Oshungonangelo 1 Juni 1912 oya ti: “Ovaleshi vetu vahapu ove shii ovanhu ovo ovapofi. Otava dulu okumona omambo okulesha oshali . . . . Omambo oo okwa shangwa monghedi omo ovapofi tava dulu oku a lesha.” Oshungonangelo oya weda ko ya ti: “Ovapofi vahapu ova hafa neenghono omolwetumwalaka olo va lesha kutya omanangeko noupuna matunhula otae ke uya kombada yedu.”

 Eshi eendjovo odo da shangwa, oilongo ihapu oyo hai popi Oshiingilisha oya li i na onghedi ya yooloka ko i na sha nokushanga omambo meendada doshipofi. Ashike Eendombwedi daJehova oda li nale tadi nduluka omambo oo a shangwa meendada doshipofi. Natango osho hatu ningi! Paife otu na oishangomwa oyo ya shangwa meendada doshipofi momalaka e dulife 50. Ohai nyanyangidwa ngahelipi?

 Onghatu yotete i na sha nokunduluka po embo meendada doshipofi, oyo okulundululila eendada monghedi omo ovapofi tava dulu oku di lesha. Michael Millen, oo ha longo koshikondo sho-Text Processing moPatterson, shaNew York okwa ti: “Monakudiwa, otwa li hatu longifa ee-software da ningwa ku vamwe, opo tu dule okutoloka oileshomwa oyo tai dulu okuleshwa kovapofi, ashike ka ya li tai dulu okutolokwa momalaka aeshe. Paife ohatu longifa o-Watchtower Translation System, oyo tai dulu okulongifwa mokutoloka oileshomwa oyo ya shangwa meendada doshipofi momalaka mahapu mounyuni. Ondi wete kutya ofye ashike tu na oprograma oyo.”

 Oishangomwa oyo ya shangwa meendada doshipofi inai kwa tela mo ashike eendada doshileshwa, ndele oya kwatela mo yo omashangelo omafano. Pashihopaenenwa, efano lokombada mokambo oko ka shangwa meendada doshipofi Nghee to dulu okuhafela onghalamwenyo fiyo alushe! ola yelifwa ngaha: “Omulumenhu ta hovele okweenda mondjila ya ngolyoka, ya dingililwa koimeno ya hapa nawa nosho yo keendudu.” Jamshed, oo e li omuyakuliongalo nomukokolindjila omupofi, okwa ti: “Omashangelo oo omafano, okwa denga mbada kwaame.”

 Konima ngeenge ya tolokwa, ohai tuminwa koitaimbelewa oyo hai nyanyangida oishangomwa oyo ya shangwa meendada doshipofi. Oishangomwa oyo ya shangwa meendada doshipofi ohai kala ina eembapila da kola, opo iha tauke notai dulu okulongifwa efimbo lile. Opo nee, omafo ohaa ongelwa, ndele taa tulwa kumwe, konima yaasho ohai tumwa pamwe noishangomwa ikwao oyo hai tumwa pandjikilile komaongalo, ile ku longifwe opoosa ngeenge ohava dulu “okutuma oshali oinima ina sha novapofi.” Ngeenge osha pumbiwa, oitaimbelewa otai dulu okutuma tai longifa onghedi oyo hai endele, opo ovamwatate ovapofi, ile ovo ihava monoko nawa va dule okumona oishangomwa oyo hai longifwa pokwoongala.

 Oilonga aishe oyo ohai pula efimbo noimaliwa ihapu. Koshinyanyangido shetu koWallkill, shaNew York, efimbo olo hatu longifa okunyanyangida Eembiibeli 50 000 oli fike pamwe naalo hali longifwa okunyanyangida Eembiibeli 2 da shangwa meendada doshipofi. Ombiibeli keshe yOshiingilisha meendada doshipofi oi na omambo 25, noinima oyo hai longifwa, opo ku ndulukwe omambo oo, ohai pula oimaliwa ihapu i dulife pwaayo hai longifwa, opo ku ndulukwe Eembibeli do vene. Oipeko yOmbiibeli imwe ohai kosho oimaliwa i fike N$2157 00!

