NATU tye nee oto lilongekidile okuya moukalele ongula yefiku olo ino ya koilonga yokulikongela omboloto, ndele to kanghama po oule wokafimbo, u udite wa loloka. Otashi dulika u udite kutya ongula oi li omhito iwa yokufuwa po! Ndele to ilikana kombinga yasho nowa tokola okuya. Opo nee owa ka longa nomumwameme omunamido noku li omudiinini, ndele omaukwatya aye ngaashi elididimiko nonheni okwa kuma omutima woye. Fimbo ta mu udifa etumwalaka loshili eumbo neumbo, owa dimbuluka kutya ovamwatate novamwameme mounyuni aushe navo otava udifa etumwalaka la faafana, tava longifa oileshomwa ya faafana nohava mono ouwa nedeulo la faafana. Eshi wa alukila keumbo, ou udite u na eenghono, nowa hafa eshi wa pondola okuya moukalele!

Kunena, oukalele wopaKriste ou li oshilonga sha fimana shOuhamba waKalunga. Jesus okwa popya kutya momafiku axuuninwa oilonga yokuudifa otai ka tamunuka mo monghedi ikumwifi. (Mat. 24:14) Ongahelipi exunganeko laye la kala tali wanifwa? Moshitukulwa eshi, ohatu ka kundafana kombinga yovanhu, eenghedi nosho yo oilongifo oyo ya kala tai dana onghandangala ya fimana moukalele wopaKriste notai kwafele ovanhu omamiliyona mounyuni va shiive kutya Ouhamba waKalunga ou li oshinima sholela.