1, 2. Omolwashike itatu dulu okweehena popepi naJehova kufye vene, na Jesus Kristus ote tu kwafele ngahelipi moshinima osho?

 MBELA owa li wa kana poima nande onale? Otashi dulika to dimbuluka omhito opo wa li wa kana eshi wa li to ka talela po kaume koye ile ovapambele voye. Ofimbo to ende mondjila oyo ya puka, mbela kwa li wa shakena nomunhu ndele to mu pula e ku udikile ondjila oyo u na okweenda nayo? Natu tye nee ngeno omunhu omunalukeno okwa ti kwoove: “Shikule nge, ndi ku twale oko wa yuka,” ponhele yoku ku udikila ashike ondjila. Mbela oto ka kala u udite ngahelipi? Ito ka kala mbela u udite wa pepelelwa?

² Otaku dulu okutiwa kutya Jesus Kristus naye osho e tu ningila ngaho. Itatu dulu okukala nekwatafano naKalunga kufye vene. Tu li ovanhu inava wanenena novanamatimba, ohatu kala tu “li kokule nomwenyo womuKalunga.” (Ovaefeso 4:17, 18) Onghee hano, otwa pumbwa ekwafo opo tu ehene popepi naKalunga. Jesus oo e li Omuhopaenenwa wetu dingi ine tu pa ashike omayele noku tu udikila ondjila oyo tu na okweenda. Ndele ngaashi twe shi mona metukulwa lo-1, okwe tu shiva ta ti: “Ila, u shikule nge.” (Mateus 19:21) Kakele kaasho, okwe tu lombwela etomheno la fimanenena kutya omolwashike tu na okutambula ko eshivo olo. Pomhito imwe okwa tile: “Aame ondjila noshili nomwenyo; kape na ou te uya kuTate, ngenge hamuame ta pitile.” (Johannes 14:6) Paife natu ka kundafaneni amwe omomatomheno kutya omolwashike hatu dulu ashike okweehena popepi naKalunga okupitila mOmona. Opo nee lwanima ohatu ka tala kutya omeityo lilipi Jesus e li “ondjila noshili nomwenyo.”

3. Omolwashike hatu dulu ashike okweehena popepi naKalunga okupitila muJesus?

³ Etomheno limwe la fimanenena kutya omolwashike hatu dulu ashike okweehena kuJehova Kalunga okupitila muJesus omolwaashi Jesus ota dana onghandangala ya fimanenena mokuwanifwa kwomalalakano aXe. * (2 Ovakorinto 1:20; Ovakolossi 1:18-20) Opo tu ude ko onghandangala oyo Omona waKalunga ta dana, otwa pumbwa okukaleka momadiladilo osho sha ningilwe moshikunino shaEden, eshi ovanhu votete vavali vokombada yedu va li va waimina Satana oo a li a tukululila Jehova ounashibofa. — Genesis 2:16, 17; 3:1-6.

4. Ounashibofa womuEden owa etifa po omhata ilipi, na Jehova okwa li a tokola okuninga po shike opo e i xulife po?

⁴ Ounashibofa womuEden owa etifa po omhata ya fimanenena meshito alishe, oyo kutya: Mbela Jehova oha pangele ngoo nawa oishitwa yaye? Opo Jehova a xulife po omhata oyo, okwa li a hoolola okutuma omona waye umwe wopamhepo a wanenena kombada yedu a yambe po omwenyo waye opo a yukipalife ounamapangelo waXe noku kulile ovanhu, naasho osha li oshinakuwanifwa sha kwata moiti lela. Mokukanyatela oudiinini fiyo okefyo, omona oo waKalunga okwa li te ke shi ninga tashi shiiva opo omaupyakadi aeshe oo a etifwa po kounashibofa waSatana a kandulwe po. (Ovaheberi 2:14, 15; 1 Johannes 3:8) Ndelenee Jehova okwa li e na ovana vopamhepo va wanenena omamiliyona mahapu. (Daniel 7:9, 10) Mbela okwa li a hoolola mo omona elipi a wanife po oshinakuwanifwa sha fimanenena osho sha popiwa metetekelo? Okwa li a hoolola okutuma “Omona waye Ewifa,” oo a li a shiivika nedina Jesus Kristus. — Johannes 3:16.

