OSHITUKULWA 6
Mbela Kalunga okwa hokwa omalongelokalunga aeshe?
1. PaEndjovo daKalunga, ope na ashike omalongelokalunga omaludi avali elipi?
JESUS okwa ti: “Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” (Mateus 7:13, 14) She likolelela kEendjovo daKalunga, ope na ashike omalongelokalunga omaludi avali: limwe olashili, limwe oloipupulu; limwe oli li mondjila, nalimwe ola puka; limwe otali twala komwenyo, nalimwe otali twala kehanauno.
2. Ongahelipi Omishangwa tadi ulike kutya hamalongelokalunga aeshe a hokiwa kuKalunga?
2 Ovanhu vamwe otava diladila kutya omalongelokalunga aeshe otaa hafifa Kalunga. Eevelishe dOmbibeli tadi landula otadi ulike kutya kashi fi shoshili:
-
“Ovana vaIsrael ova ninga vali eshi shii momesho Omwene. Ndele va longela oobaal nooastarte nookalunga vOvaaram nookalunga vOvasidon nookalunga vOvamoab nookalunga vovana vaAmmon nookalunga vOvafilisti, ndele va efa Omwene ndee itave mu longele. Onghee hano ehandu lOmwene la xwamena Israel.” (Ovatokolipangeli 10:6, 7) Ngeenge ohatu longele oihongwafano ile oikalunga ponhele yaKalunga kashili, itatu ka kala twa hokiwa kuYe.
-
“Oshiwana eshi ohashi fimaneke nge [Kalunga] nomilungu, ndele omitima dasho odi li kokule naame. Ndelenee ohava fimaneke nge hamungaho nokulonga omalongo oipango yovanhu.” (Markus 7:6, 7) Ngeenge ovanhu otava ti kutya otava longele Kalunga ndele otava hongo omadiladilo avo vene ponhele yaasho tashi hongwa kOmbibeli, elongelokalunga lavo oloshimha. Inali tambulwa ko kuKalunga.
-
“Kalunga Oye Omhepo, naava tave mu [ilikana] ovo ve nokwiilikana momhepo nomoshili.” (Johannes 4:24) Okulongela Kalunga kwetu oku na okukala metwokumwe noshili yEendjovo daKalunga.
Oiimati yelongelokalunga loipupulu
3. Onghedi imwe yokuyoolola elongelokalunga lashili mwaali loipupulu oilipi?
3 Ongahelipi hatu dulu okutya elongelokalunga otali hafifa Kalunga ile hasho? Jesus okwa ti: “Omuti keshe muwa ohau ima oiimati iwa, ndele omuti mwii ohau ima oiimati ii . . . Onghee hano otamu va koneke koiimati yavo.” Noitya imwe, ngeenge elongelokalunga ola dja kuKalunga, otali ka imika oiimati iwa; ndele ngeenge elongelokalunga ola dja kuSatana, otali ka imika oiimati ii. — Mateus 7:15-20.
4. Ovalongeli vaJehova ohava ulike oukwatya ulipi?
4 Elongelokalunga lashili ohali imike ovanhu ovo ve na ohole mokati kavo nohava ulikilafana ohole. Eshi omolwaashi Jehova oKalunga omunahole. Jesus okwa ti: “Opo tuu opo aveshe tave mu koneke kutya, nye ovalongwa vange, ngenge mu holafane.” Omalongelokalunga otaa wanifa mbela omufikamhango ou omolweilikano lashili? — Johannes 13:35; Lukas 10:27; 1 Johannes 4:8.
5. Oensiklopedia imwe oya hokolola ngahelipi elandifo lovapika Ovaafrika?
5 Diladila kelandifo lovapika Ovaafrika. O-The New Encyclopædia Britannica otai ti: “Konyala Ovaafrika 18 000 000 ova li va tulwa momalandifo ovapika pokati kaSahara nEfuta linene laIndia kOvaislam pokati komido 650 no 1905. Metata etivali lefelemudo eti-15, Ovaeuropa ova tameka okulandifa komunghulofuta wokouninginino waAfrika, nomo 1867 Ovaafrika ve li pokati ko 7 000 000 no 10 000 000 ova li va twalwa neeshikepa oku ka kala ovapika muNew World.”
6. Ongahelipi omalongelokalunga a kwatelwa melandifo lovapika?
6 Omalongelokalunga okwa katuka onghatu
ilipi mefimbo olo lepiyaano muAfrika eshi ovalumenhu, ovakainhu nosho yo ounona va li va kufwa mo kefininiko momaumbo avo nosho yo momaukwaneumbo avo, va mangelwa momalyenge, va xwikwa noitenda ipyu nova landwa nokulandifwa va fa eengobe? Bethwell Ogot okwa shanga moshifo Daily Nation shaNairobi, muKenya ta ti: “Oukriste nOuislam owa diinina pambelewa ehongo loukumwe wovanhu, ndele nonande ongaho aushe owa eta po omaulipamwe oo e na ovapika noku yadi okatongotongo kopamihoko. . . . Otu na okudimina kutya Ovamoslema nosho yo Ovakriste, Ouninginino nosho yo Oushilo woPokati, aveshe ove na etimba nove na yo oupofi wopaenghedi oo wa twala komafelemido okumona oixuna kwOvaafrika ku he fi okuyelekwa.”Omalongelokalunga noita
7. Ovawiliki vomalongelokalunga ova dana onghandangala ilipi moita?
7 Omalongelokalunga oipupulu okwa ulika oiimati yao ya ola meenghedi dimwe vali. Pashihopaenenwa, nonande Ombibeli otai ti kutya “hola omukweni,” ovawiliki vomalongelokalunga mounyuni aushe ova yambidida nouladi nokuxumifa komesho oita. — Mateus 22:39.
