1-6. Yandja oshihopaenenwa, nghee Eendombwedi dimwe hadi udifa meenghalo di lili noku lili.

 ONDOMBWEDI YAJEHOVA inyasha yomuGhana, yedina Rebecca, oya li ya tala ko ofikola omo hai fikola i li oshitukulwa shayo shokuudifila. Rebecca okwa li ha ende alushe noileshomwa yopaMbiibeli mondjato yaye yomambo okofikola. Okwa li ha kongo eemhito dokuyandja oundombwedi kovanafikola vakwao pefimbo lefudepo. Kungaho, okwa dula okuhovela omakonakonombiibeli novanafikola vahapu vomongudu yavo.

² Ovakokolindjila vondjikilile vavali ovo hava kala kokanhunhu kaMadagascar, oko ke li koushilo wenenedu laAfrica, ova li hava ende eekilometa 25 lwaapo, momutenya utwa, opo va ye komukunda u li kokule, oko va hovela omakonakonombiibeli mahapu novanhu ovo ve na ohokwe.

³ Eendombwedi dimwe domuParaguay nosho yo ovaliyambi ovo va dja koilongo 15 oda li da tunga po ombautu opo di dule oku ka udifila ovanhu onghundana iwa ovo hava kala komunghulo womulonga waParaguay naParaná. Ombautu oyo yeetona 45 ohai dulu okuhumbata ovanhu 12. Omolwombautu oyo, ovaudifi ovo vOuhamba ovaladi ova dula okuudifila ovanhu, ovo ve li keenhele oko ihaku fikwa noupu.

⁴ KuAlaska, oshitukulwalongo shOilongo yaHangana yaAmerica, osho shi li kolundume elela lenenedu laAmerica, Eendombwedi oda li hadi longifa omhito pefimbo loupyu, opo di udifile ovatalelipo ovo have uya okutalela po moshitukulwalongo osho. Ngeenge ovatalelipo ovaendifuta va dja koilongo i lili noku lili tave uya okutalela po pefimbo olo, Eendombwedi domoshitukulwa ohadi ka kala petulilo leeshikepa tadi ulike oishangomwa ihokwifa ya kanghamena kOmbiibeli momalaka e lili noku lili. Moshitukulwalongo osho tuu osho, Eendombwedi ohadi longifa odila, opo di dule oku ka udifila ovanhu ovo ve li komikunda dokokule, nokungaho oda dula okuudifila ovanhu ovo ve li keenhele ngaashi, Aleut, Athabascan, Tsimshian nosho yo Tlingit.

⁵ Larry wokuTexas, mOilongo yaHangana yaAmerica, okwa li e na oshitukulwa shaye shokuudifa she likalekelwa, onhele yokufiloshisho ovakulupe novanaulema omo ha kala. Nonande oha ende mokatemba omolwoulema, okwa li kufa ombinga nouladi moilonga yokuudifa. Okwa li ha lombwele vamwe kombinga yOuhamba nosho yo eteelelo laye kutya fiku limwe ona ka dule okweenda, eshi Ouhamba tau ka pangela ombada yedu.—Jes. 35:5, 6.

⁶ Eendombwedi dimwe oda li da ya molweendo lomafiku atatu nombautu okudja kuMandalay, opo di ka dane oshoongalele kolundume laMyanmar. Molwaashi oda li da halelela okweenda tadi udifa onghundana iwa, oda twaalela oileshomwa yopaMbiibeli noku i yandja kovanhu vamwe ovo va li yo va londa mombautu oyo. Ngeenge  ombautu ya li ya tula podoolopa, ile pomukunda wonhumba, ovaudifi ovo ovaladi ova li hava di mo divadiva, opo va ka yandje oileshomwa kovanhu peedoolopa, ile pomikunda odo. Ovaudifi ovo vOuhamba ova li va longifa yo omhito okuudifila ovanhu ovo va kala tava londo mombautu oyo momukokomoko wolweendo.