 Ovo hava kwafele mokutoloka oishangomwa ya tolokwa meendada doshipofi ohava kala ve udite ngahelipi? Nadia, oo ha longo koshitaimbelewa shaSouth Africa, okwa ti: “Ovamwatate novamwameme ovapofi, ile ovo ihava monoko nawa ove na onghalamwenyo idjuu, onghee onde shi tala ko shi li enangeko noupuna okulonga sha osho tashi dulu oku va kwafela. Osho otashi ulike kutya Jehova oku va hole neenghono.”

 Ndele ongahelipi ngeenge omupofi ke shii okulesha eendada doshipofi? Omido opo da di ko, otwa li twa pitifa okambo Lihonga okulesha eendada doshipofi (Learn to Read Braille,) ke na omashangelo opa vali, meendada doshipofi nosho yo meendada do vene. Oka longekidilwa omunhu oo ha mono ko naao iha mono ko, opo ve ka longife ve li pamwe. Mokambo omu na yo oinima oyo tai dulu okukwafela omupofi a dule okushanga eendada doshipofi. Omupofi, oo te lihongo oha longifa oinima oyo, opo a dule okutula omashangelo ye mwene meendada doshipofi. Edeulo la tya ngaho ohali kwafele omuhongwa a dimbuluka noupu nongeenge te shi kwata.

 Ovamwatate novamwameme ovapofi, ile ovo ihava mono ko nawa ova mona ngahelipi ouwa moishangomwa oyo? Ernst, oo e li koHaiti, okwa li ha kala pokwoongala, ashike ka li e na oshishangomwa sha shangwa meendada doshipofi. Okwa li e na okunana nonhatu, opo a dule okukopela osho ta ka popya moshipopiwa shaye nosho yo osho ta popya momatyekosha aye. Okwa ti: “Ashike paife ohandi dulu okukufa ombinga efimbo keshe. Ondi udite da hangana novamwatate novamwameme. Ohatu pewa eendja dopamhepo da faafana!”

 Jan, omukulunhuongalo oo iha mono ko nawa moAustria ha kwatele komesho Oshungonangelo nosho yo ekonakonombiibeli leongalo, okwa ti: “Oishangomwa yetu oya yela nawa i dulife oishangomwa ihapu oyo nda lesha meendada doshipofi. Pashihopaenenwa, otu na eenomola dopomapandja, omashangelo opedu oo mapu okumona nosho yo omashangelo omafano.”

 Seon-ok, omukokolindjila moSouth Korea, omupofi nombolo. Nale, okwa li ashike ha dulu okupopya oshimbolo ngeenge e kwetiwe, ashike paife oha lesha kuye mwene oishangomwa yopaMbiibeli oyo ya shangwa meendada doshipofi. Okwa ti: “Oishangomwa imwe oyo ya tolokwa meendada doshipofi oidjuu okulesha molwaashi eendada dimwe ka di po, omifinda inadi ukilila, ile ombapila oipu. Ashike Eendombwedi daJehova ohadi longifa eembapila di na ongushu, oitya ya yela nawa noye shi ningifa shipu kwaame okulesha.” Okwa we da ko a ti: “Monakudiwa, onda li ashike handi dulu okulesha oishangomwa yopaMbiibeli ngeenge handi kwafelwa. Ashike paife, ohandi lesha ame mwene. Osha ha fifa nge eshi handi dulu okulilongekidila okwoongala nokukufa ombinga pauyadi. Onda lesha oishangomwa yetu aishe ya shangwa meendada doshipofi. Onda nwefwa mo neenghono kuyo.”

 Ngaashi ashike oishangomwa yetu yo vene, oishangomwa oyo ya shangwa meendada doshipofi oi na omatumbulo taa shikula: “Oshifo eshi ihashi landifwa. Ndele osha nyanyangidwa, opo shi longifwe moilonga yokuhonga ovanhu Ombiibeli mounyuni aushe, oyo hai yambididwa nomayambidido opashimaliwa ehalo liwa.” Otwa pandula unene eshi ha mu yambidida nehalo liwa okupitila ko donate.pr418.com. Ehalo leni liwa lokuyandja otali shi ningifa tashi shiiva, opo ovapofi nosho yo ovo ihava mono ko nawa va dule okumona eendja dopamhepo.