Embo Omishangwa odo tadi tu kwafele tu longele Jehova otali ku kwafele u dule okumona noupu omishangwa noihopaenenwa yopaMbiibeli, oyo tai dulu oku ku kwafela, ngeenge wa taalela omashongo. Otali ku kwafele yo u mone omishangwa odo to dulu okulongifa u twe vamwe omukumo noku va kwafela va ninge omatokolo, oo taa fimanekifa Jehova. Hoolola oshikundafanwa osho u na ohokwe musho. Koshi yoshikundafanwa keshe oku na omapulo noihopaenenwa imwe yopaMbiibeli. (Tala oshimhungu “ Nghee to dulu okulongifa embo eli.”) Oto ka mona omishangwa odo tadi ku pe omayele, tadi ku wilike notadi ku hekeleke. Oto ka mona yo omafinamhango opaMbiibeli, oo to dulu okulongifa, opo u kwafele vamwe noku va twa omukumo.

Embo eli ina li tofa mo omishangwa adishe kombinga yoikundafanwa, oyo i li mo. Nonande otali ku kwafele u mone omishangwa diva, oto dulu okulongifa oishangomwa imwe vali u ninge omapekapeko a wedwa po. (Omayel 2:​1-6) Opo u konakone moule, longifa omishangwa odo da pambafana nosho yo omauyelele okukonakona mOmbiibeli yEtoloko lounyuni mupe lOmishangwa Diyapuki, ngeenge oku li melaka limwe olo ho udu. Longifa embo Elongifwambo lokukonga omauyelele moishangomwa yEendombwedi daJehova, ile embo lo-Watch Tower Publications Index opo u konakone omushangwa wonhumba moule. Longifa oishangomwa oyo opo ya nyanyangidwa u kale u na eudeko li li mondjila li na sha nomushangwa oo to konakona.

Embo eli, Omishangwa odo tadi tu kwafele tu longele Jehova, nali ku kwafele u mone ounongo, eshiivo neudeko, olo tali hangwa mOmbiibeli. Eshi to lesha embo eli, oto ka kala wa tomhwa kutya “eendjovo daKalunga odi na omwenyo neenghono.” — Heb 4:12.