1, 2. Oshike shididilikwedi shi na sha nolweendo, omo Barnabas naSaul va li ve li pokuya mulo, noilonga yavo oya li tai ka dana onghandangala ilipi mokuwanifwa kwOilonga 1:8?

 OSHA LI efiku litunhula keongalo laAntiokia. Barnabas naSaul ova li va hoololwa komhepo iyapuki mokati kovaprofeti novahongi, opo va twale onghundana iwa koilongo yokokule. a (Oil. 13:1, 2) Osho osha li oshinima shitunhula keongalo laAntiokia. Oshoshili kutya ovalumenhu ovo va pyokoka ova tuminwe nale pomhito imwe, ndele ova li va tumwa koitukulwa oko ovanhu va tambula ko nale Oukriste. (Oil. 8:14; 11:22) Ndele pomhito ei, Barnabas naSaul nosho yo Johannes Markus oo a li ta ka kala omuyakuli wavo, ova li va tumwa koilando oko ovanhu vahapu inava uda nale onghundana iwa.

² Omido 14 lwaapo fimbo Barnabas naSaul va li inava tumwa, Jesus okwa li a lombwela ovashikuli vaye a ti: “Otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.” (Oil. 1:8) Okunangekwa po kwaBarnabas naSaul va kale ovatumwa kakwa li tuu kwa dana onghandangala mokuwanifwa po kweendjovo odo daJesus dopaxunganeko! b

3. Oshike sha li hashi ningifa omalweendo male a kale madjuu mefelemudo lotete?

³ Kunena, ovanhu ohava dulu okufika keenhele dokokule moule wovili imwe, ile mbali, molwaashi oku na eehauto nosho yo eedila, ndele mefelemudo lotete O.P. eenghalo hasho da li ngaho. Mefimbo lonale, ovanhu ova li hava ende unene kolupadi, naluhapu ova li hava ende meendjila dii. Olweendo lefiku ola li lilolola neenghono, tashi dulika la li hali pula omunhu a ende oule weekilometa 30.  c  Onghee hano, fimbo Barnabas naSaul va li va teelela nodjuulufi oku ka hovela oshilonga shavo, nopehe na omalimbililo, ova li ve shii kutya oshilonga osho otashi pula eenghendabala da mana mo nosho yo omaliyambo.—Mat. 16:24.

4. (a) Oshike sha li sha wilika okuhoololwa kwaBarnabas naSaul, novamwaxe ova li ve linyenga ngahelipi kwaasho? (b) Ongahelipi hatu dulu okuyambidida ovo tava pewa oinakuwanifwa yopauteokratika?

⁴ Mbela omolwashike omhepo iyapuki ya li ya hoolola kondadalunde Barnabas naSaul, opo va ye va ka longe “oshilonga” shoku ka udifila kokule? (Oil. 13:2) Ombiibeli inai popya kutya omolwashike, ndele otu shii kutya omhepo iyapuki oyo ya li ya wilika okuhoololwa kwovalumenhu ovo. Kape na osho tashi ulike kutya ovaprofeti novahongi muAntiokia ova li omhinge netokolo olo. Ndele ova li va yambidida okunangekwa po kwovalumenhu ovo. Diladila ashike kutya Barnabas naSaul ova li ve udite ngahelipi, eshi Ovakriste vakwao va li “ve lidilika nokwiilikana, ove va tenheka omake nove va lekela” nopehe na oku va twila ondubo! (Oil. 13:3) Nafye otu na okuyambidida ovo tava pewa oinakuwanifwa yopauteokratika meongalo, mwa kwatelwa ovalumenhu ovo hava nangekwa po va kale ovapashukili. Ponhele yokutwila ondubo ovo tava pewa oinakuwanifwa, otu na oku kala tu ‘va hole notwe va lenga omolwoilonga yavo.’—1 Tes. 5:13.

