1. Oshike tu na okuninga opo tu hafife Kalunga?

OPO tu hafele ekwatafano lopahole naKalunga, otu na okukala tu he na nande ombinga momalongelokalunga oipupulu. Otu na okukufa ombinga melongelokalunga lashili. Kunena ovanhu omamiliyona mounyuni aushe osho taa ningi.

2. Eendombwedi daJehova otadi dulu okuhangika peni, noilonga yado oyashike?

² Ngaashi Ombibeli ya xunganeka, ovalongelikalunga vashili ova ninga po “ongudu inene” oyo ya dja ‘moiwana aishe nomomaludi aeshe nomovanhu aveshe nomomalaka aeshe.’ (Ehololo 7:9) Moilongo 235, omamiliyona Eendombwedi daJehova otaa kwafele vamwe ve lihonge kombinga yeenghedi noiteelelwa yopahole yaJehova.

3. Eendombwedi ohadi longele lyelye, nohadi henuka okulongela shike?

³ Eendombwedi oda dimina kutya Jehova oye ashike a wana okulongelwa. Ohadi anye okulinyongamena oikalunga ile omafano opamalongelokalunga. (1 Johannes 5:21) Ihadi fimaneke oonakufya mokukufa ombinga mokunangala omutanda ile moivilo imwe oyo tai xumifa komesho omahongo omalongelokalunga oipupulu nosho yo ‘omalongo eendemoni.’ (1 Timoteus 4:1) Ndelenee ohadi hekeleke ovo va filwa moku va fatululila eudaneko laKalunga kutya otapa ka kala enyumuko lovafi meduparadisa. — Johannes 5:28, 29; Oilonga 24:15.

4. Oshiwana shaKalunga ohashi tale ko ngahelipi oumhulile?

⁴ Eendombwedi kadi na ombinga moumhulile ile moulodi nodi shi shii kutya oinima oyo oya dja kOndiaboli. Inadi lineekela moumhulile u di amene — ode lineekela muJehova. — Omayeletumbulo 18:10.

5. Omonghedi ilipi Eendombwedi daJehova ‘di he fi oshitukulwa shounyuni’?

⁵ Jesus okwa ti kutya ovahongwa vaye “kave fi oshitukulwa shounyuni.” (Johannes 17:16, NW) Jesus okwa anya okukufa ombinga meepolitika dopefimbo laye. (Johannes 6:15) Sha faafana, Eendombwedi ihadi kufa ombinga meepolitika, moukwashiwana nosho yo mokukondjela eendodo kwounyuni ou. Ndelenee ohadi futu oifendela yado nohadi fimaneke eemhango doshilongo omo ve li. — Johannes 15:19; Ovaroma 13:1, 7.

6. Omifindalandu dilipi hadi shikulwa kovapiya vaKalunga shi na sha nohombo nehengano?

⁶ Molwaashi ohadi dulika komalombwelo epangelo, Eendombwedi ohadi kala da shilipaleka kutya eehombo dado odi li paveta. (Titus 3:1) Ohadi dulika kewiliko laKalunga, onghee hano ohadi henuka okuhombola ombada. (1 Timoteus 3:2) Natango, molwaashi ohadi longifa omafinamhango Ombibeli monghalamwenyo yado, ovapiya vaKalunga ihava kala naanaa neehombo tadi teka.

7. Eendombwedi ohadi ulikilafana ohole ngahelipi?

⁷ Eendombwedi odi holafane. Ohole ei nosho yo ohole yavo yokuhola Kalunga, oye va hanganifa moumwainafana washili, nonande ove li vomomihoko novomoiwana ihapu. Ngeenge pa holoka oiponga inene ile pe na omhumbwe yasha, Eendombwedi ohadi endelele okukwafelafana. Eendombwedi ohadi ulike ohole mokukalamwenyo kwado. — Johannes 13:35.

8. Oshiwana shaKalunga ohashi henuka oilonga ii ilipi?

⁸ Oshiwana shaJehova ohashi longo noudiinini shi kale nonghalamwenyo i li pauyuki. Ohashi henuka okuvaka, okupopya oipupulu, oluhaelo, oukolwe nosho yo oku he na ouyuki mokuninga eengeshefa. Ovashamane ihava denge ovakainhu vavo. Fimbo inava ninga Eendombwedi, ovanhu vamwe ova li hava longo oilonga oyo, ndelenee nekwafo laJehova  ove i efa. Ova ‘yelifwa’ koshipala shaKalunga. — 1 Ovakorinto 6:9-11.

