OSHITUKULWA 9
Elongelokalunga lashili otali dulu oku ku etela ouwa fiyo alushe!
1. Oshike tashi ka ningwa po ngeenge otwa ‘ehene kuKalunga’?
JEHOVA oku hole ovo tave mu longele. Ngeenge oto longele Jehova, ote ke ku nangeka noupuna paife nosho yo monakwiiwa. Ombibeli otai ti: “Eheneni kuKalunga, opo nee Ye ta ehene kunye.” — Jakob 4:8.
2. Ongahelipi hatu dulu okweehena kuKalunga, nongahelipi eshi tashi nwefa mo omailikano etu?
2 Opo u ehene kuKalunga, ou na okukonakona nokutula moilonga Eendjovo daye. Ngeenge to ilikana metwokumwe nehalo laye, Jehova ota ka pwilikina komailikano oye noku a nyamukula. Omuyapostoli Omukriste Johannes okwa shanga ta ti: “Elineekelo eli letu tu li na [muKalunga] oleli: ngenge hatu mu indile sha pahalo laye, ote tu udu. Hano ngenge tu shi shii nokutya, Ye ote tu udu keshe tuu eshi hatu shi indile, otu shi shii yo, aishe oyo twe i mu indila, ohatu i pewa.” — 1 Johannes 5: 14, 15.
3-7. Ongahelipi hatu dulu okumona ounongo wopakalunga, nongahelipi tau dulu oku tu kwafela?
3 Natango, eshi to ehene popepi naKalunga, ote ke ku pa ounongo u pondole moinima yakeshe efiku. Ombibeli otai ti: “Ngenge umwe womunye okwa hepa ounongo, ne u indile kuKalunga.” — Jakob 1:5.
4 Ongahelipi ounongo wopakalunga tau dulu oku ku kwafela? Shotete, otau dulu oku ku kwafela u shiive oinima oyo tai nyematifa Jehova. Oto dulu yo okulihonga kutya omolwashike oinima ei ya puka nosho yo osho u na okuninga u henuke oku i longa. Eshiivo eli otali dulu oku ku amena komaupyakadi mahapu oo taa hepeke ovanhu vahapu. Pashihopaenenwa, okudulika komayele aKalunga okukala wa koshoka paenghedi otaku kwafele okwaamena oshiwana shaKalunga kokumita, komikifi hadi tandavele pamilele nosho yo keehombo di he na elao ile tadi teka.
5 Ounongo wa yandjwa kuKalunga otau dulu vali oku ku ningila shike? Otau dulu oku ku kwafela u mone ouwa monghalamwenyo. Otau dulu oku ku kwafela u ninge omatokolo opandunge moinima i na oshilonga, ngaashi okukwata nawa oimaliwa yoye. Oto ka dula okulalakanena omalalakano a fimana nokweekelashi omalalakano oo e na ongushu itai kalelele.
6 Ounongo wopakalunga otau dulu yo oku ku kwafela mekwatafano loye navamwe. Oto dulu okukala noukwaneumbo u na onghalamwenyo i na elao. Oto dulu okuninga oukaume washili notau kalelele navamwe, noto ka fimanekwa nokuli nokwaavo ihava longele Kalunga.
7 Natango, okukala u na ounongo wopakalunga otaku ku kwafele u kale netaleko liwa longhalamwenyo. Otau ke ku kwafela u pondole omaupyakadi nosho yo omanyemateko omonghalamwenyo. Natango, oto ka kala u na etaleko lopandjele nolashili li na sha nonakwiiwa. Etaleko lashili otali ke ku etela yo oukolele wopamadiladilo nosho yo wopalutu. — Omayeletumbulo 14:30; Jesaja 48:17.
8. Ngeenge oto longele Kalunga, oshike osho ito ka tila?
8 Ngeenge oto longele Kalunga kashili, oto ka kala wa manguluka koumbada oo tau hepeke ovo ihave mu longele. Molwaashi ou shii kutya ovafi ove li meembila ve he na omwenyo, ito ka tila ovo va fya. Molwaashi ou na elineekelo momaudaneko aKalunga okunyumuna ovafi, ito ka tila okufya. Nomolwaashi ou shi shii kutya Kalunga omunaenghono adishe, ito ka tila oulodi. —Ovayuki otava ka fyuulula edu
9-11. Oolyelye tava ka kala mOparadisa, noolyelye itava ka kala mo?