5. Hokolola kutya osha li sha kwatela mo shike okuyandja oundombwedi konhunhu yaKipro.

⁵ Konima eshi Barnabas naSaul va ya ketuliloshikepa laSeleukia, popepi naAntiokia, ova li va ya noshikepa konhunhu yaKipro, opo pa li pe na eekilometa  200 lwaapo. d Molwaashi Barnabas okwa li odalele yomuKipro, osha yela kutya okwa li a halelela oku ka udifila onghundana iwa ovanhu vomoshilongo shambulavo. Eshi ovalumenhu ovo va li va fika moshilando shedina Salamis osho shi li koushilo womunghulofuta wonhunhu, kava li va mana po efimbo. Diva “ova li va hovela okuudifa eendjovo daKalunga moinagoga yOvajuda.” e (Oil. 13:5) Barnabas naSaul ova li va endaenda naKipro ashishe, tava yandje oundombwedi meedolopa adishe omo va pita. Ovatumwa ovo otashi dulika va li va enda eekilometa 220 lwaapo, she likolelela kondjila oyo va enda.

6, 7. (a) Olyelye a li Sirgius Paulus, nomolwashike Barjesus a li ta kendabala oku mu shololifa aha pwilikine konghundana iwa? (b) Saul okwa li a ungaunga ngahelipi nomapataneko aBarjesus?

⁶ Mefelemudo lotete, muKipro omwa li omalongelokalunga oipupulu mahapu. Osho osha li she uya poluhaela, eshi Barnabas naSaul va li va fika muPafo, kouninginino womunghulofuta wonhunhu. Ova li va “shakena nomulumenhu Omujuda wedina Barjesus, oo a li omhulile nomuprofeti omunaipupulu. Omulumenhu oo okwa li ha longele ngoloneya f Sirgius Paulus, oo a li omulumenhu omunaendunge.” Mefelemudo lotete, ovanongo vahapu muRoma, nokuli ‘nomulumenhu omunaendunge’ Sirgius Paulus, ova li hava ka konga ekwafo keemhule, ile kovanongo veenyofi, opo va dule okuninga omatokolo a fimana. Ndele nande ongaho, Sirgius Paulus okwa li a tunhulwa ketumwalaka lOuhamba nokwa “li a halelela okuuda eendjovo daKalunga.” Osho osha li sha handukifa Barjesus, oo a li a shiivika nedinafimaneko la pamba oshilonga shaye, Elimas, olo tali ti “omhulile.”—Oil. 13:6-8.

⁷ Barjesus okwa li ta pataneke etumwalaka lOuhamba. Okwa li ashike ta dulu okukaleka po ondodo yaye ya tumbala e li omuyandjimayele womupangeli Sirgius Paulus ‘mokukendabala okukelela ngoloneya aha itavele Omwene.’ (Oil. 13:8) Ashike Saul ka li a efa omhulile oyo ya li hai di meumbo lomupangeli oo i  imbe omupangeli oo a tambule ko etumwalaka lOuhamba. Mbela Saul okwa li a ninga po shike? Ombiibeli oya ti: “Opo nee Saul oo a li yo ha ifanwa Paulus okwa li a tililwa omhepo iyapuki, ndele te mu tale noku mu konenena ta ti: “Omulumenhu ove u yadi oihelele nowii aushe, omona wOndiaboli nou tonde ouyuki, omolwashike to pengifa omahongo aJehova? Tala, Jehova ote ku handukile ndele to ningi omupofi noito ka mona ouyelele wetango oule wefimbo.” Diva okwa mona oshinima sha fa omwifi nokwa hangwa komilaulu, nokwa li ta pungauka ta kongo ou te mu kwata mokwooko.” g Mbela oshikumwifilonga osho osha li sha etifa oidjemo ilipi? “Eshi ngoloneya a mona osho sha ningwa po, okwa ninga omwiitaveli molwaashi okwa li a kuminwa ehongo laJehova.”—Oil. 13:9-12.