9. Embo limwe ola popya shike kombinga yeengeleka dopamhepo daAfrika?

⁹ Doshili, omalongelokalunga mahapu otaa ti kutya oku na oshili. Otashi dulika a longe oilonga ikumwifa oyo tai yambidida okupopya kwao. Pashihopaenenwa, shi na sha naao taa ifanwa eengeleka dopamhepo muAfrika, embo limwe otali ti: “Oshilonga shondudu osha pingenwa po [keengudu dipe dOukriste]. . . . Otadi liti kutya otadi xunganeke nosho yo okulonga oikumwifilonga. Ovaprofeti mokati kado ohava yandje omamoniko nosho yo omafatululo eendjodi. Ohava longifa omeva mayapuki, omaadi mayapuki, omite, omalixita nosho yo omatwimino okuvelula nokukelela omikifi.”

10, 11. Omolwashike oyo hai ifanwa vati oikumwifilonga kunena itai ulike kutya elongelokalunga ola dja kuKalunga?

¹⁰ Oilyo yomalongelokalunga oo otai ti kutya oikumwifilonga otai ulike kutya omalongelokalunga avo okwa nangekwa noupuna kuKalunga. Ndelenee oyo hai ifanwa vati oikumwifilonga ihai ulike kutya omalongelokalunga okwa hokiwa kuJehova. Satana okwa nghonopaleka ovalongelikalunga voipupulu vamwe va longe “oikumwifilonga.” (2 Ovatessaloniki 2:9, OB-1986) Natango, Ombibeli otai xunganeke kutya eeshali doikumwifilonga da dja kuKalunga, ngaashi okuxunganeka, okupopya omalaka nosho yo ounongo we likalekelwa, otadi “xulu po.” — 1 Ovakorinto 13:8.

¹¹ Jesus okwa londwela ta ti: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu. Efiku olo vahapu otava ti kuame: Omwene, Omwene, hafye tuu ovo twa xunganekele medina loye notwa [ta] mo eendemoni medina loye notwa longa oilonga ihapu yeenghono medina loye? Ndelenee Ame ohandi va lombwele: Inandi mu shiiva nandenande; djeni po puame, onye ovakolokoshi!” — Mateus 7:21-23.

12. Oolyelye tava ka ya mOuhamba weulu?

¹² Ndelenee oolyelye mbela tava ka ya mOuhamba weulu? Ovovo tava longo ehalo laJehova.

13. Oilonga ilipi oyo Kalunga ta lombwele oshiwana shaye shi longe kunena, noolyelye ovo tave i longo?

¹³ Ehalo laKalunga koshiwana shaye kunena olilipi? Jesus okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi.” (Mateus 24:14) Oyo oilonga oyo tai longwa nouladi kEendombwedi daJehova.

14. Ouhamba waKalunga oshike, noolyelye tava ka pangela mOuhamba oo?

¹⁴ ‘Mounyuni aushe,’ Eendombwedi daJehova otadi udifa Ouhamba waKalunga u li epangelo lomeulu olo tali ka pangela edu alishe mouyuki. Otadi hongo kutya Jehova okwa nangeka po Kristus Jesus a kale Ohamba yOuhamba oo, pamwe novapangeli vakwao 144 000 va hoololwa movanhu aveshe. — Daniel 7:14, 18; Ehololo 14:1, 4.

15. Ouhamba otau ka hanauna po shike?

¹⁵ Mokulongifa Ombibeli, Eendombwedi otadi ulikile ovanhu kutya Ouhamba waKalunga otau ka hanauna po onghalelo aishe yaSatana. Omalongelokalunga oipupulu pamwe nomahongo ao oo itaa fimaneke Kalunga notaa fimaneke Ondiaboli itaa ka kala po vali! (Ehololo 18:8) Omapangelo opanhu oo e li po taa pataneke Kalunga nao itaa ka kala po vali. — Daniel 2:44.

16. Oolyelye tava ka kala ovapangelwa vaKristus Jesus, notava ka kala peni?

¹⁶ Natango, Eendombwedi daJehova otadi shiivifa kutya Kristus Jesus ota ka eta omauwa makumwifi kwaavo tava longo osho Kalunga ta pula. Otava ka ninga ovapangelwa vaye kombada yedu. Ombibeli otai udaneke tai ti: “[Ota] ka xupifa epongo eli tali kuu onghuwo li kwafwe, nomukwanaluhepo ou e he na omukwafi. [Ota] ningile omuxupi nohepele olukeno, [nota] xupifa eemwenyo deehepele.” — Epsalme 72:12, 13.

17. Oolyelye aveke tava udifa Ouhamba waKalunga?

¹⁷ Kape na vali ongudu imwe yovanhu oyo tai longo ehalo laKalunga mokuudifa onghundana iwa yOuhamba. Eendombwedi daJehova odo adike tadi shiivifa Ouhamba waKalunga mounyuni aushe.