Omalongelokalunga oipupulu okwa kufa ombinga moita nosho yo melandifo lovapika
8. (a) Ongahelipi ovawiliki vomalongelokalunga va xwaxwameka edipao momalipumomumwe muAfrika? (b) Omufita umwe okwa ti shike kombinga yovawiliki vomalongelokalunga pefimbo loita yopashiwana muNigeria?
8 Osha shiivika nawa apeshe kutya mo 1994, ovalikaleli vamwe nosho yo ovapristeri ova kufa ombinga medipao lovanhu moRwanda. Omalongelokalunga okwa dana onghandangala ya kula momalipumomumwe amwe muAfrika. Pashihopaenenwa, pefimbo loita yopashiwana yetileshi lohonde muNigeria, omalongelokalunga keembinga adishe okwa ladipika ovanhu va lwe. Eshi oita ya twikila efimbo lile, omufita umwe okwa ti kutya
ovawiliki vongeleka ova “efa oilonga oyo va pewa kuKalunga.” Okwa ti yo vali: “Fye ovo hatu liti ovakalele vaKalunga otwa ninga ovakalele vaSatana.”9. Ombibeli otai ti ngahelipi kombinga yovakalele vaSatana?
9 Ombibeli otai popi shihapu sha faafana tai ti: “[Satana] mwene ote lifefa omwengeli wouyelele. Kashi fi hano oshinima shinene, ngenge ovapiya vaye tave liningi ovayakuli vouyuki.” (2 Ovakorinto 11:14, 15) Ngaashi ashike ovanhu vahapu ovanawii tave lifefa vawa, Satana ota pukifa ovanhu novakalele vaye ovo tava monika va fa ovayuki ndelenee oilonga yavo oii noiimati yavo oya ola.
10. Omonghedi ilipi ovawiliki vomalongelokalunga ve likala Kalunga?
10 Mounyuni aushe, ovawiliki vomalongelokalunga ova udifa ohole, ombili nosho yo ouwa, ndelenee otava kufa ombinga moutondwe, moita nosho yo mouhenakalunga. Ombibeli otai va hokolola nawa. Otai ti: “Ovo otava ti ova shiiva Kalunga, ndelenee moilonga yavo otave mu likale.” — Titus 1:16.
Djeni mo ‘muBabilon shinene’
11. Ombibeli otai hokolola ngahelipi omalongelokalunga oipupulu?
11 Ohatu dulu okumona osho Jehova ta diladila kombinga yomalongelokalunga oipupulu mokulesha embo lOmbibeli lEhololo. Membo olo omalongelokalunga oipupulu okwa hokololwa e li omukainhu wopafaneko, “Babilon shinene.” (Ehololo 17:5) Didilika osho Kalunga e mu hokolola:
-
‘Ombwada inene, oyo eehamba dopedu da haela nayo.’ (Ehololo 17:1, 2) Ponhele yokukala omadiinini kuKalunga, omalongelokalunga oipupulu okwa kufa ombinga meepolitika, na luhapu ohaa lombwele omapangelo osho e na okuninga.
-
“Ndee musho omwa monikile ohonde yovaprofeti, nohonde yovayapuki noyaava aveshe va dipawa kombada yedu.” (Ehololo 18:24) Omalongelokalunga oipupulu okwa hepeka ovapiya ovadiinini vaKalunga noku va dipaa nokwa li noshinakuwanifwa shomafyo ovanhu omamiliyona moita.
-
“[Oshe] lifimanekifa mokukala mouyadipuna [ufifa ohoni, NW].” (Ehololo 18:7) Omalongelokalunga oipupulu oku na oupuna munene, oo ovawiliki vao hava longifa okukala mehepuluko.
-
“Oiwana aishe ya hongaulwa koupule [waye].” (Ehololo 18:23) Mehongo laye loipupulu kutya omwenyo ihau fi, omalongelokalunga oipupulu okwa pitika keshe oludi loumhulile nosho yo oulodi nokwa xumifa komesho oumbada wokutila ovafi nokwiilikana ovakulu vonale.
12. Ombibeli otai yandje elondwelo lilipi li na sha nomalongelokalunga oipupulu?
12 Okuyandja elondwelo li na eenghono kovanhu va dje mo momalongelokalunga oipupulu, Ombibeli otai ti: “Djeni mo musho, nye ovanhu vange, mu ha kwatafane noulunde washo, mu ha hangike komahepeko asho.” — Ehololo 18:4, 5.
13. Oshike tashi ka ningilwa omalongelokalunga oipupulu nosho yo ovo tava kufa ombinga muo?
13 Monakwiiwa i li popepi, Babilon Shinene, ouhamba womalongelokalunga oipupulu ounyuni otashi ka hanaunwa po filufilu. Ombibeli otai ti: “Omahepeko asho otae shi hange efiku limwe alike, efyo neefya nondjala, ndee tashi xwikwa momundilo, osheshi Omwene Kalunga Oye omunaenghono ou e shi tokola.” (Ehololo 18:8) Okuhenuka okukufa ombinga momahepeko asho, otu na okweefa omakwatafano aeshe nomalongelokalunga oipupulu, tu ha kufe ombinga meenghedi dao, moivilo yao nosho yo momahongo ao oo itaa hafifa Kalunga. Oshinima eshi osha endelela. Eemwenyo detu odi li monghuwo i nonghambe. — 2 Ovakorinto 6:14-18.