8. Ongahelipi hatu dulu okuhopaenena ouladi waPaulus kunena?

⁸ Paulus ka li a tilifwa kuBarjesus. Nafye katu na okutilifwa kovapataneki ovo hava kendabala okushololifa ovo ve na ohokwe metumwalaka lOuhamba. Ashike eendjovo detu “nadi kale alushe donghenda, da fingala omongwa.” (Kol. 4:6) Ndele pefimbo opo tuu opo, inatu kala unene hatu lipula kombinga yaasho ovapataneki tava ti, ndele hatu kala inatu udifila ovanhu ovo ve na ohokwe. Inatu tila yo okunyaneka pomutenya omalongelokalunga oipupulu, oo taa twikile oku “pengifa omahongo aJehova,” ngaashi Barjesus. (Oil. 13:10) Ngaashi Paulus, nafye otu na okuudifa oshili nouladi nokupendula ohokwe yovanamitimadiwa. Nonande Kalunga ite ke tu pa ekwafo ngaashi olo a li a pa Paulus, otu na elineekelo kutya Jehova ota ka longifa omhepo yaye iyapuki, opo a nanene ovo va wana koshili.—Joh. 6:44.

9. Paulus naBarnabas ova tulila po ovo tava kwatele komesho momaongalo kunena oshihopaenenwa shiwa shilipi?

⁹ Opa li pa ningwa omalunduluko eshi Paulus navakwao va li va dja mo muPafo, ndele tava i noshikepa kuPerge, komunghulofuta waAsia Linini, eekilometa 250 lwaapo, okudja pefuta. Oilonga 13:13 oye va popya tai ti: “Paulus novaendi  pamwe naye.” Eendjovo odo otadi ulike kutya Paulus oye a li ta kwatele komesho omalipyakidilo ongudu yavo. Ndele kape na opo pa tongwa kutya Barnabas okwa li a twila Paulus ondubo. Mepingafano naasho, ovalumenhu ovo vavali ova li va twikila okulonga pamwe, opo va wanife po ehalo laKalunga. Paulus naBarnabas ova tulila po ovo tava kwatele komesho momaongalo kunena oshihopaenenwa shiwa. Ponhele yokulalakanena efimano, Ovakriste ohava dimbuluka eendjovo daJesus odo tadi ti: “Amushe ovamwainafana.” Jesus okwa weda ko a ti: “Keshe ou te linenepeke ota ka ninipikwa, nakeshe ou te lininipike ota ka nenepekwa.”—Mat. 23:8, 12.

10. Hokolola kutya olweendo lokudja kuPerge wa yuka kuPisidia Antiokia ola tya ngahelipi?

¹⁰ Eshi va fika muPerge, Johannes Markus okwa fiya po Paulus naBarnabas ndele ta shuna kuJerusalem. Ombiibeli inai popya kutya omolwashike a li e litukauka navo ombadilila. Ndele Paulus naBarnabas ova li va twikila olweendo lavo, okudja kuPerge ndele tava i kuAntiokia shomuPisidia, oshilando osho shi li moshitukulwalongo shaGalatia. Olweendo la tya ngaho ola li lidjuu molwaashi Pisidia Antiokia osha li pombada oule wokilometa nasha, mokuyelekanifa nombada yefuta linene. Eendjila dokeemhunda oda li da nyika oshiponga, molwaashi oda li da shiivikila ovanyeki. Kakele kaasho, otashi dulika Paulus a li ehe na naanaa oukolele. h

11, 12. Paulus okwa li a pendula ngahelipi ohokwe yovapwilikini vaye, eshi a li ta udifa moshinagoga muAntiokia shomuPisidia?

¹¹ Paulus naBarnabas ova li va ya koshinagoga mEshabata fimbo va li muAntiokia shomuPisidia. Ombiibeli oya ti: “Konima eshi Omhango nomambo ovaprofeti a leshwa, ovakulunhu voshinagoga ova lombwela Paulus naBarnabas tava ti: “Ovamwatate, ngeenge omu na ondjovo yetwomukumo i lombweleni ovanhu.” (Oil. 13:15) Opo nee Paulus okwa kala ofika ndele ta hovele okupopya.

