Jehova okwa li a lombwela Moses a ti: ‘Ila kwaame komhunda. Ohandi ka shanga oipango yange koipelende yomamanya noku i ku pa.’ Moses okwa li a londa komhunda ndele ta kala ko omafiku 40. Fimbo a li komhunda, Jehova okwa shanga Oipango Omulongo koipelende ivali yomamanya ndele te i mu pe.

Mokweendela ko kwefimbo, Ovaisrael ova li tava diladila kutya Moses ita aluka vali. Ova li va lombwela Aron tava ti: ‘Otwa hala omuwiliki. Tu ningila oshikalunga!’ Aron okwa li e va nyamukula a ti: ‘Eteni oingoldo yeni.’ Okwa li a hengumuna oshingoldo ndele te shi hambula oshihongwafano shi li molupe lokatana. Ovanhu ova ti: ‘Okatana aka oko Kalunga ketu oo e tu pitifa mo muEgipti.’ Ova li va hovela okwiilikana okatana oko ndele tava dana oshivilo. Mbela osha li sha puka okuninga ngaho? Heeno, molwaashi ovanhu ova li va udaneka kutya otava ka longela ashike Jehova oye aeke. Ashike pomhito oyo ova li va teya eudaneko olo.

 Jehova okwa li e wete osho tashi ningwa po, nokwa li a lombwela Moses a ti: ‘Shuna koshiwana, itashi dulika kwaame notashi longele oshikalunga.’ Moses okwa li a londoloka ko komhunda, a humbata oipelende ivali.

Eshi Moses a li ta ehene popepi nonhanda, okwa li a uda ovanhu tava imbi. Opo nee okwa li e va wete eshi tava ndanisha notave linyongamene okatana. Moses okwa li a handuka neenghono nokwa ekela oipelende ivali yomamanya pedu, ndele tai tatuka. Opo nee okwa li a hanauna po diva oshihongwafano, ndele ta pula Aron ta ti: ‘Ovanhu ove ku itavelifa ngahelipi u ninge oshinima shii sha tya ngaho?’ Aron okwa ti: ‘Ino handuka, ovanhu ava ou shii nale kutya osho ve li ngaho. Ova li va hala oshikalunga, nomolwaasho onda tula oshingoli shavo momundilo ndele tashi ningi onhana.’ Aron ka li e na okuninga ngaho. Moses okwa li a shuna komhunda ndele ta ilikana Jehova a dimine po oshiwana.

Jehova okwa li a dimina po ovo va li va hala okudulika kuye. Mbela ou wete nghee sha li sha fimana kOvaisrael okudulika kewiliko laMoses?