7. Eendombwedi ohadi longifa eenghedi dilipi, opo di yandje oundombwedi kombinga yOuhamba, nohadi shi ningi nelalakano lilipi?

⁷ Ngaashi oimoniwa yovamwatate novamwameme ye shi ulika, Eendombwedi daJehova diladi mounyuni aushe ohadi ‘yandje oundombwedi nawanawa kombinga yOuhamba waKalunga.’ (Oil. 28:23) Ohadi udifa eumbo neumbo, momapandavanda, hadi shangele ovanhu eenhumwafo noku va dengela eengodi. Ohadi yandje yo nouladi oundombwedi, ngeenge di li moyeendifo, ile peenhele opo ovanhu ve hole oku ka fuwa po, ile pomafimbo okufuda po koilonga. Otashi dulika di longife eenghedi dokuudifa da yoolokafana, ndele elalakano lado limwe alike, okuudifila ovanhu onghundana iwa keshe opo tava hangwa.—Mat. 10:11.

8, 9. (a) Omolwashike etamunukemo loilonga yokuudifa Ouhamba li li oshinima shikumwifi neenghono? (b) Epulo lihokwifa lilipi la holoka po, noshike tu na okuninga po, opo tu mone enyamukulo?

⁸ Omuleshi omuholike, mbela ou li umwe womovaudifi vOuhamba, ovo tava udifa moilongo i dule 235? Ngeenge osho, oto dana onghandangala moilonga yokuudifa Ouhamba oyo ya tamunuka mo neenghono. Kashi fi tuu oshinima shikumwifi neenghono okudiladila kwaasho ovaudifi vOuhamba tava pondola, eshi tava udifa mounyuni aushe! Eendombwedi daJehova otadi yandje oundombwedi nawanawa kombinga yOuhamba waKalunga kovanhu vomoiwana aishe nonande ope na omashongo a kwata moiti. Moilongo imwe nokuli, oilonga yado oya shilikwa papangelo nohadi hepekwa nonyanya.

⁹ Osho osha etifa po epulo lihokwifa neenghono, olo kutya: Omolwashike oilonga yokuudifa Ouhamba oyo tai xumu komesho inai dula okwiiwa moshipala nande okusha, nokuli nokomapataneko oo taa xwaxwamekwa kuSatana? Opo tu mone enyamukulo kepulo olo, otwa pumbwa okutala kwaasho sha ningilwe po mefelemudo lotete O.P., molwaashi ohatu twikile okulonga oshilonga osho sha li sha hovelwa mefelemudo olo, tu li Eendombwedi daJehova dokunena.

10. Oilonga ilipi Jesus a li ha longo noudiinini, noshike osho a li e shii kombinga yoilonga oyo?

¹⁰ Jesus Kristus, oo a tota po eongalo lopaKriste, okwa li ha longo noudiinini oilonga yokuudifa onghundana iwa yOuhamba waKalunga, naayo oyo oilonga oyo ya li ya fimanenena mokukalamwenyo kwaye. Okwa tile: “Ondi na yo okuudifila oilando imwe onghundana iwa yOuhamba waKalunga, molwaashi eshi osho nda tuminwa.” (Luk. 4:43) Ndele okwa li e shii kutya oilonga oyo a hovela oya li tai ka twikila okulongwa. Nomolwaasho fimbo ina dipawa, okwa li a xunganeka kutya etumwalaka lOuhamba otali ka ‘udifilwa tete oiwana aishe.’ (Mark. 13:10) Etumwalaka olo ola li tali ka udifwa ngahelipi, noolyelye tava ka twikila oku li udifa?

11. Oshilonga sha fimanenena shilipi Jesus a li a pa ovahongwa vaye, noshike sha li tashi ke va kwafela ve shi wanife po?