 ¹² Paulus okwa li a hovela okupopya novapwilikini vaye a ti: “Ovaisrael nye, nanye yo ovo hamu tila Kalunga, pwilikineni” (Oil. 13:16) Ovapwilikini vaPaulus ova li va kwatela mo Ovajuda nosho yo ovo va ninga veitavelo lOshijuda. Mbela Paulus okwa li a pendula ngahelipi ohokwe yovapwilikini vaye, ovo va li vehe shii onghandangala oyo Jesus ta dana mokuwanifwa kwelalakano laKalunga? Tete, Paulus okwa ngonga ondjokonona yoshiwana shOvajuda. Okwa li a yelifa nghee Jehova a li a ‘hoolola ooxekulululwa fimbo va li ovanailongo muEgipiti’ nosho yo nghee a “kala te ve lididimikile mombuwa oule womido 40 lwaapo,” konima eshi va mangululwa. Okwa li yo e va hokololela nghee Ovaisrael va li va fyuulula Edu lEudaneko, nanghee Jehova a yandja ‘edu olo kootatekulululwa li li efyuululo.’ (Oil. 13:17-19) Otaku tiwa kutya Paulus otashi dulika a li a tofa mOmishangwa dimwe odo da li hadi leshwa mokule ngeenge ovanhu tava dimbuluka Eshabata. Ngeenge osho shi li ngaho, osho oshimwe shomoihopaenenwa oyo tai ulike kutya Paulus okwa li ha ‘ningi keshe shimwe opo a kwafele ovanhu vomaludi aeshe.’—1 Kor. 9:22.

13. Ongahelipi hatu dulu okupendula ohokwe yovapwilikini vetu?

¹³ Nafye otu na okukendabala tu pendule ohokwe yovanhu ovo hatu udifile. Pashihopaenenwa, ngeenge otwa shiiva kutya omunhu oo hatu udifile oku li melongelokalunga lilipi, otashi ke tu kwafela tu mone kutya ota ka kala a hokwa oshikundafanwa shilipi kondadalunde. Ohatu dulu okutofa oitukulwa yonhumba mOmbiibeli oyo tashi dulika omunhu e shii. Otashi dulika yo shi e te oidjemo iwa, ngeenge otwa pula omunhu a leshe mOmbiibeli yaye mwene. Tala kutya eenghedi dilipi to dulu okulongifa, opo u kwafele omupwilikini woye a kale a hala okulihonga kombinga yaJehova.

14. (a) Paulus okwa li a hovela ngahelipi okuudifila ovanhu onghundana iwa i na sha naJesus, nokwa li a pa ovapwilikini vaye elondwelo lilipi?(b) Eemhunga dovanhu oda li de linyenga ngahelipi keendjovo daPaulus?

¹⁴ Paulus okwa li yo a popya shi na sha nanghee epata leehamba daIsrael la twala fiyo ‘okOmukulili Jesus,’ oo a li a tetekelwa kuJohannes Omuninginifi. Okwa hokolola yo nghee Jesus a li a dipawa nokunyumunwa koufi. (Oil. 13:20-37) Okwa ti: “Ovamwatate, ohandi mu udifile opo mu shiive kutya Kalunga ote ke mu dimina po omatimba omolwefyo lomulumenhu ou. Omhango yaMoses kaya li ye mu ningifa mu kale ovayuki, ndele omolwefyo lomulumenhu ou, Kalunga ota ka tala ko aveshe ovo tava itavele ve li ovayuki. Ovasheki nye, taleni oilonga oyo handi longo pefimbo leni. Itamu ka itavela kutya aame nde i longa nande omu i yelifilwe moule.” Ovanhu ova li ve linyenga nawa ketumwalaka laPaulus. Ombiibeli oya ti: “Ovanhu ove va indila opo va popye vali kombinga yoinima oyo mEshabata tali landula.” Kakele kaasho, konima eshi oshoongalele osho sha li moshinagoga sha dimbuka, “Ovajuda vahapu naavo va ninga veitavelo lOshijuda, ovo va li hava longele Kalunga, ova shikula Paulus naBarnabas.”—Oil. 13:38-43.

15. Oshike sha li sha ningwa po mEshabata konima yoshipopiwa shaPaulus?

¹⁵ MEshabata la landula ko, “ovanhu aveshe moshilando” ova li va ongala, opo va pwilikine kuPaulus. Ashike oshinima sha tya ngaho osha li sha handukifa  Ovajuda vamwe, ovo va li va “hovela okusheka nokupataneka osho Paulus a li ta popi.” Paulus naBarnabas ova li ve va lombwela nouladi va ti: “Onye mwa li mu na okulombwelwa tete eendjovo daKalunga. Ndele molwaashi inamu hala oku di tambula ko notamu ulike kutya inamu wana oku ka mona omwenyo waalushe, taleni, paife ohatu ka udifila oiwana imwe. Jehova okwe tu lombwela ta ti: ‘Onde ku nangeka po u li ouyelele koiwana u udife kombada yedu alishe osho tashi ka etela ovanhu exupifo.’”—Oil. 13:44-47; Jes. 49:6.

