Kovamwatate novamwameme ovaholike:

Ngeenge otu hole Kalunga nosho yo ovanhu vakwetu otashi ke tu linyengifa tu ye tu “ka ninge ovanhu vomoiwana aishe ovahongwa, noku va ninginifa.” (Mat. 28:19, 20; Mark. 12:28-31) Osha fimana okukala nohole yokuheliholamwene. Molwaashi otai dulu okukuma omitima daavo “va halelela shili omwenyo waalushe.” — Oil. 13:48.

Nale, otwa li hatu kopele oihopaenenwa yeenghundafana nosho yo okuyandja oishangomwa. Ashike paife otwa pumbwa okuxwepopaleka ounghulungu wetu weenghundafana. Otwa hala okuulika kutya otu hole vakwetu mokukala hatu popi oinima oyo ve na ohokwe muyo. Osho osha hala okutya, otwa pumbwa okukala hatu tifuka nokuyandja elitulemo kohokwe yakeshe umwe. Okambo aka otake ke tu kwafela ngahelipi?

Okambo aka oke na oileshwa 12, oyo ya divilika omaukwatya oo twa pumbwa, opo tu ulike ohole nokuninga ovanhu ovahongwa. Oshileshwa keshe otashi popi kombinga yehokololo lopaMbiibeli omo Jesus, ile Ovakriste vopefimbo lonale va li va ulika oukwatya wonhumba kondadalunde moukalele. Elalakano kali fi okukopela oihopaenenwa yeenghundafana, ndele okukonga eenghedi omo hatu dulu okuulikila ovanhu ohole. Nonande oukwatya keshe owa pumbiwa moukalele wetu, ohatu ka kundafana nghee omaukwatya onhumba kondadalunde a pumbiwa unene, ngeenge hatu hovele eenghundafana, hatu ningi omalishuneko, ile omakonakonombiibeli.

Eshi to konakona oshileshwa keshe, diladila noukeka kombinga yanghee to dulu okuulika oukwatya oo, ngeenge to popi novanhu moshitukulwa sheni. Kendabala okukulika ohole yoye yokuhola Jehova nosho yo ovanhu. Ohole ya tya ngaho otai dulu oku ku kwafela u hange elalakano loye lokuninga ovanhu ovahongwa.

Otwa hafa eshi tu na oufembanghenda munene wokulonga pamwe nanye. (Sef. 3:9) Jehova ne mu nangeke noupuna, eshi tamu twikile okukala mu hole ovanhu noku va ninga ovahongwa!