¹¹ Jesus okwa li a holokela ovahongwa vaye konima eshi a nyumunwa, ndele te  va lombwele va ka longe oshilonga sha fimanenena, a ti: “Onghee hano, indeni mu ka ninge ovanhu vomoiwana aishe ovahongwa, noku va ninginifa medina laXe nolOmona nolomhepo iyapuki; va hongeni okudiinina oinima aishe oyo nde mu lombwela. Ndele taleni! Ondi li pamwe nanye alushe fiyo omomafiku axuuninwa ounyuni ou.” (Mat. 28:19, 20) Eshi Jesus a ti kutya “Ondi li pamwe nanye,” okwa li ta shilipaleke ovahongwa vaye kutya ote ke va yambidida, eshi tava wanifa po oilonga yokuudifa nokuninga ovanhu ovahongwa. Ova li tava ka pumbwa ekwafo la tya ngaho, molwaashi ova li tava ka “tondwa koiwana aishe,” ngaashi Jesus e shi xunganeka. (Mat. 24:9) Ndele opa li yo oshinima shimwe osho sha li tashi ka kwafela ovahongwa vaJesus. Fimbo Jesus ina ya meulu, okwa li e va lombwela kutya otava ka pewa eenghono okupitila momhepo iyapuki, opo va ninge eendombwedi daye “kombada yedu alishe.”—Oil. 1:8.

12. Omapulo a fimana elipi a holoka po, nomolwashike sha fimanenena okumona omanyamukulo komapulo oo?

¹² Natango ope na omapulo amwe vali a fimanenena oo a holoka po: Mbela ovayapostoli vaJesus nosho yo ovahongwa vakwao vomefelemudo lotete ova li ngoo va wanifa po oshilonga osho noudiinini? Ovakriste ovo va li vanini momuvalu ova li ngoo va dula okuyandja oundombwedi nawanawa kombinga yOuhamba waKalunga, eshi va li va shakeneka omahepeko manene? Ova li ngoo shili va kwafelwa kuJehova Kalunga, kuJesus nosho yo kovaengeli nokuyambididwa komhepo iyapuki yaJehova moilonga yavo yokuninga ovanhu ovahongwa? Omapulo oo nosho yo amwe vali e a pamba okwa nyamukulwa membo lOilonga yOvayapostoli. Osha fimanenena okushiiva omanyamukulo omapulo oo. Omolwashike mbela? Omolwaashi Jesus okwa xunganeka kutya oilonga oyo a yandja oya li tai ka longwa “fiyo omomafiku axuuninwa ounyuni ou.”Onghee hano, oshilonga osho oshi na okulongwa kOvakriste aveshe vashili, nafye ovo tu li ko pefimbo eli lexulilo twa kwatelwa mo. Nomolwaasho, otwa halelela okuyandja elitulemo kondjokonona oyo i li membo lOilonga yOvayapostoli.

13, 14. (a) Embo lOilonga ola shangwa kulyelye, nomushangi walo okwa hanga peni ouyelele oo a shanga? (b) Otali hokolola oiningwanima ilipi?

¹³ Embo lOilonga ola shangwa kulyelye? Embo olo inali tumbula kutya olyelye omushangi walo, ndele eendjovo dalo dopehovelo otadi ulike kutya omushangi walo oye yo a shanga Evangeli paLukas. (Luk. 1:1-4; Oil. 1:1, 2) Onghee hano, okwa kala kwa itavelwa okudja nale kutya Lukas, oo a li “omuhakuli omuholike” nomunandjokonona omunekeka, oye a shanga embo lOilonga. (Kol. 4:14) Embo olo otali hokolola oiningwanima oyo ya ningwa momukokomoko womido 28, okudja pokuya kwaJesus meulu mo 33 O.P. fiyo osheshi omuyapostoli Paulus a li a tulwa modolongo muRoma mo 61 O.P. lwaapo. Lukas okwa longifa oshikwatakanifiningi ‘ova’ nosho yo “otwa” mehokololo laye, osho tashi ulike kutya opo a li, eshi oiningwanima ihapu oyo a hokolola tai ningwa. (Oil. 16:8-10; 20:5; 27:1) Molwaashi okwa li ha kongo omauyelele noukeka, osha yela kutya okwa li a pewa ouyelele umwe odikilila kuPaulus, Barnabas, Filippus nosho yo kuvamwe ovo va tumbulwa mehokololo.