16. Ovajuda ova li ve linyenga ngahelipi keendjovo da kwata moiti dovatumwa, novatumwa ovo ova li ve linyenga ngahelipi komapataneko?

¹⁶ Ovo va ninga veitavelo lOshijuda, ova li tava pwilikine va hafa, “naaveshe ovo va li va halelela shili omwenyo waalushe ova ninga ovaitaveli.” (Oil. 13:48) Eendjovo daJehova oda li da tandavela diva noshilongo ashishe. Ashike Ovajuda ova li ve linyenga monghedi imwe i lili. Ovatumwa ova li ve va lombwela kutya, nonande ovo va li va udifilwa tete eendjovo daKalunga, ova tokola okweekelashi Messias nova wana okutokolwa kuKalunga. Opo nee, Ovajuda ova li va xwaxwameka ovakainhu novalumenhu ovanamadina, ndele tava “hepeke Paulus naBarnabas noku va taataa mo moshilando shavo.” Mbela Paulus naBarnabas ova li ve linyenga ngahelipi? Ova li ve “lipupula ondwi keemhadi nova ya kuIkonium.” Mbela Oukriste opo wa li wa xulila opo muPisidia Antiokia? Hasho nandenande! Ovahongwa ovo va li va fyaala mo, “ova li va twikila okutililwa omhepo iyapuki nova li va hafa unene.”—Oil. 13:50-52.

17-19. Omeenghedi dilipi hatu dulu okulandula oshihopaenenwa shiwa, osho sha tulwa po kuPaulus naBarnabas, nongahelipi okuninga ngaho taku tu etele ehafo?

¹⁷ Onghedi omo ovalumenhu ovo ovadiinini va li va ungaunga nomapataneko, otai tu hongo oshilihongomwa sha fimanenena. Katu na okweefa po okuudifa, nokuli nonande ovanenenhu vomounyuni ova kendabale oku tu kelela tuha udife. Didilika yo kutya, eshi ovanhu vomuAntiokia va li inava tambula ko etumwalaka, Paulus naBarnabas ova li ve “lipupula ondwi keemhadi,” osho tashi ulike kutya kava li va handukila ovanhu ovo nokava li ve na ondjo mwaasho tashi ke va ningilwa. Ovatumwa ovo ova li ve shii kutya itava dulu okufininika ovanhu va tambule ko etumwalaka lavo, ndele ova li ashike tava dulu okutokola ngeenge otava ka twikila okuudifa, ile hasho. Ashike vo ova li va tokola okutwikila okuudifa, eshi va ya kuIkonio.

¹⁸ Mbela ovahongwa ovo va li va fyaala muAntiokia ova li va ninga po shike? Oshoshili kutya ova li moshitukulwa omo mu na ovanhu ve va tonde, ndele ehafo lavo kala li le likolelela kunghee ovanhu tave linyenge konghundana iwa. Jesus okwa ti: “Ovo tava kala va hafa ovovo hava pwilikine eendjovo daKalunga noku di diinina.” (Luk. 11:28) Ovahongwa vomuPisidia Antiokia osho naanaa va li va tokola okuninga ngaho.

¹⁹ Ngaashi Paulus naBarnabas, nafye natu dimbuluke alushe kutya oshilonga shetu osho okuudifa onghundana iwa. Ovanhu ovo hatu udifile, ovo ve na okutokola kutya otava tambula ko etumwalaka, ile hasho. Ngeenge itava tambula ko etumwalaka letu, natu shikule oshihopaenenwa shovahongwa vomefelemudo lotete. Ngeenge otwa kala tu na olupandu li na sha noshili nokweefa tu wilikwe komhepo iyapuki, nafye ohatu ka kala twa hafa nokuli nonande ohatu patanekwa.—Gal. 5:18, 22.