9 Ngeenge oto ehene popepi naKalunga, ito ka tila onakwiiwa. Ngaashi twe shi mona, Ombibeli oya xunganeka omaupyakadi mahapu oo tu wete kombada yedu kunena. Jehova ote tu lombwele kutya oinima ei oyopokafimbo; Ouhamba waKalunga mafiku otau ka ninga edu oparadisa. — Lukas 21:10, 11, 31; 23:43.
10 Ovovo ashike tava ehene kuJehova notave mu longele tava ka kala mOparadisa. Ombibeli otai ti: “Ngenge pa pita okafimbo kaningholi, omuhenakalunga ita kala po vali, nonganga to talaatala onhele yaye, ke po vali nande. Ndelenee ovananheni vo otava ka fyuulula edu, ndee tava ka hafela ombili inene.” — Epsalme 37:10, 11.
11 Ovo tava ekeleshi nondudi okudulika keemhango diyuki daKalunga otava ka fya fiyo alushe. (2 Ovatessaloniki 1:8, 9) Itava ka kala po vali. Otava ka ya mefyo laalushe pamwe naSatana neendemoni daye. (Ehololo 20:10, 14) Ndelenee ovo ve lihonga kombinga yaJehova notave mu longele otava ka hafela Oparadisa kombada yedu.
Onakwiiwa ikumwifi!
12. Ombibeli otai ti ngahelipi kombinga yonakwiiwa?
12 Jehova okwa tuvikilila ovo ve mu hole oinima ikumwifi. Tala ashike osho Eendjovo daye tadi ti kombinga yonghalamwenyo mEduparadisa:
-
Oikulya ya wana okulya: “Moshilongo namu kale oshishipo shoilya [ile oikulya], yo i mene fiyo keexulo deemhunda.” — Epsalme 72:16.
-
Omaumbo mawa: “Vo otava ka dika omaumbo ndee tava kala mo.” — Jesaja 65:21.
-
Oilonga ihafifa: “Ovahoololwa vange ovo vene tava ka shambukilwa oilonga yomake avo. Vo itave ke lihepeka epwanga.” — Jesaja 65:22, 23.
-
Kape na omikifi: “Onakukala mo nande umwe ta ti: Aame oshingone.” — Jesaja 33:24.
-
Kape na oulema: “Opo nee omesho ovapofi otaa ka pashuka nomatwi ovafitamatwi otaa ka fituluka. Mefiku olo oshingudu otashi ka nuka ngaashi omenye nelaka laau ha kokoma, otali imbi nokukuwilila.” — Jesaja 35:5, 6.
-
Kape na ouyahame, oluhodi nefyo: “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Ehololo 21:4.
-
Kape na oita: ‘Kalunga ota xulifa po oita fiyo okeengaba dedu.’ — Epsalme 46:10.
-
Omwenyo waalushe: “Ovayuki, vo otava ka fyuulula [edu, OB-1986], ndee tava kala mo alushe.” — Epsalme 37:29.
13. Olyelye ashike ta dulu okuninga edu eli oparadisa, nomolwashike?
13 Ovanhu itava dulu nande okweeta oinima oyo, ndelenee Jehova oku na eenghono okulonga keshe osho a ti ota ka ninga. Kape na osho tashi mu kelele mokuninga osho a hala okuninga. Ombibeli otai ti: “Kalunga iha nyengwa kusha.” — Lukas 1:37.
14. Ongahelipi to dulu okuya mondjila oyo tai twala komwenyo waalushe?
14 Okupitila mEendombwedi daye, Jehova ota pe ovanhu keshe pamwe omhito va “pite moshivelo sha finana” nokweenda mondjila oyo tai twala komwenyo waalushe. Kala mokati kovanhu ovanelao ovo tava tambula ko eshivo olo. Kala melongelokalunga lashili nokuhafela omanangeko noupuna aJehova fiyo alushe. — Mateus 7:13, 14.