¹⁴ Oiningwanima ilipi ya hokololwa membo olo? MEvangeli paLukas, olo a shanga fimbo ina shanga embo lOilonga, okwa hepaulula kombinga yaasho Jesus a li a popya nokwa ninga. Ndele membo lOilonga, okwa hokolola osho ovashikuli vaJesus  va li va popya nova ninga. Onghee hano, embo lOilonga otali hokolola kombinga yovanhu ovo va li va wanifa po oshilonga shokuudifa monghedi ikumwifi, nonande vahapu vomuvo ova li va talwa ko ve li “ovanhu vongaho inava hongwa.” (Oil. 4:13) Oku shi popya pauxupi, embo olo la nwefwa mo otali tu hokololele kombinga yanghee eongalo lopaKriste la totwa po nonghee la enda tali kulu. Ola hokolola kutya Ovakriste vomefelemudo lotete ova li hava udifa tava longifa eenghedi da tya ngahelipi nonokutya ova li ve na etaleko la tya ngahelipi li na sha noilonga yokuudifa. (Oil. 4:31; 5:42) Ola divilika yo onghandangala oyo omhepo iyapuki ya li ya dana mokutandavelifwa kwonghundana iwa. (Oil. 8:29, 39, 40; 13:1-3; 16:6; 18:24, 25) Ola pambula yo kenenediladilo lOmbiibeli aishe, olo la kwatela mo okuyapulifwa kwedina laKalunga okupitila mOuhamba waye, oo u li meke laKristus, nola hokolola nghee etumwalaka lOuhamba la tandavelifwa nomupondo nonande Ovakriste ova li va shakeneka omapataneko a kwata moiti.—Oil. 8:12; 19:8; 28:30, 31.

15. Ouwa ulipi hatu ka mona mokukonakona embo lOilonga?

¹⁵ Itashi ka kala tuu shitunhula notashi pameke eitavelo okukonakona embo lOmbiibeli lOilonga! Otashi ka kuma lela omitima detu, ngeenge otwa konakona oshihopaenenwa shouladi shovashikuli vaKristus ovo vonale. Otashi ke tu linyengifa yo tu kale twa hala okuhopaenena eitavelo lOvakriste ovo vomefelemudo lotete. Kungaho, ohatu ka dula okuwanifa po filufilu oshilonga shetu ‘shokuya noku ka ninga ovanhu vomoiwana aishe ovahongwa.’ Oshishangomwa eshi osha nuninwa oku ku kwafela u konakone moule embo lOilonga.

16. Oshishangomwa eshi otashi ke tu kwafela meenghedi nhatu dilipi?

¹⁶ Oshishangomwa eshi otashi ke tu kwafela meenghedi dilipi? Otashi ke tu kwafela meenghedi nhatu tadi landula: (1) otashi ka pameka elineekelo letu kutya Jehova ote tu yambidida nomhepo yaye iyapuki, eshi hatu wanifa po oilonga yokuudifa Ouhamba nokuninga ovanhu ovahongwa, (2) otashi ka pepaleka ouladi wetu u na sha noukalele, eshi hatu konakona oshihopaenenwa shovashikuli vaKristus vomefelemudo lotete, na (3) otashi ke tu kwafela tu kale twa lenga neenghono ehangano laJehova nosho yo ovo tava kwatele komesho oilonga yokuudifa nokupashukila momaongalo.

17, 18. Oshishangomwa eshi osha unganekwa monghedi ilipi, noinima imwe ilipi tai ke ku kwafela, ngeenge to ningi ekonakonombiibeli lopaumwene?

