Kovaleshi ovaholike:

Jesus okwa tile: “Ila, u shikule nge.” (Mateus 19:21) Nonande pomhito oyo a popya eendjovo odo okwa li ta shivi omulumenhu wonhumba, eshivo olo ole tu kwatela mo yo. Mbela owa tambula ko ngoo eshivo olo? Ngeenge owe li tambula ko, okukalamwenyo kwoye otaku ka kala ku na eityo lashili. Omolwashike taku tilwa ngaho?

Jehova okwa li a tuma Omona waye ewifa kombada yedu opo a yambe po omwenyo waye. (Johannes 3:16) Kakele koku tu fila, Omona oo okwe tu ulikila kutya ohatu dulu okukala nonghalamwenyo ya tya ngahelipi. Okwa kala ha hafifa omutima waXe mukeshe osho ta ningi nokwa kala alushe a kanyatela oudiinini waye. Okwe tu ulikila yo nghee hatu dulu okuhopaenena Xe. Jesus okwa li ha popi nokuninga oinima monghedi ya wanenena oyo i li metwokumwe nehalo laXe. — Johannes 14:⁠9.

Ombibeli oya ti kutya Jesus ‘okwe tu fiila oshihopaelelwa tu shikule oshikoti shaye.’ (1 Petrus 2:21) Ngeenge otwa hala okweehena popepi elela naJehova, okukala nonghalamwenyo tai ti sha paife nosho yo okukala mondjila oyo tai twala komwenyo waalushe, otu na okushikula oshikoti shaKristus filufilu.

Opo tu dule okuya molweendo olo lopafaneko, otwa pumbwa okushiiva okukalamwenyo kwaJesus kwokombada yedu. Onghee hano, otwa pumbwa okukonakona noukeka omahokololo e na sha naJesus oo e li mOmbibeli. Ngeenge otwa dilonga koinima oyo Jesus a popya nosho yo oyo a ninga nokutala kunghee hatu dulu oku mu hopaenena, otashi ke tu kwafela tu mone filufilu nghee hatu dulu oku mu shikula.

Oshishangomwa eshi nashi ku kwafele u kulike ohole yoye yokuhola Jesus nosho yo Jehova. Ohole ya tya ngaho nai ku linyengife u shikule filufilu oshikoti shaJesus opo u hafife omutima waJehova paife nofiyo alushe.