Konima yefimbo lonhumba okudja eshi ohamba Nebukadnesar ya li ya twa ondjodi kombinga yoshihongwafano, oya li ya ninga oshihongwafano shinene shoshingoli. Oya li ye shi dika molufilu laDura nokushiva ovanhu ovo va fimana, mwa kwatelwa Sadrak, Mesak naAbednego, opo ve uye va ongale komesho yoshihongwafano. Ohamba oye va lombwela tai ti: ‘Ngeenge mwa udu omanghuma, ouxumbafeta neenyalilo, linyongameneni oshihongwafano. Ou ite linyongamene oshihongwafano eshi, ota ka ekelwa mediko lomundilo.’ Mbela Ovaheberi vatatu ova li ve linyongamena oshihongwafano ile ova longela ashike Jehova oye aeke?

Ohamba oya lombwela ovanhu kutya naku shikwe omusika. Opo nee keshe umwe okwa tameka okulinyongamena nokwiilikana oshihongwafano, kakele ashike kaSadrak, Mesak naAbednego. Ovalumenhu vamwe ova li ve shi didilika nokulombwela ohamba tava ti: ‘Ovalumenhu vatatu Ovaheberi ova anya okulinyongamena oshihongwafano shoye.’ Nebukadnesar okwe va tuma ko ndele ta ti: ‘Ohandi mu pe vali omhito imwe mu ka ilikane oshihongwafano, ndele ngeenge inamu shi ninga ohandi ke mu ekela momundilo. Kape na kalunga oo ta dulu oku mu xupifa.’ Opo nee ova nyamukula tava ti: ‘Inatu hala tu pewe omhito imwe vali. Kalunga ketu ota dulu oku tu xupifa. Nongeenge ine shi ninga, ohamba, katu na efiku tu ilikane oshihongwafano.’

Nebukadnesar okwa li a handuka unene ndele ta lombwele ovakwaita vaye ta ti: ‘Shakaleni ediko lomundilo la hanya nola pupyala shi dulife shito.’ Opo nee okwa ladipika ovakwaita vaye ta ti: ‘Mangeni ovalumenhu ovo ndele tamu va kupula mo.’ Ediko  ola li la pupyala neenghono nomolwaashi eshi ovakwaita ovo va ehena popepi nalo, ova fya meendelelo. Opo nee Ovaheberi ovo vatatu ova wila momundilo. Ashike eshi ngoo Nebukadnesar a hondamena mediko, okwa li e wete mo ovalumenhu vane tava endaenda, ponhele yokukala e wete vatatu. Okwa li a tila ndele ta pula ovakwaita vaye ta ti: ‘Inatu ku pula mo ovalumenhu vatatu momundilo? Ondi wete mo vane, naumwe ota monika a fa omweengeli.’

Nebukadnesar okwa ehena popepi nediko ndele ta ingida ta ti: ‘Djeni mo, nye ovapiya vaKalunga Omukombadambada.’ Keshe umwe okwa li a kumwa eshi e wete Sadrak, Mesak naAbednego tava ende tava di mo momundilo inava ninga sha. Oshipa shavo, eexwiki davo, oikutu yavo inai pya nokava li nokuli tava nyika omuvavo womundilo.

Nebukadnesar okwa tya: ‘Kalunga kaSadrak, Mesak, naAbednego omunene. Okwa tuma omweengeli waye ndele te va xupifa. Kalunga kavo ita yelekwa nasha.’

Ngaashi ovalumenhu vatatu Ovaheberi, mbela owa tokola ngoo toko okukala omudiinini kuJehova, kashi na nee mbudi kutya oshike tashi ningwa po?