¹⁷ Oshishangomwa eshi osha unganekwa monghedi ya tya ngahelipi? Osha tukulwa moitukulwa ihetatu. Oshitukulwa keshe otashi ndjadjukununa oiningwanima yonhumba oyo ya hokololwa membo lOilonga. Omatukulwa oo e li koshi yoshitukulwa keshe itaa kundafana embo lOilonga ovelishe novelishe, ndele otaa divilike oilihongomwa oyo hatu dulu okulihonga moiningwanima oyo ya hokololwa membo lOilonga notae tu kwafele tu mone nghee tu na okutula moilonga osho hatu lihongo. Pehovelo letukulwa keshe ope na eendjovo odo tadi ngongo oshikalimo shetukulwa nopa ulikwa yo kutya etukulwa ola kanghamena keevelishe dilipi.

¹⁸ Ope na yo oinima imwe moshishangomwa eshi oyo tai ke tu kwafela, ngeenge hatu ningi ekonakonombiibeli lopaumwene. Omu na omafano mawa, oo taa ulike oiningwanima itunhula oyo ya hokololwa membo lOilonga, oo tae ke ku kwafela u kale wa fa u wete osho sha li sha ningwa po, eshi to dilonga koiningwanima oyo.  Omatukulwa mahapu oku na oimhungu oyo i na omauyelele a wedwa po, oo taa dulu oku tu kwafela tu ude ko oinima yonhumba. Oimhungu imwe otai yandje ouyelele u na sha novanhu ovo va tumbulwa membo lOilonga, ovo va li oihopaenenwa iwa yeitavelo. Oimhungu imwe vali otai yandje ouyelele u na sha neenhele donhumba, oiningwanima yonhumba, eenghedindjikilile domoitukulwa yonhumba, ile ovanhu vamwe vali ovo va tumbulwa membo lOilonga.

19. Omapulo elipi tu na okulipula efimbo nefimbo?

¹⁹ Oshishangomwa eshi otashi dulu oku ku kwafela u likonakone ove mwene paushili. Kashi na nee mbudi kutya owa kala omuudifi wOuhamba oule wefimbo li fike peni, oshiwa okulikonakona efimbo nefimbo u tale kutya oshike naanaa wa pitifa komesho mokukalamwenyo kwoye nonokutya owa tala ko ngahelipi oukalele woye wopaKriste. (2 Kor. 13:5) Lipula kutya: ‘Mbela ondi udite ngoo natango kutya oilonga yokuudifa oi na okulongwa neendelelo? (1 Kor. 7:29-31) Ohandi udifa ngoo onghundana iwa nouladi nondi udite nda tomhwa kutya ei oyo oshili? (1 Tes. 1:5, 6) Mbela ohandi kufa ngoo ombinga pauyadi moilonga yokuudifa nokuninga ovanhu ovahongwa?’—Kol. 3:23.

20, 21. Omolwashike oilonga yetu ya endelela, notu na okukala twa tokola toko okuninga shike?

²⁰ Inatu dimbwa nandenande kutya otwe lineekelelwa oshilonga sha fimana shokuudifa nokuninga ovanhu ovahongwa. Oilonga ei oya endelela neenghono, unene tuu eshi exulilo longhalelo ei yoinima tali ehene popepi neenghono. Kunena eemwenyo dovanhu odi li monghuwo i nonghambe shi dulife nale. Katu shii kutya ovanamitimadiwa vangapi tava ka tambula ko natango etumwalaka letu. (Oil. 13:48) Ndele ofye tu na oshinakuwanifwa shokukwafela ovanhu va tya ngaho manga tapa tiwa nena.—1 Tim. 4:16.

²¹ Onghee hano, osha fimanenena okuhopaenena oshihopaenenwa shovaudifi vOuhamba ovaladi vomefelemudo lotete. Otwe lineekela kutya eshi to ka konakona noukeka oshishangomwa eshi otashi ke ku kwafela u kale to udifa nouladi noneyombamo shi dulife nale. Nashi ku pameke yo u kale wa tokola toko okutwikila ‘okuyandja oundombwedi nawanawa kombinga yOuhamba waKalunga.’—Oil. 28:23.