Jesus ka li ashike ha velula ovanaudu nokunyumuna ovafi, ndele okwa li yo ha dulu okulotifa omhepo nodula. Konima eshi Jesus a mana okwiilikana e li komhunda, okwa li a tala kEfuta laGalilea nokwa li a mona oshikungulu. Ovayapostoli vaye ova li mowato, tava kendabala okupita mo momhepo. Jesus okwa li a dja ko komhunda ndele ta tameke okweenda kombada yomeva a yuka kowato yavo. Eshi ovayapostoli va mona omunhu ta ende kombada yomeva, ova li va tila. Ashike Jesus okwe va lombwela ta ti: ‘Aame, inamu tila.’

Petrus okwa tya: ‘Omwene, ngeenge oove shili, lombwele nge ndi uye kwoove.’ Jesus okwa tya kuPetrus: ‘Ila kwaame.’ Opo nee Petrus okwa dja mo mowato mokati koshikungulu, ndele ta tameke okweenda kombada yomeva a yuka kuJesus. Ndele eshi Petrus a li pokufika puJesus, okwa tala koshikungulu. Okwa li a kwatwa koumbada ndele ta tameke okuningina. Petrus okwa ingida ta ti: ‘Omwene, xupife nge!’ Opo nee Jesus okwe mu kwata meke ndele ta ti: ‘Omolwashike wa kwatwa komalimbililo? Ou na ngoo eitavelo?’

Jesus naPetrus ova li va londa mowato, opo nee oshikungulu osha lota meendelelo. Mbela oto diladila kutya ovayapostoli ova li ve udite ngahelipi? Ova tya: “Oove shili Omona waKalunga.”

Omhito oyo hayo aike Jesus a li a mweneka onghalo yomhepo. Pomhito imwe vali, eshi Jesus novayapostoli vaye va li va ya kombinga ikwao yefuta, Jesus okwa li a ya a ka kofe konima yowato. Fimbo a li a kofa, okwa li kwa dja oshikungulu shinene. Omakufikufi okwa li tae lidenge mowato, nowato oya li ya yada omeva. Ovayapostoli ova li va pendula Jesus tava ingida tava ti: ‘Omuhongi, otu li pokufya! Tu kwafela.’ Opo nee Jesus okwa penduka ndele ta ti kefuta: “Lota!” Omhepo nefuta oya li ya lota diva. Jesus okwa pula ovayapostoli ta ti: ‘Omu na ngoo eitavelo?’ Keshe umwe okwa tya kumukwao: “Omhepo nefuta otali dulika kuye.” Ovayapostoli ova li ve lihonga kutya ngeenge ova kala ve lineekela filufilu Jesus, inava pumbwa okutila nande osha.