5, 6. Jehova okwe shi ulika ngahelipi kutya okwa li e lineekela Omona, nomolwashike a li e mu lineekela?

⁵ Mbela otu na okukala twa kumwa eshi Jehova a hoolola  okutuma Omona waye ewifa? Hasho nande, molwaashi Jehova okwa li e lineekela filufilu Omona waye ewifa. Omafelemido fimbo Omona waye ine uya kombada yedu, Jehova okwa li a xunganeka kutya Omona waye okwa li ta ka kala omudiinini nonande oku monifwe oixuna meenghedi di lili noku lili. (Jesaja 53:3-7, 10-12; Oilonga 8:32-35) Diladila kutya exunganeko olo otali tu lombwele shike kombinga yanghee Jehova a li a tala ko Omona. Omona oo okwa li a shitwa nemanguluko lokuninga omatokolo ngaashi ashike oishitwa ikwao oinaendunge. Ndele Jehova okwa li e mu lineekela filufilu, nomolwaasho a xunganeka kutya okwa li ta ka kala omudiinini. Oshike sha li sha ningifa Jehova a kale e lineekela Omona? Omolwaashi Jehova okwa li e shii nawa Omona waye, nokwa li e shii kutya Omona waye okwa li e na ehalo okudulika kuye. (Johannes 8:29; 14:31) Omona oo okwa li e hole Xe Jehova, naJehova okwa li e hole Omona waye. (Johannes 3:35) Ohole oyo Xe nOmona ve holafane oye va ningifa va kale tava longo moukumwe nova kale ve lineekelafana. — Ovakolossi 3:14.

⁶ Molwaashi Omona waKalunga ota dana onghandangala ya fimanenena mokuwanifwa kwelalakano laXe, nokwe lineekelwa kuXe, nove holafane, inashi yeleka mbela eshi tu na okupitila muye opo tu ehene kuXe? Ope na natango etomheno limwe kutya omolwaashi hatu dulu okweehena kuKalunga okupitila ashike mOmona.

7, 8. Omolwashike sha yeleka eshi Jesus a ti kutya kaku na ou e shii Xe nawanawa, kakele ‘kOmona aeke’?

⁷ Opo tu ehene popepi naJehova noku kale e tu hokwa, otu na okuwanifa po oiteelelwa oyo ta pula tu wanife po. (Epsalme 15:1-5) Ndele olyelye ta dulu oku tu kwafela tu mone nhumbi tu na okuwanifa po omifikamhango daKalunga e dule Jesus? Jesus okwa ti: “Oinima aishe Ame nde i pewa kuTate, ndele kaku na ou ta shiiva Omona [nawanawa, NW], Tate Oye tuu aeke, ndele kaku na ou ta shiiva Tate [nawanawa, NW], Omona Oye tuu aeke, naau Omona a hala oku mu hololela.” (Mateus 11:27) Natu ka taleni kutya omolwashike taku dulu okutiwa  kutya Jesus ka li ta popi ta wedele eshi a ti kutya kaku na ou e shii Xe nawanawa, kakele ‘kOmona aeke.’

⁸ Molwaashi Omona waKalunga oku li “Omudalwa wotete [woishitwa] aishe,” oku na ekwatafano le likalekelwa naXe. (Ovakolossi 1:15) Diladila kekwatafano lopofingo olo Jesus naXe va kulika moule womido dihapudihapu odo va kala ovo aveke, okudja pehovelo leshito fiyo osheshi va shita oishitwa ikwao yopamhepo. (Johannes 1:3; Ovakolossi 1:16, 17) Ofimbo Jesus a li pamwe naXe, okwa li e na omhito ye likalekelwa yokulihonga kombinga yanghee Xe ha diladila nosho yo kombinga yehalo laXe, omifikamhango neendjila daye. Onghee hano, osha yeleka eshi taku tiwa kutya Jesus okwa li e shii Xe nawanawa e dule oshishitwa keshe. Nomolwaasho, kapa li umwe oo ta dulu oku tu hololela omaukwatya aKalunga ngaashi Jesus.

9, 10. (a) Omeenghedi dilipi Jesus e tu hololela kombinga yaXe? (b) Otu na okuninga shike opo tu hokiwe kuJehova?

