma 14:19.
Lea ota dulu vali okutokola okuninga po shike?
Tala ngeenge oto dulu okudiladila po limwe, ndele to li shange ponhele i li pedu. Opo nee shanga kutya otali ka eta oshidjemo shilipi.
HENUKA OKUYANDJA OMANYAMUKULO TAA LIMBILILIKE
Didilika kutya haalushe osho ho popi naasho ovadali voye hava diladila hashi tu kumwe.
PASHIHOPAENENWA:
Otashi dulika ovadali voye ve ku pule kutya omolwashike to monika ino hafa. Ove oto ti kutya, “Inandi hala okupopya kombinga yasho.”
Ndele ovadali voye otashi dulika va kale ve udite wa fa wa ti: “Itandi dulu oku mu lombwela shaashi inandi mu lineekela. Ohandi ka lombwela ookaume kange oupyakadi wange, ndele hanye ndi na oku u lombwela.”
Diladila nee ngeno wa taalela oupyakadi wa kwata moiti, ndele ovadali voye ova halelela oku ku kwafela. Ngeenge owa ti: “Inamu lipula nasho, ohandi dulu okuungaunga nao.”
-
Ovadali voye otashi dulika va kale ve udite wa fa wa ti:
-
Enyamukulo loye liwa otali dulu okukala:
Otashi dulika yo u hafele oikundafanwa ei
OSHO OOMAKULA VOYE HAVA TI
Ongahelipi handi dulu okupopya novadali vange?
Otashi dulika u ka mone ouwa muhapu u dulife pwaao wa li wa diladila.
OVANYASHA TAVA PULA
Ongahelipi handi dulu okupopya novadali vange kombinga yeemhango odo va tulila nge po?
Ngeenge owa kala ho popi novadali voye nefimaneko otashi ke ku kumwifa eshi to ka mona oidjemo iwa.
OUVIDIO VOKOUPELENDE
Ondi na okupopya ngahelipi novadali vange?
Ongahelipi to dulu okupopya novadali voye nokuli nonande ku udite wa hala oku popya navo?
