Konima eshi David a dipaa Goljat, ohamba Saul oya li ye mu ninga omukulunhu wetangakwaita laye. David okwa li a findana moita ihapu, ndele ta kala a tumbala. Efimbo keshe ngeenge a li ta alukile keumbo ta di kolwoodi, ovakainhu ova li hava kala tava ndanisha notava imbi tava ti: ‘Saul okwa dipaa omayovi, ofimbo David a dipaa omayovi omilongo!’ Saul okwa li a twila David ondubo neenghono nokwa li a hala oku mu dipaa.

David okwa li ha dulu okushika okaxumbafeta nawa. Efiku limwe fimbo David a li ta shikile Saul okaxumbafeta, Saul okwe mu umba neonga. David okwa li a faduka po meendelelo, neonga ola li la shimbama mekuma. Konima yaasho, Saul okwa li a kendabala lwoikando ihapu a dipae David, nohauxuuninwa David okwa li a faduka po ndele ta kala a hondama mombuwa.

Saul okwa li a kufa etangakwaita lovalumenhu 3 000 nokuya va ka konge David. Oshikando shimwe okwa li a ya  mekololo omo mwa li mwa hondama David novakwaita vaye. Ovakwaita vaDavid ova li va nongofola va ti: ‘Ei omhito iwa nokudipaa Saul.’ David okwa li a enda ta hondjaunine ndele ta i puSaul nokuteta okavando koshikutu shaye shouhamba. Saul ka li a uda po sha. Konima yaasho, David okwa li a uda nai kutya kali a fimaneka ohamba oyo ya nangekwa po kuJehova. Ka li a efa ovalumenhu vaye va ponokele Saul. Okwa li nokuli a ingida Saul te mu lombwele kutya okwa li ta dulu oku mu dipaa eshi a li a mona omhito. Mbela Saul okwa li ngoo a lundulula etaleko laye li na sha naDavid?

Hasho, Saul okwa li a twikila okukonga David. Oufiku umwe David naAbisai, omona wamumwaina, ova li ve livakela mokamba yaSaul. Nokuli naAbner, omunangeli waSaul, okwa li a kofa. Abisai okwa tya: ‘Ei oyo omhito yetu, nandi mu dipae.’ David okwa nyamukula ta ti: ‘Jehova ota ka ungaunga naSaul. Natu kufe po ashike eonga nombao yaye yomeva ndele hatu i.’

David okwa li a londa komhunda i li popepi nokamba yaSaul. Okwa ingida ta ti: ‘Abner, omolwashike i no amena ohamba? Ombao yomeva neonga laSaul oi li peni?’ Saul okwa li a didilika kutya ondaka oyaDavid ndele ta ti: ‘Owa li u na okudipaa nge, ashike i no shi ninga. Ondi shii kutya oove to ka ninga ohamba ta i shikula ko yaIsrael.’ Opo nee Saul okwa li a shuna keumbo laye. Ashike havanhu aveshe moukwaneumbo waSaul va li ve tonde David.