⁹ Omahongo aJesus otaa ulike kutya okwa li e shii nghee Jehova ha diladila, nonghee ha kala e udite nosho yo oiteelelwa oyo ta pula ovalongeli vaYe va wanife po. * Jesus okwa li yo a holola omaukwatya aXe monghedi imwe vali ya tongomana. Okwa ti: “Ou [a] mona nge, oye a mona Tate.” (Johannes 14:9) Jesus okwa li a hopaenena Xe monghedi ya wanenena mukeshe osho a li a popya ile a ninga. Onghee hano, ngeenge hatu lesha mOmbibeli kombinga yaJesus, kutya nee okombinga yeendjovo daye di na eenghono notadi kumu omutima, ile okombinga yonghenda oyo ya li ye mu linyengifa a velule vamwe nosho yo oukwao wananghali oo wa li we mu ningifa a lile, kungaho otwa fa tu wete Jehova ta popi eendjovo odo ile ta ningi oinima oyo Jesus a li a ninga. (Mateus 7:28, 29; Markus 1:40-42; Johannes 11:32-36) Eendjovo nosho yo oilonga yOmona oye tu hololela monghedi ya wanenena kutya ehalo nosho yo eendjila daXe odilipi. (Johannes 5:19; 8:28; 12:49, 50) Onghee hano, otwa pumbwa okudulika komahongo aJesus nokushikula oshihopaenenwa shaye opo tu kale twa hokiwa kuJehova. — Johannes 14:23.

 ¹⁰ Molwaashi Jesus oku shii nawanawa Jehova noha hopaenene omaukwatya aYe monghedi ya wanenena, osha yeleka eshi Jehova a tokola opo Omona waye oo a kale oupitilo omo tu na okupitila opo tu ehene popepi naYe. Molwaashi paife otu udite ko kutya omolwashike hatu dulu okweehena popepi naJehova okupitila ashike muJesus, natu ka kundafaneni eityo leendjovo odo Jesus a popile eshi a ti: “Aame ondjila noshili nomwenyo; kape na ou te uya kuTate, ngenge hamuame ta pitile.” — Johannes 14:6.

11. (a) Omolwashike hatu dulu ashike okukala nekwatafano liwa naKalunga okupitila muJesus? (b) Eendjovo odo di li muJohannes 14:6 otadi divilike ngahelipi onghandangala ye likalekelwa oyo Jesus ta dana? (Tala eshangelo lopedu.)

¹¹ Otwe lihonga kutya itatu dulu okweehena popepi naKalunga nopehe na okupitila muJesus. Paife natu ka taleni kutya osho osha hala lela okutya shike. Jesus oye “ondjila” omo tu na okupitila opo tu kale tu na ekwatafano liwa naKalunga. Omolwashike taku tilwa ngaho? Molwaashi okwa li omudiinini fiyo omefyo, okwa dula okuyandja omwenyo waye u li oikulila. (Mateus 20:28) Ngeno kapa li oshali yekuliloyambo, ngeno itatu dulu okweehena popepi naKalunga, molwaashi oulunde ohau tu tukula ko kuye. Jehova omuyapuki noita dulu nande okukala a hokwa oulunde. (Jesaja 6:3; 59:2) Lao linene, ekuliloyambo laJesus ole tu mangulula mo moulunde, nomolwaasho omatimba etu ohaa tuvikwa ile haa dimwa po pakanghameno leyambo olo. (Ovaheberi 10:12; 1 Johannes 1:7) Ngeenge otwa tambula ko ekuliloyambo olo nokukala tu na eitavelo tali longo mulo, Jehova ota ka kala e tu hokwa. Oyo oyo ashike onghedi omo hatu dulu ‘okukwatakanifwa naKalunga.’ * — Ovaroma 5:6-11.

12. Omeityo lilipi Jesus e li “ondjila”?

¹² Jesus oye “ondjila” ngeenge tashi uya pokwiilikana. Ohatu dulu ashike okukala tu na elineekelo kutya Jehova ota ka uda  omailikano etu taa di komutima ngeenge otwa ilikana okupitila muJesus. (1 Johannes 5:13, 14) Jesus okwa popya ye mwene a ti: “Ngenge tamu indile sha kuTate, Oye ote shi mu pe medina lange. . . . Indileni ndee tamu pewa, ehafo leni li kale la wanenena.” (Johannes 16:23, 24) Hano, osha yeleka eshi hatu popi naJehova, “Tate yetu” womeulu okupitila medina laJesus. (Mateus 6:9) Ndele Jesus oku li yo “ondjila” meityo olo kutya okwe tu tulila po oshihopaenenwa. Ngaashi sha popiwa nale metetekelo, Jesus oha hopaenene omaukwatya aXe monghedi ya wanenena. Kungaho, okwe tu tulila po oshihopaenenwa osho tu na okulandula opo tu kale twa hokiwa kuJehova. Onghee hano, otu na okushikula oshikoti shaye. — 1 Petrus 2:21.

