Ouvidio ovo twa tala poyoongalele yoshitukulwa ova kuma omitima detu nove tu kwafela tu ude ko nawa omahongo Ombiibeli. Poshoongalele shoshitukulwa shomo 2020, “Hafeni alushe”! opa danwa ouvidio 114, mwa kwatelwa oipopiwa 43 oyo ya yandjwa koilyo yOlutuwiliki nosho yo kovakwafeli valo. Mbela owe lipulile nale kutya ohashi pula oilonga i fike peni nosho yo oimaliwa opo ouvidio va tya ngaho va ndulukwe po?

 Ovamwatate novamwameme hanga 900 mounyuni aushe ohava yambe po efimbo lavo nokulongifa ounghulungu wavo opo va kwafele mokunduluka po ouvidio ovo. Oshe va pula eevili 100 000 momukokomoko weedula mbali odo va kala tava ungaunga noprojeka oyo. Eevili odo oda kwatela mo eevili 70 000 odo va li va pumbwa opo va manife oshinyandwa shopaMbiibeli shominute 76, shi na oshipalanyole, Nehemia: “Ehafo mOmwene olo eenghono deni.”

 Osha li sha pula oimaliwa ihapu opo tu file oshisho ovaliyambi ovo notu dule oku va landela oilongifo aishe oyo va li tava ka pumbwa opo va manife oshilonga osho.

 Jared Gossman, oo ha longo koshikondo shouvidio nokukwata omawi, okwa ti: “Okomitiye yOkuhonga yOlutuwiliki oya li ya halelela okukwatela mo ovanhu va dja momaputuko nosho yo eenhele da yoolokafana mouvidio vetu. Oya li ya ninga etokolo olo molwaashi otu li ovamwainafana mounyuni aushe noya li ya hala ouvidio navo ve shi ulike. “Opo va pondole, ova li va unganeka eespana 24 moilongo 11 ya yoolokafana opo di longele kumwe moprojeka oyo. Osha pula oimaliwa ihapu opo ku unganekwe oprojeka oyo novanhu ovo va longele kumwe mounyuni aushe.”

 Opo ouvidio vetu vahapu va dule okukwatwa, ohatu kala twa pumbwa oilongifo ye likalekelwa. Pashihopaenenwa, onhele opo pa danenwa oshinyandwa Nehemia: “Ehafo mOmwene olo eenghono deni” oya li ya tungwa mostudio ya-Mt. Ebo oyo i li popepi naPatterson, moNew York, koAmerika. Opo tu longife nawa omayambidido nokushilipaleka kutya eenghalo moshinyandwa osho oda fela filufilu keenghalo odo da hokololwa mOmbiibeli, ovamwatate ova li ve na tunga po oinima oyo tai hopaenene omakuma aJerusalem shonale. Okwa li kwa tungwa eefreima doipilangi doule wopombada weemeta hamano, mo tamu tulwa omafulafula oo a paindwa noluvala la yukila komamanya. Eefreima odo oda li hadi tembulilwa opo da pumbiwa di tunge po vali oinima i lili noku lili oyo ya fela keenghalo odo da popiwa mOmbiibeli, naasho osha kwafela opo kuha tungwe eefreima dihapu unene. Otwa longifa eedola daNamibia omiliyona 1,7, opo ku tungwe oinima aishe oyo ya longifwa moshinyandwa osho. a

 Okukala tu shii ouyelele oo otaku weda ko kolupandu letu li na sha noshoongalele shoshitukulwa shoneudo. Otwe lineekela kutya eenghendabala odo da ningwa opo ku longekidwe oshoongalele osho otadi ke linyengifa vahapu mounyuni aushe va tange Jehova. Otwa pandula komayambidido eni e na sha noilonga yomounyuni aushe, oo hamu yandje okupitila ko donate.pr418.com ile momikalo dimwe di lili.