Pehovelo laMarsa 2022, ko jw.org okwa li kwa tulwa eshiivifo tali ti: “Olutuwiliki ola tokola, opo omaongalo aeshe a hovele okwoongala komudidi, okudja mu 1 Aprili, shimha ashike itashi i moshipala eendjidikila odo da tulwa po kepangelo.” Eshiivifo olo ola li la hafifa neenghono Eendombwedi daJehova mounyuni aushe. Ashike nande ongaho, omukifi wekomba, o-COVID 19, inau xula natango. a Mbela oikwanoipangifo ilipi ya li ya pumbiwa, opo ovo va li tava ka kala pokwoongala va amenwe komukifi? Mbela Omalupale etu Ouhamba otaa ka kala ngoo e li monghalo iwa, konima eshi a kala ihaa ongalelwa oule weedula mbali?

 Ovamwatate ova kala nale tava longekida oule weemwedi dihapu, opo okwoongala kOmalupale Ouhamba ku hovele vali.

 Konima ashike yomwedi umwe eshi okwoongala komudidi kwa kanghekwa mo 2020, Oshikondo shOkuduta nOkutunga mOunyuni aushe (WDC), moWarwick, New York, osha hovela okukonakona nghee o-COVID-19 tai ka kuma onghedi omo hatu longifa Omalupale Ouhamba nosho yo eenghatu odo da pumbwa okukatukwa, opo onhele yokwoongalela i kale ya amenwa.

 Eemhumbwe domoshitukulwa shonhumba luhapu ohadi kala da yooloka ko keemhumbwe domoshitukulwa shikwao. Matthew De Sanctis, oo ha longo no-WDC, okwa ti: “Moitukulwa imwe oshidjuu okumona onhele yokulikoshela komake. Ngeenge mOmalupale Ouhamba kamu na omeva, omeva oku na oku ka landwa, ile oku ka tekwa momulonga, ile mondungu. Moilongo imwe, omapangelo okwa lundulula oiteelelwa i na sha nokutalaleka omatungo, ekunguluko lomhepo momatungo nosho yo omadidiliko oo e na okutulwa mo, e na sha noukolele nosho yo oukoshoki.”

 Ovamwatate ova dula ngahelipi okufinda omashongo oo? Matthew okwa ti ova mona kutya mOmalupale Ouhamba mahapu “oikwanoipangifo i li paunafangwa noihe na ondilo oye tu kwafela neenghono.” Pashihopaenenwa, moPapua New Guinea, ova li hava longifa omavela eelitela 20 a tulwa oupomba, opo ve likoshe komake. Ovamwatate ova li va landa oikwanoipangifo yokulikosha komake yOlupale lOuhamba olo li li komikunda, va longifa ashike eedola daNamibia 680. Omalupale Ouhamba muAfrica okwa li a landelwa oikwanoipangifo yongushu yokulikosha komake i dulife po 6 000 okudja koAsia.

 Ova li yo va tula mOmalupale Ouhamba omashina okutalaleka nosho yo okuningifa omhepo i kunguluke nawa. Omaongalo mahapu okwa li a landa oikwatelwa ile, opo va tule ko omambako naasho osha li tashi ka kwafela, opo omambako ehe litaambekidwe kovanhu. Opa li pa ningwa omalongekido, opo oinima oyo hai kwatwa luhapu kovanhu, ngaashi oikwatelwa yomivelo nosho yo eepomba, i wapalekwe pandjikilile, molwaashi oinima oyo otai dulu okutandaveleka eembuto doudu. Omaongalo amwe okwa tula moundjuwo oupomba have lipatulula vo vene, shimha ashike wa tula po eke loye. MuChile, osha pula eedola daNamibia 23 875 lwaapo, opo ku ningwe omalunduluko oo a pumbiwa.

 Nonande ovamwatate ova li tava yandje elitulemo kokuninga Omalupale Ouhamba a kale onhele ya amenwa, ova li yo hava kendabala okukwata nawa omayambidido. Pashihopaenenwa, moilongo imwe, ova li va tambula ko ekwafo okudja kepangelo li na sha noikwanoipangifo yokulikosha komake nosho yo oikwatelwa yomambako. Oitaimbelewa oya li ya longela kumwe, opo va lande oipumbiwa yavo ihapu pefimbo limwe, nokungaho kava li va longifa oimaliwa ihapu. Oitaimbelewa nosho yo Oshikondo shOkulanda Mounyuni Aushe, ova li va ninga omalongekido, opo va lande oinima odikilila okudja kofakitoli, kungaho oinima oya li i na ombilixa nova li hava pewa oinima yavo meni lefimbo lixupi.

 Omalongekido okuninga Omalupale Ouhamba a kale onhele ya amenwa okwa shilipaleka ovo va li tava ka ongala komudidi. Dulcine, omumwameme wokuPeru, okwa dimina kutya okwa li “e na oumbada kashona” eshi a uda kutya ovanhu otava ka shuna kOlupale lOuhamba. Okwa ti: “Onda li nda kwatwa ko-COVID-19 diva ashike eshi omukifi wekomba wa hovela. Onghee onda li nda tila okuya kOlupale lOuhamba molwaashi ondi shii kutya otashi dulika di kwatwe vali komukifi oo. Ashike eshi nda fika pOlupale lOuhamba, onda didilika oinima aishe oyo ovakulunhuongalo va ninga, opo tu kale meameno, ngaashi onhele yokulikoshela komake, oikwatelwa oko haku i omambako nosho yo elongekido lokuwapaleka olupale fimbo okwoongala inaku hovela nosho yo konima. Onda li nda shilipalekwa kutya ondi li monhele ya amenwa.” b

 Sara, omumwameme wokoZambia, okwa li a taalela eshongo la yooloka ko. Okwa ti: “Omushamane wange okwa fya ko-COVID-19 eemwedi opo da di ko. Onda li handi lipula kutya ohandi ka kala ndi udite ngahelipi eshi handi ka kala pokwoongala komudidi oshikando shotete ndihe li naye.” Paife oku uditile ngahelipi okuya kOlupale lOuhamba? Okwa ti: “Okwoongala komudidi okwa ulikila nge kutya Jehova oku li pamwe nafye pomafiku aa axuuninwa. Paife ohandi mono nghee ovakulunhuongalo, ovamwatate novamwameme hava tunge omukumo, hava ulikile nge ohole nokuyambidida nge.”

 Ovamwatate novamwameme mounyuni aushe ova pandula eshi va mona omhito yokushuna kOmalupale Ouhamba. Ohatu mu pandula neenghono omolwomayambidido eni, oo mahapu omuo a ningwa ko donate.pr418.com. Omayambidido eni okwe shi ningifa tashi shiiva, tu shilipaleke kutya eenhele detu dokwoongalela odi li monghalo iwa noda amenwa.