13, 14. (a) Omolwashike taku tiwa kutya Jesus okwa li ha popi oshili? (b) Opo Jesus a kale ‘oshili,’ okwa li e na okuninga shike, nomolwashike a li e na okuninga ngaho?

¹³ Jesus okwa li ha popi alushe oshili kombinga yeendjovo daXe dopaxunganeko. (Johannes 8:40, 45, 46) Ka li ha popi nande oipupulu. (1 Petrus 2:22) Nokuli novatondi vaye ova li va dimina kutya oha “longo ovanhu ondjila yaKalunga pashili.” (Markus 12:13, 14) Ndele eshi Jesus a popya kutya ‘Aame oshili,’ ka li ashike ta ulike koushili oo kutya okwa li ha popi oshili eshi a li ta popi novanhu, ta udifa noku va honga. Okukala kwaJesus e li ‘oshili’ okwa kwatela mo shihapu shihe fi ashike okupopya oshili.

¹⁴ Dimbuluka kutya Jehova okwa li a nwefa mo ovashangi vOmbibeli va shange komesho yefimbo omaxunganeko mahapu kombinga yaMessias, ile tu tye Kristus. Ova li va xunganeka kondadalunde oiningwanima yomokukalamwenyo kwaye, yomoukalele waye nosho yo nhumbi a li ta ka dipawa. Kakele kaasho, mOmhango yaMoses omwa li oinima ihapu oyo ya li omudidimbe waasho Messias a li ta ka ninga. (Ovaheberi 10:1) Mbela Jesus okwa li ngoo ta ka kala omudiinini fiyo okefyo, nokuwanifa po oinima aishe oyo ya li ya xunganekwa shi na sha naye? Kungaho, Jesus okwa li ta ka ulika kutya Jehova oha xunganeke oshili, naasho osha li oshinakuwanifwa sha kwata moiti  osho Jesus a li e lineekelelwa. Ashike Jesus okwa li a holola oshili oyo ya li ya kwatelwa moinima oyo ya li omudidimbe, e shi ninga okupitila monghedi yaye yokukalamwenyo, oyo ya kwatela mo okupopya kwaye nosho yo oilonga aishe oyo a li a longa. (2 Ovakorinto 1:20) Onghee hano, otaku dulu okutiwa kutya Jesus oye ‘oshili’ meityo olo kutya eendjovo daJehova dopaxunganeko oda ka wanifwa okupitila muye. — Johannes 1:17; Ovakolossi 2:16, 17, NW.

15. Oshike sha kwatelwa mokukala neitavelo mOmona waKalunga, nokuninga ngaho otaku ke tu pefa shike?

¹⁵ Jesus oku li ‘omwenyo,’ molwaashi ohatu dulu ashike oku ka mona “omwenyo waalushe” okupitila muye. (1 Timoteus 6:19) Ombibeli oya ti: “Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.” (Johannes 3:36) Oshike sha kwatelwa mokukala neitavelo mOmona waKalunga? Otashi ti okukala twa tomwa kutya ohatu dulu ashike okumona omwenyo waalushe okupitila muye. Kakele kaasho, otu na oku shi ulika noilonga kutya otwa itavela Omona waKalunga mokutwikila okulihonga kombinga yaye, okutula moilonga omahongo aye noku mu hopaenena. (Jakob 2:26) Ngeenge otwa kala neitavelo tali longo mOmona waKalunga, otashi ke tu pefa omwenyo waalushe. Ovakriste ovo va vaekwa nomhepo, ovo ve li “okangudu” otava ka mona omwenyo meulu ve li oishitwa yopamhepo ihai fi, ofimbo “ongudu inene” ‘yeedi dimwe’ tai ka kala nomwenyo fiyo alushe meduparadisa ve li ovanhu va wanenena. — Lukas 12:32; 23:43; Ehololo 7:9-17; Johannes 10:16, OB-1986.

