Komuudifi wOuhamba omuholike:

Natu tye nee ngeno ove oumwe womovayapostoli ovo va li ofika kOmhunda yEemono nomwa holokelwa kuJesus. Okafimbo kaxupi fimbo ina ya meulu, okwe mu lombwela a ti: “Otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.” (Oil. 1:8) Mbela ngeno owe linyenga ngahelipi?

Otashi dulika ngeno owa kala u udite kutya, oshinakuwanifwa osho otashi pula eenghendabala da kwata moiti oku shi wanifa po. Otashi dulika ngeno we lipula kutya: ‘Ohatu ka dula ngahelipi okuyandja oundombwedi “kombada yedu alishe,” ngeenge otu li ashike okangudu kanini kovahongwa?’ Ngeno otashi dulika wa dimbuluka elondwelo laJesus olo a li a pa ovahongwa vaye moufiku oo a fya a ti: “Omupiya ke dule omwene waye. Ngaashi va hepeka nge, nanye otave ke mu hepeka yo; ngeno ova li va diinina eendjovo dange, ngeno otava diinine yo eendjovo deni. Ndele oinima aishe oyo otave i mu ningile omolwedina lange, molwaashi kave shii ou a tuma nge.” (Joh. 15:20, 21) Okudilonga keendjovo odo otashi dulika ngeno kwe ku ningifa u lipule kutya: ‘Ohandi dulu ngahelipi okuyandja oundombwedi nawanawa, ngeenge ope na omapataneko nomayeleko a tya ngaho?’

Kunena, nafye ohatu lipula omapulo a tya ngaho. Tu li Eendombwedi daJehova, nafye otu na oshilonga shokuyandja oundombwedi nawanawa ‘kovanhu vomoiwana aishe’ fiyo ‘okombada yedu alishe.’ (Mat. 28:19, 20) Ndele mbela oilonga ya tya ngaho otai wanifwa po ngahelipi ngeenge okwa xunganekwa kutya, otapa ka kala omapataneko?

Embo lOilonga yOvayapostoli oli na ondjokonona itunhula i na sha nanghee ovayapostoli nosho yo Ovakriste vakwao vomefelemudo lotete O.P. va li va dula okuwanifa po oshilonga shavo kekwafo laJehova. Oshishangomwa eshi, osha nuninwa oku ku kwafela u konakone ondjokonona oyo, nokukala wa tunhukwa omolwoiningwanima oyo ya hokololwa mo. Oto ka kuminwa omafaafano mahapu, oo e li pokati kovapiya vaKalunga vomefelemudo lotete, nosho yo oshiwana shaye kunena. Oto ka mona kutya omafaafano a tya ngaho okwa kwatela mo oilonga oyo hatu longo, nosho yo onghedi omo twa unganekwa, eshi hatu longo oilonga oyo. Ngeenge owa dilonga komafaafano oo, nopehe na omalimbililo, otashi ka pameka eitavelo loye kutya, Jehova Kalunga ota twikile okuwilika oshitukulwa shehangano laye shokombada yedu.

Ohatu ilikana notwe lineekela kutya, ngeenge owa konakona embo lOilonga, otashi ka pameka eitavelo loye kutya Jehova ote ke ku kwafa nonokutya omhepo yaye otai ke ku nghonopaleka. Kala u na omukumo wokutwikila ‘okuyandja oundombwedi nawanawa’ kombinga yOuhamba waKalunga nokukwafela ovanhu va ende mondjila oyo tai twala kexupifo. — Oil. 28:23; 1 Tim. 4:16.