LESHA oshifokundaneki keshe. Tala o-TV ile u pwilikine koradio. Oto ka lesha noto ka uda omahokololo mahapu e na sha nekaulonyanga, oita nosho yo oukulo. Diladila kombinga yomaupyakadi oye mwene. Otashi dulika ouyahame ile efyo lomuholike woye otai ku nyikifa oluhodi linene. Otashi dulika u kale u udite ngaashi omulumenhu muwa Job, oo a ti kutya okwa li a “wililwa po kokumona oixuna.” — Job 10:15, The Holy Bible in the Language of Today.

Lipula kutya:

• Mbela eshi osho Kalunga a li a lalakanena shi na sha naame nosho yo novanhu aveshe?

• Openi handi dulu okumona ekwafo opo ndi dule okuungaunga nomaupyakadi ange?

• Mbela ope na eteelelo lasha kutya onaku ka kale ombili kombada yedu?

Ombibeli otai yandje omanyamukulo taa mbilipaleke komapulo oo.

• “Ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali.” — Ehololo 21:4

• “Oshingudu otashi ka nuka ngaashi omenye.” — Jesaja 35:6

• “Omesho ovapofi otaa ka pashuka.” — Jesaja 35:5

•  “Aveshe ava va kala meembila otava . . . holoka mo.” — Johannes 5:28, 29

• “Onakukala mo nande umwe ta ti: Aame oshingone.” — Jesaja 33:24

• “Moshilongo namu kale oshishipo shoilya.” — Epsalme 72:16

Ino endelela okufika pexulifodiladilo kutya osho sha ulikwa pomapandja oo a tetekela oshi li ashike okudiladila kwongaho. Kalunga okwa udaneka kutya ota ka wanifa po oinima oyo, nOmbibeli otai yelifa nghee te ke shi ninga.

Ndele Ombibeli otai yelifa shihapu shi he fi ashike osho. Otai yandje ouyelele u na sha nanghee to dulu okuhafela onghalamwenyo tai ti sha lela nokuli nopaife. Diladila oule wokafimbo shi na sha noisho ile omaupyakadi oye mwene. Otashi dulika a kwatela mo oluhepo loimaliwa, omaupyakadi oukwaneumbo, okuhenoukolele ile efyo lomuholike. Ombibeli otai dulu oku ku kwafela u ungaunge nomaupyakadi kunena, notai yandje epepelelwo mokunyamukula omapulo ngaashi aa taa landula:

• Omolwashike hatu mono oixuna?

• Ongahelipi hatu dulu okuungaunga noisho yonghalamwenyo?

• Ongahelipi hatu dulu okukala twa hafa shili moukwaneumbo wetu?

• Oshike hashi tu ningilwa ngeenge hatu fi?

• Mbela ohatu ka mona ngoo vali oonakufya vetu ovaholike?

• ▪ Ongahelipi hatu dulu okukala noushili kutya Kalunga ota ka wanifa po omaudaneko aye e na sha nonakwiiwa?

Eshi to lesha embo eli, otashi ulike kutya owa hala okushiiva osho Ombibeli tai hongo. Embo eli otali ke ku kwafela. Didilika kutya ope na omapulo a pamba outendo e li pedu lomapandja. Ovanhu omamiliyona ova hafela onghedi yokulongifa omapulo nomanyamukulo ngeenge tava kundafana Ombibeli nEendombwedi daJehova. Otwe lineekela naave oto ke i hafela yo. Kalunga ne ku nangeke noupuna eshi to hafele oshimoniwa shihafifa notashi mbilipaleke shokulihonga osho Ombibeli tai hongo lela!