16, 17. (a) Jesus ota ka kala ngahelipi ‘omwenyo’ koonakufya? (b) Elineekelo lilipi tu na?

¹⁶ Ongahelipi kombinga yaavo va fya nale? Jesus oku li yo ‘omwenyo’ nokovafi. Okafimbo kaxupi fimbo Jesus ina nyumuna kaume kaye Lasarus, okwa li a lombwela Marta, omumwaina waLasarus, a ti: “Aame enyumuko nomwenyo; ou ta itavele nge ota kala nomwenyo, nande na hangike a fya.”  (Johannes 11:25) Jehova okwa pa Omona waye ‘eeshapi defyo nodoshovafi,’ sha hala okutya, eenghono dokunyumuna ovafi. (Ehololo 1:17, 18) Jesus e li Ohamba ya tumbala ota ka longifa eeshapi odo opo a yeulule omivelo doshovafi noku mangulule oonakufya ovo ve li mo. — Johannes 5:28, 29.

¹⁷ Eshi Jesus a ti kutya oye “ondjila noshili nomwenyo,” okwa ngonga pauxupi elalakano lokukalamwenyo noloukalele waye wokombada yedu. Eendjovo odo otadi ti sha neenghono kufye kunena. Dimbuluka kutya konima eshi Jesus a popya eendjovo odo, okwa weda ko a ti: “Kape na ou te uya kuTate, ngenge hamuame ta pitile.” (Johannes 14:6) Eendjovo odo otadi longo fiyo okunena. Onghee hano, ohatu dulu okukala nelineekelo filufilu kutya ngeenge otwa shikula Jesus, katu na fiku natu ka kane, molwaashi ote ke tu udikila ondjila oyo tai twala “kuTate.”

18. Okukala ovashikuli vashili vaJesus osha kwatela mo shike?

¹⁸ Otu na etomheno la kola lokushikula Jesus, molwaashi oku shii nawanawa Xe nota dana onghandangala ya fimanenena mokuwanifwa kwomalalakano aXe. Etukulwa lo-1 lembo eli ole tu kwafela tu mone kutya okukala ovashikuli vashili vaJesus osha kwatela mo okukatuka eenghatu, ndele hakutya ashike otu li Ovakriste ile kutya otu hole Jesus. Okushikula Kristus okwa kwatela mo okukala nonghedi yokukalamwenyo oyo ye likolelela komahongo nosho yo koshihopaenenwa shaye. (Johannes 13:15) Oshishangomwa eshi otashi ke ku kwafele u dule okuninga ngaho.

19, 20. Oshishangomwa eshi oshi na shike osho sha nuninwa oku ku kwafela eshi to kendabala okushikula Kristus?

¹⁹ Momatukulwa taa landula ko, ohatu ka konakona moule okukalamwenyo noukalele waJesus. Omatukulwa oo okwa tukulwa moitukulwa itatu. Moshitukulwa shotete, ohatu ka tala pauxupi kombinga yomaukwatya aye nosho yo onghedi yaye yokukalamwenyo. Moshitivali, ohatu ka konakona oshihopaenenwa shaye shokuudifa nokuhonga nouladi. Moshititatu,  ohatu ka tala nhumbi a li a ulika ohole. Okudja petukulwa eti-3, omatukulwa aeshe oo a landula ko oku na oshimhungu tashi hongo shi na oshipalanyole, “Ongahelipi to dulu okushikula Jesus?” Omishangwa nomapulo oo e li moimhungu oyo okwa nuninwa oku tu kwafela tu dilonge kombinga yanghee hatu dulu okuhopaenena Jesus meendjovo nomoilonga.

²⁰ Molwaashi Jehova Kalunga oku na ehalo oku ku kwafela, ino pumbwa okukala u udite u li mekano, u udite wa fa u li kokule naye omolwokuhawanenena kwoye. Okwa ninga eliyambo linene eshi a li a tuma pahole Omona waye e tu ulikile ondjila oyo tu na okweenda opo tu kale tu na ekwatafano naYe. (1 Johannes 4:9, 10) Ohole inene oyo Jehova e tu ulikila nai ku linyengife u tambule ko eshivo laJesus, olo te tu shivi nalo eshi a ti: “Shikule nge!” — Johannes 1:43.